निषेधाज्ञामा व्यापारीकाे जुक्तिः यताउति हेर्दै उनले सटर उघारे, अनि अस्मितालाई भित्र बोलाएर फेरि बन्द गरे

निषेधाज्ञामा व्यापारीकाे जुक्तिः यताउति हेर्दै उनले सटर उघारे, अनि अस्मितालाई भित्र बोलाएर फेरि बन्द गरे

A+ A A-

अस्मिता थुलुङ पेप्सिकोलास्थित क्याजुअल वेयर फेन्सी अगाडि कसैकाे प्रतीक्षा गरिरहेकी थिइन् । केहीबेरपछि त्यहाँ पसलका संचालक नवराज कार्की आइपुगे । उनले सटर खोले । अस्मिताले खास उनै पसलेलाई कुरेकी रहिछन् । नवराजले अस्मितालाई भित्र बाेलाए । अनि यताउता हेरेर सटर लगाए ।

अस्मिता आमाको लागि गर्मीमा घर बस्दा लगाउने टिसर्ट किन्न आएकी रहिछन् । फेन्सीको सटरमा लेखिएकाे फोन नम्बर हेरेर उनले फेन्सी संचालकलाई बोलाएकी थिइन् ।

‘आमालाई कपडा चाहिएको थियो । बजार सबै बन्द छ । यो पसलको सटरमा नम्बर लेखिएको रहेछ । फोन गरेर बोलाएकी हुँ’, उनले भनिन् ।

फेन्सी संचालक कार्कीले सटरमा सम्पर्क नम्बर टाँसेको पनि एक हप्ता मात्रै भयो । छेउछाउका पसलेको सिको गरेर केही व्यापार हुन्छ कि भनेर यसो गरेको उनले बताए ।

‘नाफा भनेको त त्यस्तै हो । कोठा भाडा तिर्न पुगे मात्रै पनि हुन्थ्यो । एक हप्तामा एक जना आउन पनि मुस्किल छ’, उनले भने ।

पेप्सीकोलामै यूनिक फेन्सी पसल चलाइरहेकी सुनिता गौतमले पनि आफ्नो पसलबाहिर फाेन नम्बर राखिदिएकी छन् । आफ्नो २ वटै पसल बन्द भएपछि थोरै भए पनि व्यापार हुन्छ कि भनेर यसो गरेको उनी सुनाउँछिन् ।

‘यही ठाउँमा व्याग र फेन्सी पसल छ । दुवै पसल निषेधाज्ञादेखि खोल्न पाएको छैन’, उनले भनिन्, ‘दुवै पसल गरेर महिनाकाे ३२ हजार त भाडा मात्रै बुझाउनुपर्छ । त्यसको लागि केही भरथेग हुन्छ कि भनेर सम्पर्क नम्बर सटरमा टाँसेकी’, उनले भनिन् ।

यद्यपि, अपेक्षा गरेजति फोन नआएको उनकाे भनाइ छ ।
‘अहिले मानिसहरू कपडामा खर्च गर्नुभन्दा बरु महिनौ पुग्ने रासन किनिरहेका छन् । केही पर्छ कि भनेर पैसा पनि जोगाइरहेका छन् । हामी पसलेले चाहिँ कोठा भाडा तिर्न नसकेरै व्यापारै छाेड्ने बेला भएकाे छ ।

सरकारले सुरुमा सावधानी नअपनाएर महामारी सुरु भएपछि निषेधाज्ञाको बाटो अपनाएका कारण खुद्रा व्यापारीहरूले आफ्नाे व्यवसाय टिकाउन विभिन्न तरिका अपनाएको नेपाल खुद्रा व्यापार सघंका निवर्तमान अध्यक्ष पबित्र बज्राचार्यले बताए । आम्दानी कम भए पनि फोनको भरमा हुने व्यापारले घर चलाउन व्यापारीहरूले अनलाइनदेखि सटरमा नम्बर छोडेर धेरथोर व्यापार गर्नुपरेकाे उनकाे भनाइ छ ।

‘अवस्था यही रहिरहने हाे भने खुद्रा व्यापारी पलायन हुने अवस्था आइसक्यो । अब त कोठा भाडा नै लिन्न भने पनि व्यापारीहरू पसल चलाउन नसक्ने स्थितीमा पुगिसके’, उनले भने ।

सरकारले एउटा समस्याबाट बच्न अर्को समस्या थपेको उनको आरोप छ । उनले भने ‘तालिका बनाएर व्यापार गर्न पाउनुपर्छ । निषेधाज्ञा र लकडाउन मात्रै समस्याको समाधान होइन ।'

पछिल्लाे पटक निषेधाज्ञाकाे समय थपेकाे सरकारले कोरोना संक्रमण रोकथामको प्रयासमा निषेधाज्ञा गरेको सरकारले दैनिक उपभोग्य वस्तु दुई दिनलाई किनेर राख्न सर्वसाधरणलाई आग्रह गरेको छ । कसैले कतै पनि लुकीछिपी व्यापार गरेर काेराेनालाई निम्ता नदिने स्वास्थ्य मन्त्रालयले अपिल गर्दै आएकाे छ ।

प्रकाशित मिति: बिहीबार, जेठ १३, २०७८ ०९:२१