ब्लगः कोरोनामाथि जित सम्भव छ, तर हाम्रो विवेकले यसको निधो गर्छ

A+ A A-

२०१९ डिसेम्बरमा चीनको वुहान शहरमा सर्वप्रथम कोरोना भाइरस देखा परेको थियो । विस्तारै-विस्तारै विश्वभर फैलन गई यसले महामारीको रूप लियाे । अहिले विश्वभरी कोरोनाको दोस्रो लहर चलिरहेको छ।

विश्व स्वास्थ्य संगठन (डब्लूएचओ) का अनुसार पहिलाेभन्दा दोस्रो लहरको कोरोना भाइरस अझ तीव्र गतिमा फैलन सक्ने क्षमताको छ।

कोरोनाको पहिलो लहरमा धेरै व्यक्ति संक्रमित भएका थिए । कतिपयले त ज्यानसमेत गुमाउनुपर्‍याे । कोरोना भाइरसको दोस्रो लहर अझ बढी खतरनाक छ भनेर विज्ञहरूले बारम्बार भनी राख्दा पनि कतिपय मानिसले यसलाई हल्का रूपमै लिइरहेको पाइन्छ । परिणामस्वरूप नेपालमा कोरोना संक्रमित र मृत्युदर दिन प्रतिदिन बढ्दो छ ।

कोरोना भाइरसबाट सुरक्षित रहन तय गरिएका नियमहरूको उल्लङ्घन गरेका कारणले नेपालमा कोरोना भाइरस नियन्त्रणमा आउन नसकेको स्वास्थ्यकर्मीको भनाइ छ । अनावश्यक घरबाहिर निस्कने, बाटोघाटो, चौतारामा भेला हुने, मास्ककाे उचित प्रयोग नगर्नेजस्ता कारणले समुदायस्तरमा कोरोनाकाे प्रकाेप फैलिएकाे छ । यही बेला बजारमा अधिकांश मास्क तथा सेनिटाइजर गुणस्तरहीन भएको पाइएको छ ।

स्वास्थ्यकर्मीहरूका अनुसार बजारमा पाइनेमध्ये तीन पत्र भएको सर्जिकल मास्क बढी सुरक्षित हुन्छ । हामीले मास्क प्रहरीको लागि होइन, आफ्नाे स्वास्थ्य सुरक्षाको लागि लगाउनुपर्छ । कोरोना भाइरस प्रहरीको अगाडि आउने र प्रहरीको पछाडि नआउने होइन । अतिआवश्यक काममा घरबाट बाहिर निस्किनु परेमा नाक मुख राम्रोसँग ढाक्ने गरी गुणस्तरीय मास्ककाे प्रयोग गर्नुपर्छ । र, सामाजिक दूरी कायम गर्नुपर्छ ।

हाल नेपालमा कोरोना भाइरस र कोरोना भाइरसविरुद्धको खोपलाई लिएर विभिन्न हल्लाहरू सामाजिक संजालमा हुने गरेकाे छ । यस्ता भ्रामक हल्लाकाे पछि लाग्न हुँदैन । अरुलाई पनि यस्ताे अफवाहकाे पछि नलाग्न आग्रह गरौं ।

नेपालमा प्रयोग भइरहेको कोरोना भाइरसविरुद्धको खोप विश्व स्वास्थ्य संगठनबाट मान्यताप्राप्त हाे । स्वास्थ्य तथा जनसंख्या मन्त्रालयले खोप लगाउनेहरूका लागि वेबसाइटमार्फत फारम भर्न पाउने व्यवस्था गरेको छ । उक्त फारम https://vaccine.mohp.gov.np/ गएर भर्न सकिन्छ । कोरोना भाइरससम्बन्धी विभिन्न जानकारी लिन वा कोरोना भाइरससम्बन्धी केही समस्या परेमा नेपाल सरकारको हेल्पलाइन ११३३ र १११५ मा सम्पर्क गर्न सकिन्छ । कोराेना रोकथाम गर्नु हामी सबैको दायित्व हो । सरकारद्वारा जारी नियमको पालना गरौँ । सही सूचना मात्र आदानप्रदान गरौँ । खोप लगाऔँ । कोरोनामाथि जित सम्भव छ तर तपाईं हाम्रो विवेकले यसको निधो गर्छ ।

प्रकाशित मिति: शनिबार, जेठ १५, २०७८ १४:५५