नेपाल एडुफेयर आजबाट, अनलाइनबाटै भर्चुअल टुर

A+ A A-

नेपालमा पहिलोपटक आयोजना गरिएको भर्चुअल शैक्षिक मेला आजदेखि सुरु भएको छ ।

शिलापत्रडटकमको आयोजनामा आयोजित एडुफेयरमा विद्यार्थीले अनलाइनमार्फत शैक्षिक संस्थाको भर्चुअल टुर गर्न पाउनेछन् ।

नेपालएडुफेयरडटकम लगइन गरेपछि कलेजका कक्षाकोठा, लाइब्रेरी, ल्याब, क्याफ्टेरिया, खेलकुद मैदानलगायतको भर्चुअल टुर गर्न सकिने तथा सम्बन्धित कलेजको म्यानेजमेन्ट, काउन्सिलर र प्रिन्सिपलसँग लाइभ च्याट गर्न पाइने व्यवस्था मिलाइएको शिलापत्रडटकमका तर्फबाट इभेन्ट संयोजक सुरेश सिम्खडाले बताए ।

सुरुवाती चरणमा ६ वटा शैक्षिक संस्था सहभागी भएको एडुफेयर १० देखि १६ जेठसम्म विशेष रूपमा सञ्चालन गरिनेछ । १६ गतदेखि सबै इच्छुक शैक्षिक संस्थाका लागि दर्ता खुला हुने शिलापत्रडटकमका प्रबन्ध निर्देशक विनय खकुरेलले जानकारी दिए । यो मेलालगत्तै आईटी र उच्च शिक्षासँग सम्बन्धित भएर मेला सञ्चालन गर्ने उनले बताए ।

मेला अवधिभर बिहान ९ बजेबाट बेलुका ५ बजेसम्म नेपालएडुफेयरडटकम भिजिट गर्ने विद्यार्थी तथा अभिभावकले कलेजका म्यानेजमेन्ट, काउन्सिलर र प्रिन्सिपलसँग लाइभ च्याट गर्न सक्छन् ।

के हो भर्चुअल एडुफेयर

इभेन्ट संयोजक सिम्खडा भन्छन्, ‘यो एक डिजिटल शैक्षिक मेला हो । यस शैक्षिक मेलामा संसारभरका जहाँ सुकैबाट पनि मानिस सहभागी हुन सक्नेछन् । कुनै निश्चित स्थानमा आयोजना गरिएको मेला होइन ।

शैक्षिक मेलामा कोही पनि भौतिक रूपमा उपस्थित हुनुपर्दैन । जहाँ सुकैबाट पनि विद्यार्थी तथा अभिभावकले शैक्षिक संस्थाबारे जानकारी लिन सक्नेछन् ।’

बदलिँदो समयको माग सम्बोधन गर्न यस किसिमको एजुकेसन फेयरले सबै क्षेत्रका विद्यार्थीको पहुँच स्थापित गर्न सहयोग पुर्याउने आयोजकले जनाएको छ ।