बैंकको स्किमः व्यवसाय गर्नेलाई बिनाधितो ३ लाख ऋण

A+ A A-

गरिमा विकास बैंकका प्रमुख कार्यकारी अधिकृत तथा नेपाल डेभलपमेन्ट बैंकर्स एसोसिएसनका अध्यक्ष गोविन्द ढकालले लगानी गर्ने रकम एक रुपैयाँ नहुनेले पनि व्यवसाय गर्न सक्ने बताएका छन् ।

शिलापत्रसँग कुरा गर्दै प्रमुख कार्यकारी अधिकृत ढकालले आफ्नो बैंकले कुनै पनि धितो नराखी ऋण दिने बताएका हुन् । व्यावसायिक सोच र योजना भएकालाई बैंकले केही पनि धितो नराखी (बिनाधितो) ३ लाख रुपैयाँसम्म ऋण दिने बताए ।

कसरी लिने त बिनाधितो ऋण ? प्रमुख कार्यकारी अधिकृत ढकाल यसो भन्छन्ः

गरिमा विकास बैंकले लघुवित्त कर्जाअन्तर्गत बिनाधितो ऋण दिन्छ । यस्तो ऋण ३ लाख रुपैयाँसम्मको हुन्छ । यो ऋण लिन व्यक्तिले एकजना जमानी बस्ने व्यक्ति लिएर हाम्रो बैंकको कुनै पनि शाखामा आए हुन्छ ।

ऋण लिएर व्यवसाय गर्ने सोच भएका व्यक्तिले गरिमा विकास बैंकको शाखामा आउँदा आफ्नो नागरिकता बोकेर आए हुन्छ । नागरिकताको फोटोकपी पनि बैंकले नै गरिदिन्छ । आफैंले फोटोकपी पनि ल्याए झन् उचित हुन्छ ।

बैंकमा आएपछि के गर्ने ?

बैंकमा आएपछि ऋण लिन चाहने व्यक्तिले बैंकको सोधपुछ कक्ष (रिसेप्सन)मा म यस्तो ऋण लिन आएको हुँ भनेर भन्नुपर्छ । अनि रिसेप्सनकै मान्छेले ऋण लिन आउने व्यक्तिलाई बैंकको सम्बन्धित व्यक्तिसँग भेट गराइदिन्छन् ।

लघुवित्त ऋण दिने शाखाको व्यक्तिसँग भेट भएपछि ऋण लिन चाहने व्यक्तिले एउटा फर्म भर्नुपर्छ । यस्तो फर्म बैंकमा नै हुन्छ । त्यो फर्म सर्वसाधारणले बुझ्ने खालको साधारण हुन्छ । ऋण लिन चाहने व्यक्ति लेखपढ गर्न सक्ने वा जान्ने छ भने आफैंले फर्म भर्दा हुन्छ ।

सामान्यतः बैंकमा पेस गरिने कागजात र ग्राहकको चेकमा बैंकका कर्मचारीको हस्ताक्षर हुनुहुँदैन । तर, गरिब नेपाली जो पढे लेखेको पनि छैन, ऊ व्यवसाय गरेर स्वरोजगार बन्न चाहन्छ भने हामी त्यस्तो व्यक्तिलाई सहयोग गर्न चाहन्छौं । त्यसैले ऋण फाराम भर्न पनि हाम्रा कर्मचारीले आवश्यक सहयोग गर्नेछन् ।

फाराम भरेर बैंकमा बुझाएपछि उसले चाहेअनुसारको ऋण दिने प्रक्रिया अगाडि बढ्छ । बैंकको सम्बन्धित शाखा म्यानेजरले नै ऋण स्वीकृत गर्ने अधिकार दिइएको छ । यस्तो ऋण लिन सम्बन्धित व्यक्तिले एकजना साक्षी राख्नुपर्छ । त्यसको व्यवस्था भने ऋण लिन चाहने व्यक्तिले नै गर्नुपर्छ । बाँकी सामूहिक जमानी वा धितो केही चाहिँदैन ।

कति वर्षलाई पाइने हो ऋण ? कति पर्छ ब्याज र किस्ता ?

यस्तो ऋण बैंकले बढीमा तीन वर्षसम्मलाई दिन्छ । ऋण लिएपछि तत्काल किस्ता तिर्न नथाले पनि हुन्छ । बैंकबाट लिएको ऋणले व्यापार गर्ने हो भने अर्काे महिनादेखि नै किस्ता तिर्न गाह्रो हुँदैन । तर, बाख्रा, कुखुरा, हास पालन, तरकारी खेती जस्ता उत्पादन गर्न समय लाग्ने खाले व्यवसाय गर्ने हो भने केही समय किस्ता तिर्न नसक्ने अवस्था पनि हुन सक्छ त्यसैले यस्तो ऋण लिएको ६ महिनापछिदेखि किस्ता तिर्दा (ग्रेस अवधि) हुने व्यवस्था मिलाएका छौं ।

यस्तो ऋणको ब्याज १६ प्रतिशत छ । बैंकले सावा र ब्याज नै किस्ताबन्दीका रुपमा लिने हो । कसैले ३ वर्षमा तिरिसक्ने गरी ३ लाख रुपैयाँ ऋण लिएको छ र त्यसको ब्याज १६ प्रतिशत हो भने ऋणीले मासिक १० हजार ५ सय ४७ रुपैयाँ ११ पैसा किस्ता तिर्नुपर्छ । यसो गर्दा तीन वर्षमा ऋणीले ३ लाखको ब्याज मात्रै ८० हजार २५ रुपैयाँ ८८ पैसा तिर्नुपर्छ ।

प्रकाशित मिति: बिहीबार, जेठ ९, २०७६ २३:१७