लोमान्थाङमा गाउँपालिकास्तरीय महोत्सव

फाइल तस्बिर

A+ A A-

मुस्ताङको लोमान्थाङमा गाउँपालिकास्तरीय महोत्सव र तिजी पर्वको भव्य तयारी भएको छ । उपल्लो मुस्ताङको मौलिक पहिचान, संस्कृति, सभ्यता, वेशभूषा, भौगोलिक विविधता, जैविक विविधता र उत्तरी कोरलानाकामा पर्यटक प्रर्वद्धन गर्न महोत्सव आयोजना गर्न लागिएको हो ।

मुस्ताङबाट निर्वाचित प्रदेशसभा सदस्य इन्द्रधारा विष्टले महोत्सवबाट उपल्लो मुस्ताङमा पर्यटन प्रवर्धन गर्न सहयोग पुग्ने बताए । उनका अनुसार महोत्सव तयारीका लागि अध्यक्ष सुवर्णकुमार विष्टको अध्यक्षतामा २५ सदस्यीय समिति र उपसमिति गठन भइसकेको छ ।

महोत्सवमा याक राइडिङ, पाहुनालाई गुफाभित्रै भोजन तथा आवासको व्यवस्थासहितको केभ रेस्टुरेन्ट र लज, घोडा दौड, स्थानीय वेशभूषासहितको मौलिक सांस्कृतिक झाँकी, स्थानीय खेलकुद प्रतियोगितालगायत विविधि सांस्कृतिक कार्यक्रम समावेश गरिएको छ ।

आगामी १६ देखि १९ जेठसम्म हुने महोत्सव उदघाटन उपप्रधानमन्त्री ईश्वर पोखरेलले गर्नेछन् ।

लोमान्थाङ गाउँपालिका तथा अन्नपूर्ण संरक्षण क्षेत्र आयोजना एक्यापले संयुक्त रुपमा महोत्सवको तयारी गरेका हुन् । यस वर्ष २० हजार पर्यटक महोत्सव अवलोकन गर्ने आयोजकको दाबी छ ।

त्यस्तै, उपल्लो मुस्ताङको लोमान्थाङमा ऐतिहासिक तिजी पर्व मनाइने भएको छ । तिजी पर्वको आयोजना र व्यवस्थापन लोमान्थाङको छोदे गुम्बाका लामाले गर्ने भएका छन् ।

हरेक वर्ष आयोजना हुने तिजी मेलालाई धार्मिक तथा ऐेतिहासिक पूजाका रूपमा लोक्षेत्र (लोछेदिन)अन्तर्गतका लोमान्थाङ र लोघेकर दामोदरकुण्ड गाउँपालिकाका स्थानीयले संयुक्त रूपमा पूजाआजा गर्ने चलन छ ।

तिजी पर्व दोर्जी स्युनु अर्थात् बज्राकिलायाको जीवन कथामा आधारित छ । उपल्लो मुस्ताङको लोमान्थाङमा १५औं शताब्दीदेखि तिजी पर्व मनाउँदै आएको छ ।

तिजी पर्व लोमान्थाङ–५ मा अवस्थित पूर्वराजाको दरबारमा तीन दिनसम्म देखाइन्छ ।

त्यस्तै, विष्टलेले तिजी मेलामा बुद्ध धर्म परम्पराअनुसार पूजापाठ तथा विभिन्न देवीदेवताको मुकुट पहिरिएर गुम्बाका लामाले फरक–फरक नृत्य प्रस्तुत गर्ने बताए ।

तिजी पर्वमा लामाबाट प्रस्तुत देवीदेवताको नृत्य अवलोकनबाट विश्वशान्ति र सुख प्राप्त हुनका साथै प्राकृतिक प्रकोप सामना गर्नु नपर्ने जनविश्वास छ ।

तिजी पर्व तीन दिनसम्म मनाइन्छ । पर्वको दोस्रो र अन्तिम दिन मुस्ताङी सांस्कृतिक राजा जिग्मे पलवर विष्ट दम्पतीले अवलोकन गर्ने जनाइएको छ ।

उपल्लो मुस्ताङको फरक भूगोल, तिब्बती कलात्मक वेशभूषा र संस्कृति नियाल्न आन्तरिक तथा बाह्य पर्यटक लोमान्थाङ पुग्छन् । गत वर्ष करिब ३ सय विदेशी पर्यटकले तिजी पर्व अवलोकन गरेको एक्याप लोमान्थाङले जनाएको छ ।

तिजी पर्व लोमान्थाङ बजारमा र महोत्सव लोमान्थाङ १ छोसेरको जोङ गुफामा हुनेछ ।

तिजी पर्व अवलोकनका लागि आउने धार्मिक तिर्थालुलाई महोत्सवले मन बहलाउने प्रशासकीय अधिकृत अर्यालले जनाए ।
तिजी पर्व दिउँसो १ बजेदेखि साँझ ५ बजेसम्म सञ्चालन हुनेछ ।

प्रकाशित मिति: बिहीबार, जेठ ९, २०७६ २२:५३