नेपाल–भारत सीमामा निरन्तर गोली, बीओपी बढाउँदै सशस्त्र

A+ A A-

नेपाल–भारत सीमा क्षेत्रमा नेपाल प्रहरी र भारतीय तस्कर तथा लुटेरा समूहबीच निरन्तरजसो गोली हानाहान हुन थालेको छ । भारतीय तस्कर तथा लुटेराले प्रहरीमाथि आक्रमण गर्न थालेपछि प्रहरी गोली चलाउन बाध्य भएको हो ।

भारतबाट आपराधिक गतिविधिका लागि नेपाल आउने र प्रहरीले चेकजाँच गर्दा प्रहरीमाथि नै गोली चलाउन थालेपछि प्रहरीले जवाफी फायरिङ गर्नुपरेको हो ।

भारतीय आपराधिक समूहले नेपाली भूमिमा प्रवेश गरेर प्रहरीमाथि आक्रमण गरेपछि सुरक्षा संयन्त्र चिन्तित भएको प्रहरीको भनाइ छ ।

प्रहरीले त्यस्ता समूहलाई नियन्त्रण गर्न गोलीसमेत चलाउनुपरेको नेपाल प्रहरीका प्रवक्ता प्रहरी नायब महानिरीक्षक (डीआईजी) विश्वराज पोखरेलले बताए ।

‘कुनै देशको नागरिकभन्दा पनि हामीले आपराधिक कार्य गर्नेलाई कानूनी दायरामा ल्याउने हो । त्यस क्रममा प्रहरीमाथि नै आक्रमण भयो भने त्यसको जबाफी कारबाही प्रहरीले गर्छ,’ पोखरेलले भने ।

त्यस्तै, सशस्त्र प्रहरी बलका प्रवक्ता डीआईजी सुरज श्रेष्ठले खुला सीमाका कारण आपराधिक घटना बढ्दो क्रममा रहेको बताए ।

‘सीमा नाकामा हुने आपराधिक घटना रोक्न सशस्त्र प्रहरीले बोर्डर आउट पोस्ट (बीओपी)समेत बढाउँदै गएको छ,’ श्रेष्ठले भने ।

खुला सीमाका कारण अवैध हातहतियार ओसारपसार, तस्करी, चोरी र मानव बेचबिखनका घटना हुने गरेका छन् ।

नेपाल प्रहरी र भारतीय तस्कर तथा लुटेरा समूहबीच गोली हानाहान भएका केही प्रतिनिधि घटना यस्ता छन्ः

घटना १

बुधबार राति जनकपुर प्रहरीले गोली हानेर भारतीय डाँका समूहलाई नियन्त्रणमा लियो । उनीहरू जनकपुरधाम–८ स्थित विहारकुण्ड मन्दिरमा डकैती गर्न आएका थिए । उनीहरूले प्रहरीमाथि गोली चलाएपछि प्रहरीले जवाफी फायरिङ गरेको हो । प्रहरीको गोली लागेर विहार समस्तीपुरका रविमल्ली डोम घाइते भएका छन् ।

प्रदेश २ प्रहरी प्रमुख डीआईजी हरि पालका अनुसार डोमको खुट्टामा तीनवटा गोली लागेको छ । प्रहरीले घाइते डोमसहित आठजनालाई नियन्त्रणमा लिएको छ । पक्राउ पनेहरु भारत विहारस्थित समस्तीपुर क्षेत्रका बासिन्दा छन् ।

प्रहरीले उनीहरुबाट खुकुरी, दुई थान पेस्तोल, ६ राउन्ड गोली, दुईवटा मोटरसाइकल र एउटा स्कुटर बरामद गरेको छ ।

घटना २

४ जेठमा बाँकेको नेपालगन्ज इलाका प्रहरी कार्यालय नरैनापुरले ६६ राउन्ड गोली चलायो ।

सीमा नाकामा चेकजाँचका क्रममा लागूऔषध चरेससहित भारतीय नागरिक पक्राउ परेपछि प्रहरी कार्यालयमै भारतीय तस्करले आक्रमण गरे । त्यसको जवाफमा प्रहरीले गोली चलाएको कोहलपुर प्रहरी प्रमुख डीएसपी रमेशबहादुर सिंहको भनाइ छ ।

प्रहरीले ५ किलो चरेसहित पक्राउ परेका देबिदिन विश्वकर्मामाथि लागूऔषध मुद्दा चलाएको छ ।

घटना ३

गत २ जेठमा रुपन्देहीको सिद्धार्थनगर–१० शंकरपुर नाकामा प्रहरीले गोली चलायो । प्रहरीले भारतबाट हतियार लिएर नेपाल प्रवेश गरेका भारतीय नागरिक धीरज धोबीलाई पक्राउ गर्यो । यसपछि भारतीय तस्करले नेपाल प्रहरीमाथि गोली चलायो । प्रहरीले पनि जवाफी कारबाही स्वरुप गोली चलाएको थियो ।

भारतको महाराजगन्ज सुनौली फरेन्दाका ५० वर्षीय धीरज धोबी मेड इन यूएसए लेखिएको अटोमेटिक पेस्तोल नेपाल ल्याउँदै गर्दा सीमानाकाबाट पक्राउ परेका थिए ।

प्रहरीले चलाएको गोली लागेर तस्कर समूहका दिलिप धोबी घाइते भए । उनको उपचारका क्रममा मृत्यु भएको थियो ।

प्रकाशित मिति: शुक्रबार, जेठ १०, २०७६ ०३:५७