आप्रवासी कामदारका लागि कुवेत विश्वकै खराब रोजगार गन्तव्य, ओमन सुरक्षित

A+ A A-

आप्रवासी कामदारका हकमा कुवेत विश्वकै असुरक्षित देशभित्र चित्रण गरिएको छ । वैदेशिक रोजगारीमा कामदार आपूर्ति गर्दै अर्को देश ओमन भने विश्वमै राम्रो तलब सुविधा दिने र रोजगार सुरक्षित देशभित्र परेको छ ।

जर्मनी इन्टरनेश्नल नेटवर्कले हालै सार्वजनिक गरेको एक अध्ययन प्रतिवेदनमा वैदेशिक रोजगारीमा कामदार आपूर्ति गरिरहेका खाडीका देशमध्ये कुवेतलाई आप्रवासी श्रमिकका हकमा विश्वकै खराबसँगै असुरक्षित रोजगारगन्तव्य देशभित्र राखिएको छ ।

कुवेत रोजगारीका लागि भित्रिएका विदेशी कामदार शारीरिक, मानसिक र आर्थिक शोषणमा पर्ने गरेको नेटवर्कले औँल्याएको छ । रोजगारीका लागि भित्रिएका विदेशी महिला कामदारहरू कुवेतका नागरिकको शारीरिक शोषणको सिकार बन्ने गरेकोसमेत नेटवर्कको अध्ययनमा भनिएको छ ।

नेपाली कामदारको रोजगार गन्तव्य देशभित्र कुवेत पर्छ । हाल, कुवेतमा ८० हजार नेपाली कामदार कार्यरत रहेको कुवेतस्थित नेपाली दूतावासको तथ्यांकमा छ ।

कुवेत रोजगारीका लागि पुगेका महिला कामदार शारीरिक शोषणमा पर्ने गरेको विभिन्न गरैसरकारी संघसस्थाको अध्ययनमा भनिएको छ । प्रलोभनमा पारेर घरेलु कामदारका रूपमा नेपाली महिलाहरूलाई तस्करहरूले कुवेत पुर्‍याएर त्यहाँ खाडीका देश लैजाने गरेका विभिन्न अध्ययनले देखाएका छन् ।

गत वर्ष कोरोना महामारीमा ४ हजारभन्दा धेरै अवैध रूपमा बसेका महिला कामदार स्वदेश फर्किएको दूतावासले जनाएको छ ।

कुवेतमा महिला कामदार घरबाहिर हिँड्डुल गर्न निषेध, साथीभाइसँग आफन्तसँग भेटघाटमा प्रतिबन्ध र विदेशी कामदारलाई तलबमा भेदभाव हुने गरेको नेटवर्कले औँल्याएको छ । कुवेतमा विदेशी कामदारका लागि रोजगारदाता कम्पनीमा खाने बस्ने व्यवस्था नहुने गरेको पनि अध्ययनमा उल्लेख छ ।

जर्मनी संस्थाको उक्त अध्ययनलाई भने कुवेती मानव अधिकार संगठन र मजदुर युनियनले गलत भन्दै आलोचना गरेका छन् । कुवेतको कानुन मन्त्रालयले कुवेतको श्रमबजारलाई प्रभावित बनाउन जर्मनीको संस्था नेटवर्कको चालबाजी भनेरसमेत आरोप लगाएको छ ।

त्यस्तै, खाडीका देशभित्रको सबैभन्दा राम्रो रोजगार गन्तव्य देशभित्र नेटवर्कले ओमनलाई चित्रण गरेको छ । नेपाली कामदारको रोजगार गन्तव्य देशभित्र ओमन पनि पर्छ । हाल ओमनमा करिब ३० हजार नेपाली कामदार कार्यरत रहेको ओमनस्थित नेपाली दूतापासको तथ्यांक छ ।

ओमनमा रोजगारीका लागि आएका विदेशी कामदारलाई समान व्यवहार र उनीहरूले पाउने तलब सुविधामा एकरूपता रहेको अध्ययनमा भनिएको छ । ओमनका रोजगारदाता कम्पनी र विदेशी कामदारबीच सम्बन्ध मैत्रीपूर्ण हुनेगरेको छ ।

ओमनीका नागरिकले विदेशीसँग मित्रता गाँस्न उत्साहित रहेको अध्ययन विश्लेषण छ । अध्ययनमा संलग्न झन्डै ९५ प्रतिशतले आप्रवासी श्रमिकले ओमन रोजगारीका लागि शान्त र न्यायिक देश भएको दाबी गरेको जनाइएको छ । ओमनमा विदेशीका लागि स्वास्थ्य सेवा, तलब सुविधामा सरल रहेको अध्ययनमा भनिएको छ । ओमन कार्यरत विदेशी कामदारलाई कामसँग आरामका लागि समय निधारर्ण गरिएको छ ।

ओमनमा ८ घण्टाभन्दा धेरै काम गरे ओभरटाइम तलब पाउने, होटलमा काम गर्न श्रमिकको स्वास्थ्योपचार अनिवार्य, विदेशी कामदारले सम्बन्धित देशको चाडपर्वमा बिदा पाउने र विदेशी कामदारलाई अनिवार्य आवासको व्यवस्था गरिएको छ ।

प्रकाशित मिति: बिहीबार, जेठ १३, २०७८ १८:४८