विराटनगरका वसिम आलम : निषेधाज्ञामा असहायको सेवामा खटिन्छन्, सरकार र एनजीओको मुख ताक्दैनन्

विराटनगरका वसिम आलम : निषेधाज्ञामा असहायको सेवामा खटिन्छन्, सरकार र एनजीओको मुख ताक्दैनन्

A+ A A-

मुलुक कोरोना महामारीका कारण आक्रान्त छ । संक्रमितले अस्पतालमा बेड पाउन सकेका छैनन्, अक्सिजनको अभाव झेलिरहेका छन् ।

कोरोनाको 'चेन ब्रेक' गर्न निषेधाज्ञा लागू छ । सर्वसाधारण घरभित्र थुनिएका छन् । विपन्न, असहाय र मजदुरलगायत क}यौँ परिवारलाई हातमुख जोर्न हम्मे–हम्मे छ । उनीहरूलाई रोगभन्दा भोकले मर्ने चिन्ता बढेको छ ।

यसरी सडकपेटीमा रोग र भोकको चिन्तामा रहेकालाई सहारा दिँदै छन् युवा अभियन्ता वसिम आलम ।

आलमले नेतृत्व गरेको युवाको समूह अहिले विराटनगरमा भोको पेट बस्न बाध्य भएकाहरूलाई दुई छाक खाना खुवाउने अभिायानमा छ । यो समूहले विराटनगर बजारमा कुनै पनि व्यक्ति भोकै पर्नु नपरोस् भनेर १०औँ दिनदेखि खाना खुवाउने अभियान जारी राखेको छ ।

यसरी सुरु भयो अभियान

गत वर्ष लकडाउन सुरु भएको तेस्रो दिन । विराटनगर बजारमा आलम आफ्ना साथीहरूसँग मास्क, पञ्जा र स्यानिटाइजरलगायतका स्वास्थ्य सामग्री बाँड्दै थिए । केही व्यक्ति सडकपेटीमा भोकभोकै लडिरहेको देखे । नजिकै गएर बुझ्दा उनीहरूको गुनासो थियो- तीन दिन भयो खान नपाएको । भोकै सडकपेटीमा लडिरहेकाहरूका शब्दले आलमलाई बिझायो ।

उनले सडकपेटीमा छट्पटाइरहेकाहरूलाई खाना खुवाउने योजना बनाए । र, तत्कालै आफू र केही साथीबाट रकमको जोहो गरी अभियान सुरु गरे ।

‘सडकका पेटीमा बस्ने, मजदुर, विपन्न र बेसहारा व्यक्तिहरू भोकभोकै लडिरहेको भेट्यौँ । नजिकै गएर बुझ्दा तीन दिनदेखि केही खाएकै छैन भन्ने सुनेपछि मेरो मन भक्कानियो,’ उनी भन्छन्, ‘देशमा तीन तहको सरकार छ, तर पनि यो हालत देखेपछि मनले मानेन । त्यसपछि तुरुन्त पैसा साथीभाइ र आफैँबाट संकलन गरेर खाना बनाएर बाँड्न सुरु गर्‍यौँ ।’

अभियान त सुरु गरेँ तर, दुई छाक खुवाउन स्रोत अभाव भयो । बिहान एक छाक मात्र खाना खुवाएँ । पछि मनकारी दाताहरूबाट खाद्यान्न सहयोग जुट्न थालेपछि दुवै छाक खाना खुवाएको उनी सम्झन्छन् । उनले गत वर्ष यो अभियान १ सय २० दिनसम्म चलाए । उनले दैनिक ४२० देखि ४३० जनासम्मलाई दुई छाक खाना खुवाए ।

गत वर्ष बन्दाबन्दी सकिएपछि उनले जाडोको समयमा न्यानो कपडा बाँडे । विराटनगरका अनाथ आश्रम, मानव सेवा आश्रमलाई पनि सहयोग जुटाउँदै अभियान जारी राखे ।

यो वर्ष नयाँ भेरियन्टसहितको कोरोना महामारी सुरु भएपछि जारी गरेको निषेधाज्ञामा आलमको समूह विपन्न असहायको सहारा बनेको छ । विराटनगरमा १२औँ दिनदेखि आलमको समूहले सडकपेटी, मन्दिर छेउछाउ मागेर खाने, ज्यालादारी मजदुर र यातायात मजदुरहरुलाई खाना खुवाउने अभियान जारी राखेको छ ।

दैनिक २ सय ३५ देखि २ सय ४० जनासम्मलाई बिहान-बेलुका खाना खुवाउँदै आएको आलम बताउँछन् ।

आलम नेतृत्वको समूहले सुरु गरेको खाना अभियानमा सबैभन्दा ठूलो सहयोग विराटनगरस्थित श्रीकृष्ण पार्टी प्यालेसका सञ्चालक रोशन खड्काले गरेका छन् । खाना अभियानका लागि खड्काले पार्टी प्यालेस निःशुल्क प्रयोग गर्न दिएको आलमले बताए ।

‘हामीलाई पार्टी प्यालेसमा खाना बनाउने ठाउँ र सबै भाँडाकुडा उहाँले नै निःशुल्क दिनुभएको छ,’ उनी भन्छन्, ‘यहाँबाटै हामी खाना बनाएर मोटरसाइकलमा बोकेर बाँड्दै हिँड्छौँ ।’

आलम नेतृत्वको समूह हाम्रो अभियानले सञ्चालन गरेको खाना अभियानमा उनीसहित २४ जना युवा छन् । उनीहरूले नै खानाका लागि स्रोत जुटाउने, पकाउने वितरण गर्नेलगायतका काम आफैँ गर्छन् ।

