नयाँ पार्टी घोषणा गरेर ओलीविरुद्ध सशक्त प्रतिरोध गर्ने नेपाल समूहको तयारी

A+ A A-

एमालेले साधारण सदस्यबाटै निष्कासन गरेपछि माधवकुमार नेपाल समूहले नयाँ पार्टी घोषणाको तयारी गरेको छ । सोमबारको स्थायी कमिटी बैठकले नेता नेपाल र झलना खनालसहित ११ सांसदलाई कारबाही गरेपछि अब एमालेमा विभाजनको औपचारिक घोषणा मात्रै बाँकी छ ।

कारबाहीसँगै एमाले एक हुने स्थिति नरहेको नेताहरूले बताएका छन् । सोमबार बालुवाटारमा बसेको एमाले स्थायी कमिटी बैठकले नेता नेपाल, खनाल, भीम रावल, मुकुन्द न्यौपाने, निरादेवी जैरु, रामकुमारी झाँक्री, सरला यादव, पुष्पाकुमारी कर्ण, कलिना खान, लक्ष्मीकुमार चौधरी र कल्याणी खड्कालाई साधारण सदस्यसमेत नरहेन गरी निष्कासन गरेको छ ।

साधारण सदस्यबाट निष्कासित एमालेका पूर्वअध्यक्ष खनालले नयाँ पार्टी घोषणा गर्दै केपी ओलीको प्रतिगमनविरुद्ध सशक्त प्रतिरोध गर्ने बताए । ओलीको कदमविरुद्ध नयाँ पार्टी खोलेर संविधान र लोकन्त्रका पक्षधरहरूलाई समाहित गर्दै उनको प्रतिगमनको सशक्त प्रतिवाद गर्ने खनालले बताए ।

'पहिले नेकपालाई विभाजन गरेका ओलीले अहिले एमालेलाई पनि विभाजनको अवस्थामा पुर्‍याए । उनका कुकृत्यविरुद्ध हामी नयाँ पार्टी खोलेर सशक्त प्रतिवाद गर्छौं । कम्युनिस्ट आन्दोलनका गद्दार ओलीविरुद्ध सम्पूर्ण शक्ति लगाएर सशक्त कदमअघि बढाउँछौँ,' उनले भने ।

माधव समूहकी नेतृ अष्टलक्ष्मी शाक्यले ओत लाग्ने छानोसमेत नरहेपछि अब नयाँ पार्टीको विकल्प नरहेको बताइन् । धैर्यता गर्दै एमालेलाई बलियो बनाउने प्रयत्न गरे पनि संविधान र लोकतन्त्रमाथि ‌ओलीले बारम्बार प्रहार गरेपछि त्यसविरुद्ध प्रतिवादको विकल्प नरहेको उनको भनाइ छ ।

एमालेभित्रैबाटै प्रतिरोध गर्दा निष्कासन गरेपछि नयाँ पार्टी गठनको विकल्प नरहेको उनको मत छ । 'हामीलाई ओत लाग्ने छानोको आवश्यक्ता छ । एमालेबाट नेताहरू निष्कासित भएपछि नयाँ पार्टीको विकल्प छैन,' उनले भनिन् ।

त्यस समूहका अर्का नेता युवराज ज्ञवालीले एकताका लागि गठित कार्यदल ओलीको रामबहादुर थापा 'बादल'लाई निर्वाचनमा जिताउने चालबाजी रहेको पुष्टि भएको बताए । विरोधी आवाजलाई निषेध गरिरहेका ओलीले विभाजन नै चाहेको तथ्य सोमाबार नेता नेपाल र खनालसहित ११ जनालाई साधारण सदस्यबाट निष्कासन गरेपछि प्रमाणित भएको उनको भनाइ छ । 'उहाँले विवाद समाधान होइन स्पष्ट रूपमा पार्टी विभाजन चाहानुभएको कुरा आजको कारबाहीले छर्लङ्गै पारेको छ,' ज्ञवालीले भने ।

अध्यक्ष ओलीका गैरसंवैधानिक कदमको विरोध गर्नेहरूलाई एमालेमा ठाउँ नरहेको पुष्टि भएको उनको भनाइ छ । 'सदन विघटन गर्ने रणनीति लिएपछि हाम्रा साथीहरूले त्यसको विरोध जनाउनुभएको थियो । प्रतिनिधिसभा विघटनको विरोध गर्नेलाई एमालेमा स्थान छैन भन्ने कुरा प्रमाणित भयो । गलत कामलाई सही भन्दै हामीसँगै बस्ने कुरा हुँदैन,' उनले भने

यस्तै, साधारण सदस्यबाट निष्कासित नेतृ रामकुमारी झाँक्रीले अध्यक्ष ओलीले फुटवादलाई प्रश्रय दिएकाले यसको सशक्त प्रतिवाद गर्ने बताइन् । 'हामीले प्रतिगमनको विरोध गर्दा हामीलाई स्पष्टीकरणसमेत नपठाइकन कारबाही गर्नु भनेको फुटवादको निरन्तरता हो । अब पार्टी एकताको ढोका बन्द भएको छ । यसको कुनै न कुनै हिसाबले प्रतिरोध हुन्छ,' उनले भनिन् ।

नेता नेपालनिकट विद्यार्थी नेताले आइतबार नयाँ पार्टी दर्ताका लागि निवेदन दिइसकेका छन् । नेता जीवन राईले नेकपा एकीकृत दल दर्ताका लागि निवेदन दिएका हुन् । त्यसको चुनाव चिह्न कलम राखिएको छ ।

राष्ट्रियसभा निर्वाचनमा कलम चुनाव चिह्नमार्फत नेता नेपालनिकट डा. खिमलाल देवाकोटाले निर्वाचन जित्नु र निर्वाचन आयोगमा कलम चिह्नसहित दल दर्ता हुनुले नयाँ पार्टी गठनको प्रक्रिया प्रारम्भ भएको संकेत गर्छ । यद्यपि नेता राइले भने नेपालको निर्देशनमा पार्टी दर्ता नभएको बताए । 'नेता नेपालसँग यस विषयमा कुनै पनि सल्लाह भएको छैन । उहाँको निर्देशनमा पार्टी दर्ता भएको पनि होइन,' उनले भने ।

२३ फागुनमा सर्वोच्च अदालतले एमाले ब्युँताएपछि २८ फागुनमा अध्यक्ष ओलीले नवौँ महाधिवेशनबाट निर्वाचित सम्पूर्ण कमिटी भंग गरी महाधिवेशन आयोजक समिति गठन गरेका थिए । त्यसको विरोधमा माधव समूहले देशभर समानान्तर अभियान चलाएका थिए । उनीहरूले नयाँ पार्टी गठनको तयारी स्वरूप नै तल्लो तहबाट कमिटी निर्माण सुरु गरेको आरोप उनीहरूमाथि थियो । नयाँ पार्टी छिट्टै घोषणा हुने नेताहरूको भनाइ छ ।

प्रकाशित मिति: सोमबार, जेठ १०, २०७८ २१:१०