बाबा, मलाई जन्मिन दिनुहोस्

A+ A A-

स्वास लिनुभन्दा पहिले नै श्वास बन्द होस् भनी भगवान्‌सँग प्रार्थना गर्दछन् । छोरीको जन्म हुनेबित्तिकै घरमा कलह हुन्छ । अनि दिनरात छोरा किन पाइनस् भनेर आमालाई यातना दिइन्छ । विचरी आमा मौन ! हुन पनि के बोल्थिन् र बाबाको अगाडि ? बाबालाई त एउटै मात्र भुत सवार थियो 'छोरा', 'छोरा', 'छोरा' मात्र 'छोरा' ।

यदि मिल्ने भए मेरी आमाले दिनहुुँ छोरा जन्माइदिन्थिन्, केवल बाबाका लागि, तर सम्भव थिएन । यहाँ त गर्भमा आएको तीन महिनामै पत्ता लगाइदिन्छन् छोरा छ कि छोरी भनेर । छोरी भए अनि हुन्छ भ्रूणहत्या ।

मेरा बाबा त विद्यालय जानुभएन तर ती डाक्टर त विद्यालयबाटै शिक्षा प्राप्त गरेर डाक्टर बनेका थिए नि । गर्भधारण गरी बच्चा जन्माउने, स्तनपान गराउने तथा पुरुषको शुक्रकिट उत्पादन गर्नेजस्ता गुणहरू मात्रै फरक हुन्छन् । भ्रूणहत्या सामाजिक अपराध हो भन्ने कुरा थाहा डाक्टरहरूलाई थाहा छ । तर पनि पैसाको प्रलोभनमा थाहा हुदाहुँदै पनि डाक्टरहरू अझैसम्म भ्रूणहत्या गरिनैरहेका छन् । भन्नलाई मात्र छोराछोरी बराबर भन्ने गरिन्छ यो समाजमा ।

भ्रूणहत्याका कारण हजारौँ बालिकाहरू संसारमा परिचयविहीन भएका छन् ।भ्रूणहत्या कैयौँको भयो, मेरी आमालगायत धेरै महिलाहरूको जीवनमा पटकपटक भइरह्यो तर पनि केही बोल्दैनन् । बोल्न दिइन्न । आफ्नो बाबाममीको घर छोडी बाबसँग आएकी मेरी आमाजस्ता धेरै महिलाहरू खास बनाउने सपना देखाएर दास बनाइएका छन् ।

अन्याय र अत्याचारले जिउँदो लास बन्दा पनि चुपचाप सहिरहिन् मेरी आमाले । हरेक वर्ष तिम्रै लागि आफ्नो ज्यान दाउमा राखिरहिन् । तिम्रैबारेमा सोचिरहिन्, परिवारको बोझ बोकिरहिन्, आफ्नो हरेक इच्छा चाहनालाई मारेर, मनभरी चोट र पीडा लुकाएर भए पनि बाहिर हाँसिरहिन्, केवल बाबा हजुरकै लागि । यसको बदलामा हजुरले के दिनुभयो चोट र पीडाबाहेक ?

बाबा, हजुरले कहिल्यै सोच्नुभो कि आफूलाई कसले यो संसार देखायो भनेर ? हजुरलाई बिहानबेलुका खाना कसले दिन्छ ? पसिनाले भिजेको लुगा कसले धुन्छ ? हजुर बिरामी पर्दा स्याहार सुसार कसले गर्छ ? हजुरले यी सबै कुराका बारेमा कहिल्यै सोच्नुभएको छ ?

बाबा, छोरी एक सृष्टि हुन् नि, अनि किन गर्भमै मारिदिनुहुन्छ ? बाबा, मलाई पनि यो संसार हेर्न मन छ । जन्मिएर केही गरेर देखाउनु छ । म पनि छोरासरह काम गर्न सक्छु नि । बाबा, मेरो कारणले हजुरको शिर कहिल्यै निहुरिन दिने छैन । जन्मिन पाउने मेरो अधिकार हो । मैले मेरो अधिकार खोज्नु गल्ती हो र ? त्यसैले बाबा, मलाई पनि जन्मिन दिनुहोस् र यो संसारमा पाइला टेक्न दिनुहोस् ।

प्रकाशित मिति: आइतबार, जेठ १६, २०७८ ०६:०४