आफैँ बनाएर यसरी खुवाइन्छ खाना

अभियानमा आवद्ध सवै युवा बिहानै ८ बजे कृष्ण पार्टी प्यालेस आइपुग्छन् । त्यहाँ सबैको काम बाँडफाँट हुन्छ । तरकारी काट्ने, चामल केलाउने, सरसफाइ गर्ने काम सुरु हुन्छ । साढे ८ बजेबाट पकाउन सुरु हुन्छ ।

साढे ९ बजे खाना तयारी भएपछि हाम्रो अभियानको टोली १० वटा मोटरसाइकलमा खाना हालेर बाँड्न निस्कन्छ । सबैभन्दा पहिला हनुमान मन्दिरअगाडि सबै टोली पुगेर त्यहाँ ३० देखि ३५ जनालाई खाना खुवाउने आलमले बताए । त्यसपछि दुइटा मोटरसाइकलमा चार जना हाटखोला, दुइटा मोटरसाइकल तीनपैनी, दुइटा शनिमन्दिर, चारवटा मोटरसाइकल बसपार्कमा मजदुरहरूलाई खुवाउन निस्कन्छ । त्यसपछि रोडशेष चोकसम्म टोली पुगेर खाना वितरण गर्दै आएको छ ।

खाना वितरण गरेर १२ बजेसम्म श्रीकृष्ण पार्टी प्यालेस पुगेर सामान थन्क्याएपछि सबै आ–आफ्नो घर पुग्छन् । फेरि ४ देखि साढे ४ बजेसम्म भेला भएर बेलुकाका लागि खानाको तयारी सुरु हुन्छ । ‘साढे ६ बजे खाना तयार भइसकेपछि हामी खाना वितरण गर्न निस्कन्छौँ । फेरि बिहान जुन थियो त्यही रुट हुन्छ,’ आलमले भने ।

खाना अभियानसँगै आलम नेतृत्वको समूहले कोरोना महामारीमा अत्यन्त विपन्न परिवारलाई खाद्य सामग्रीसमेत वितरण गर्दै आएको छ । उनीहरूले कोरोना संक्रमणका कारण मृत्यु भएका विपन्न व्यक्तिको परिवारलाई खाद्यान्न वितरण गर्दै आएका हुन् ।

खाना अभियानका लागि आलम नेतृत्वको समूह हप्तामा एक दिन तरकारी लिन विराटनगरसँग सीमा जोडिएको कटहरीस्थित कृषकको बारीमै पुग्ने गरेको छ ।

खाना अभियानका लागि त्यहाँका स्थानीय कृषक कोपिन्द्र सिंहले निःशुल्क तरकारी दिँदै आएका छन् । उनीहरू आफैँले बारीबाट तरकारी टिपेर ल्याउने गरेका छन् । ‘हप्तामा एक पटक तरकारी लिन कटहरीको नयाँ बजार जान्छौँ । त्यहाँका एक जना उदार कृषकले हामीलाई टमाटरलगायतका विभिन्न तरकारी निःशुल्क दिनुभएको छ,’ आलमले भने, ‘हामी खेतमै पुगेर आफैँ टिपेर ल्याउँछौँ । यसरी हाम्रो अभियान चलेको छ ।’

एनजीओ र सरकारी सहयोग लिएका छैनौँ : आलम

आलम नेतृत्वको हाम्रो अभियानले कुनै पनि सरकारी निकाय र गैरसरकारी संस्थाको सहयोग लिएको छैन । हालसम्म व्यक्तिगत रूपमा उद्योगी, व्यवसायी र स्वेच्छिक रूपमा दाताहरूले दिएको सहयोगमा आफूहरूको अभियान जारी रहेको उनले बताए ।

‘हामीलाई स्वत:स्फुर्त रूपमा चामल, दाल तेल, नुन, तरकारीलगायतका सामग्री दाताहरूले दिनुहुन्छ । जसले जति दिनुहुन्छ सबैका अभिलेख राखेर सार्वजनिक गर्दै आएका छौँ । आइएनजीओ र सरकारी पैसा लिँदैनौँ,’ उनले भने, ‘सरकारी र गैरसरकारी पक्षबाट एक केजी चामलसमेत लिएका छैनौँ । बरु मोरङ प्रहरी प्रमुख सन्तोष सड्का र प्रजिअ कोषहरी निरौलाले हामीलाई कोअपरेट गरिदिनुभएको छ ।’

उनले सरकारी र गैरसरकारी संस्थाको सहयोग नलिने र सो अभियानलाई कसैले पनि राजनीतिक थलोका रूपमा प्रयोग गर्न नसकिने नियम नै बनाइएको बताए । ‘हामी जम्मा २४ जना सबै राजनीतिक आस्था राख्ने साथीहरू छौँ । यहाँ पोलिटिकल कुरा लेख्न र गर्न पाइँदैन,’ उनले भने, ‘कुनै पनि पार्टीको झण्डा, ब्यानर, भेस्ट, टोपी पनि प्रयोग नगर्ने हामीले नियम बनाएका छौँ ।’

उनले महामारीमा भोकभोकै बस्न बाध्य नागरिकका सवालमा सबै सरोकारवालाहरूको ध्यान जानुपर्ने बताए । ‘महामारीमा हरेक व्यक्तिले अप्ठ्यारोमा परेकालाई सहयोग गरौँ,’ उनले भने, ‘जति सकिन्छ त्यति सहयोग गरेर रोग र भोकले कसैलाई मर्न दिनुहुँदैन । सबैले सकेजति सहयोग गरौँ ।’