होम डेलिभरी सेवा रोक्दा सामान किन्‍न बाहिर निस्कन थाले संक्रमित

A+ A A-

‘कोरोना पोजिटिभ देखिएर कोठाभित्रै थुनिएको एक हप्ता भयो । कोठामा पानीबाहेक केही खानेकुरा छैन । अनलाइनबाट खानेकुरा अर्डर गर्न दर्जनभन्दा बढी डेलिभरीका बेवसाइट चाहारीसकेँ । सबै सेवा बन्द छ भन्छन् । कोरोना लाग्छ भनेर पसलेले पनि सामान ल्याउन मान्दैनन् । कोरोनाले भन्दा भोकले मरिन्छ जस्तो छ ।’

इमाडोलमा बस्दै आएकी सुमिना श्रेष्ठले अनेकौँ प्रयास गर्दा पनि खाद्यान्न किन्न नसकेपछि सोमबार बिहान सामाजिक सञ्जालमा सहयोग मागिन् ।

सरकारले कोरोना संक्रमणदर बढेको भन्दै १६ वैशाखदेखि लगाएको निषेधाज्ञा अझ कडा बनाउने गृहकार्यमा जुटेको छ । सर्वसाधारणलाई घरभित्रै थुनेको सरकारले अनलाइन डेलिभरीलाई अनावश्यक ठान्दै खुला गरेको छैन ।

अनलाइन डेलिभरी कम्पनीलाई सेवा प्रवाह गर्न नदिएपछि घरमै आइसोलेट हुने संक्रमित मारमा परेका छन् । संक्रमित भएर आइसोलेट भएका उनीहरू खाद्यान्न खरिदका लागि बाहिर निस्किन बाध्य छन् ।

बालुवाटार बस्दै आएका सुवास दाहाल संक्रमित भए पनि तरकारी, चामललगायत दैनिक उपभोग्य सामान ल्याइदिने कोही नभएपछि आफैँ कोठाबाहिर निस्कनुपरेको गुनासो गर्छन् । संक्रमित भएको पाँच दिनसम्म जसोतसो जोहो गरे पनि अहिले उनी आफैँ सामान ल्याउन विवश छन् ।

'सुरुमा जे भए पनि बाहिर निस्कन्नँ भनेर बसँ । कोरोनाले गलाउँदै गएको शरीरमा खानेकुरा पनि नहुँदा मरिने रहेछ । मर्नुभन्दा निस्कनु बेस भनेर निस्कन थालेँ’ उनले भने ।

संक्रमितहरू निस्किँदा संक्रमणको जोखिम थप बढ्ने खतरा बढेको छ । आइसोलेसनबाट संक्रमित बाहिरि आउनुपर्ने अवस्था र उपभोक्ताहरूले घर-घरमै सामान पाउने सुविधाबाट बञ्चित गरिँदा उपभोक्ता अधिकार हनन् भएको अधिकारकर्मी माधव तिम्सिना बताउँछन् ।

‘सरकारले नै अनलाइन डेलिभरी कम्पनीलाई सुरक्षाका सामान दिँदै होम डेलिभरीलाई सहज बनाउनु पर्ने हो । तर, हाम्रोमा समस्या देखिन्छ विकल्प खोजिँदैन’ उनी भन्छन् ।

सहज रूपमा खाद्यान्न होम डेलिभर गर्न नपाएपछि अधिकांश कम्पनीले सेवा बन्द गरेका छन् । फुडमाण्डुका ब्राण्ड एण्ड मार्केटिङ चिफ श्याममरत्न मालीले अत्यावश्यक सामान निःशुल्क डेलिभरी गछौँभन्दा पनि सरकारले सहयोग नगर्दा सेवा बन्द गर्नुपरेको गुनासो गर्छन् । ‘सुरक्षाका सम्पूर्ण मापदण्ड पालना गरेर खाद्यान्न घर-घरमा पुर्‍याउछौँभन्दा सरकारले दिएन,' माली दुखेसो गर्छन् ।

यता, निषेधाज्ञा सुरु भएसँगै निःशुल्क डेलिभरी सेवा सुरु गरेको ग्यापुले पनि सेवा पूर्ण रूपमा संचालन गर्न सकेको छैन । जिल्ला प्रशासन कार्यालयको अपुष्ट सूचनाले सहजरूपमा होम डेलिभरी गर्न नसकेको ग्यापुका मार्केटिङ म्यानेजर अभिमन्यु शर्माले बताए ।

उनले भने, ‘हामीले पीपीई लगाएर डेलिभरी गर्न जाँदा पनि बाटोमा समाउने काम भइरहेको छ । बिहान-बेलुका आफैँ जोखिम मोलेरै काम गरे पनि सरकारले कुनै सहयोग गरेको छैन ।’

भिडभाड रोक्न र संक्रमितलाई आइसोलेन केन्द्रबाट बाहिर आउन नदिनका निम्ति होम डेलिभरी सेवा सञ्चालनमा सरकारले सहयोग गर्नुपर्ने कम्पनीहरूको माग छ ।

यता, जिल्ला प्रशासन कार्यालयका प्रमुख जिल्ला अधिकारी कालीप्रसाद पराजुलीले डेलिभरी सर्भिसलाई व्यवस्थित बनाउने निर्देशिका जारी गर्ने तयारी भएको बताएका छन् ।

प्रकाशित मिति: मंगलबार, जेठ ११, २०७८ १५:५०