विराटनगरमा ‘सेलेक्टेड’ व्यक्तिलाई मात्र कोरोनाको खोप लगाएपछि ...

A+ A A-

विराटनगरमा सर्वसाधारणलाई सूचना नै नदिई गोप्य रूपमा कोराना भाइरसविरुद्धको खोप लगाएको पाइएको छ । विराटनगर महानगरपालिका-२ मा आज दिउँसो एउटा यस्तै रहस्य बाहिर आएको छ ।

विराटनगर-२ तीनपैनीमा रहेको सिटी सिनेमा हल परिसरमा शुक्रबार दिउँसो कोरोनाविरुद्धको खोप लगाइयो, तर सो विषयमा सर्वसाधारण जानकार थिएनन् ।

दिउँसो १ बजेपछि सिटी सिनेमा वरिपरिको सडकमा सम्बन्धित वडा बाहिरका व्यक्तिहरूको चहलपहल बढ्न थाल्यो । केहीबेरमै तीनपैनी चोक सडकको चारै किनारामा निजी चारचक्के र मोटरसाइकल लगायतका सवारी साधनको लाइन लाग्न थाल्यो ।

भिड बढदै गए पनि स्थानीय भने बेखबर थिए । सिटी सिनेमा परिसरमै एउटा निजी बैंकसमेत रहेकाले कतिपयले बैंकमा लागेको भिडको रूपमा बुझे भने कतिपयले भिड लाग्नुको कारण खोतल्न थाले ।

यत्तिन्जेलसम्ममा कैयौँ मानिसहरू सिटी सिनेमा हल परिसरमा प्रवेश गरिसकेका थिए भने हलको दुवै तर्फको मूल गेटमा ताल्चा लगाइसकिएको थियो । भित्रबाट खोप लगाएको जानकारी आएपछि आसपासका बासिन्दाहरूसमेत खोप लगाउने भन्दै त्यहाँ जम्मा हुन थाले ।

तर, गेटमा ताला लगाइएकाले धेरै मानिसले प्रवेश गर्न पाएनन् र विरोध गर्न थाले । खोप कसले कसलाई दिएको हो भनेरसमेत कुनै सूचना पाउन नसकेपछि कतिपय सर्वसाधारण आक्रोशित भए ।

विराटनगरका लागि आएको खोप सबै वडाका जनताले लगाउन पाउनुपर्ने भए पनि राजनीतिक दलका नेताका आसेपासे र धनाढ्य उद्योगी व्यापारीको परिवारलाई खोप लगाएको भन्दै अखिल क्रान्तिकारीका नेता ताजिम अन्सारीलगयातको समूहले खोप लगाउँदै गरेको स्थानमा विरोध गरेको थियो ।

‘यहाँ सर्वसाधारण जनताले खोप लगाउन नपाएर मर्नुपर्ने बाध्यता छ । उपचार पाउन सकेको अवस्था छैन’ युवा अन्सारीले भने, ‘मन्त्री र एमाले नेताहरूका आसेपासेले मात्र गोप्य रूपमा खोप लगाएको भेटेपछि हामीले विरोध गरेका हौँ ।’

भिड र हो-हल्ला बढदै गएपछि भने नजिकै रहेको प्रहरीसमेत हल सामुन्ने जम्मा भयो र केही बेरपछि हल परिसरको मूल गेट खोलियो र बाहिर जम्मा भएको सबै मानिसहरू परिसरभित्र प्रवेश गरे ।

यत्तिन्जेलसम्ममा खोप लगाउने काममा खटिएका कर्मचारीहरू काम सकेर बाहिर निस्केर सरकारी गाडीमा बसिसकेका थिए । त्यस्तो अवस्था भेटेपछि स्थानीय युवाहरूले कसको आदेशमा कसलाई खोप दिन आएको भन्दै प्रश्न गरेका थिए ।

तर, खटिएका कर्मचारीहरूले कुनै प्रतिक्रिया दिन मानेन । उनीहरूले आफूहरू खटिएको कर्मचारी मात्र भएकाले सबै जानकारी नहुने जवाफ दिएका थिए । सञ्चारकर्मीहरूले समेत सो विषयमा जिज्ञासा राख्दा खटिएका कर्मचारीहरूले केही पनि जानकारी दिन मानेन् ।

भिड र होहल्ला बढदै गएपछि केहीबेरमै प्रहरीको थप बल आइपुग्यो र स्कर्टिङ गरेर खोपका लागि आएको बा १ झ ९३६५ नम्बरको सरकारी गाडी र कर्मचारीलाई बाहिर पठायो ।

सो विषयमा विराटनगर महानगरपालिकाका स्वास्थ्यसम्बन्धी जिम्मेवार कर्मचारीहरूले आफूहरूलाई खोपको विषयमा कुनै जानकारी नरहेको बताएका छन् ।

विराटनगर-२ का वडाध्यक्ष कुमार पोखरेलले आफूलाई समेत खोप लगाउने विषयमा कुनै जानकारी नआएको बताए । कतिपयले उद्योग संगठन र मोरङ व्यापार संघको अगुवाइमा प्रदेश सरकारबाट उपलब्ध गराइएको खोप ‘सेलेक्टेड’ व्यक्तिहरूलाई त्यहाँ लगाइएको दाबी गरेका छन् ।

यद्यपि उद्योग संगठनका अध्यक्ष सुयश प्याकुरेलले समेत आफू त्यस विषयमा जानकार नरहेको बताएका छन् ।

प्रकाशित मिति: शुक्रबार, जेठ १४, २०७८ २०:४८