एनसेलले गर्‍यो सरकारी अस्पतालहरूलाई अक्सिजन कन्सन्ट्रेटर्स सहयोग

A+ A A-

एनसेल आजियाटा लिमिटेडले कोरोना भाइरसको संक्रमणले ल्याएको महामारीको जोखिम कम गर्न सरकारलाई सहयोग गर्दै आफूले हस्तान्तरण गर्ने १५० थानभन्दा बढी अक्सिजन कन्सन्ट्रेटर्समध्ये पहिलो लट स्वास्थ्य तथा जनसंख्या मन्त्रालयलाई हस्तान्तरण गरेको छ ।

कोभिड-१९ विरुद्ध स्वास्थ्य तथा जनसंख्या मन्त्रालयसँगको सहकार्यमा आफ्नो व्यावसायिक सामाजिक जिम्मेवारी अन्तर्गत एनसेलले १५० थानभन्दा बढी पोर्टेबल अक्सिजन कन्सन्ट्रेटर्स सहयोग गर्ने प्रतिबद्धता जनाएको छ ।

एनसेलका प्रमुख कार्यकारी अधिकृत एन्डी चोङ्ले शुक्रबार कम्पनीले प्रदान गर्ने अक्सिजन कन्सन्ट्रेटर्सको पहिलो लट अन्तर्गतका कन्सन्ट्रेटर्स स्वास्थ्य तथा जनसंख्या मन्त्रालयका प्रमुख विषेशज्ञ महेन्द्र प्रसाद श्रेष्ठलाई हस्तान्तरण गरेका छन् । कोरोना बिरामीको उपचारका लागि अक्सिजनको चरम अभाव खेपिरहेका जिल्लास्तरीय अस्पतालहरूमा यी कन्सन्ट्रेटर्स हस्तान्तरण गरिने छन् ।

'एनसेलबाट आएको यो अक्सिजन कन्सन्ट्रेटर्स सहयोगको हामी कदर गर्दछौं । अक्सिजनको चरम अभाव रहेको अहिलेको विषम परिस्थितीमा यी कन्सन्ट्रेटर्सले जीवन बचाउन एकदमै ठूलो महत्व राख्दछ,' स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले भने ।

'स्वास्थ्य तथा जनसंख्या मन्त्रालयसँगको सहकार्यमा एनसेलको व्यावसायिक सामाजिक जिम्मेवारी अन्तर्गत आएको यो सहयोगले गम्भीर बिरामी भई श्वासप्रश्वास प्रणालीमा समस्या झेलिरहका मानिसको जीवन बचाउन योगदान दिनेछ र साथै जिल्लास्तरका अस्पतालहरूको चिकित्सा पूर्वाधार विकासमा सहयोग पुर्याउने छ,' एनसेलका प्रमुख कार्यकारी अधिकृत चोङ्ले भने, 'देशका जनताहरूलाई सेवा प्रदान गर्ने हाम्रो कार्यलाई निरन्तरता दिँदै यस महामारीको समयमा अमूल्य जीवन बचाउन सहयोग पुर्‍याउने हेतुले हामी अस्पतालहरूलाई १५० थानभन्दा बढी अक्सिजन कन्सन्ट्रेटर्स प्रदान गर्दैछौँ । एक जिम्मेवार कर्पोरेट नागरिकका रुपमा महामारी सुरु भएलगतै गत वर्ष हामीले सरकारद्वारा स्थापित कोरोना भाइरस (कोभिड–१९) संक्रमण रोकथाम, नियन्त्रण तथा उपचार कोषमा १० करोड रुपैयाँ योगदान गर्‍यौं । कोभिड प्रतिकार्य अन्तर्गत नै हामीले धुलिखेल अस्पतालसँगको सहकार्यमा एनसेल कोभिड–१९ हटलाइन सेवा पनि सुरु गरिसकेका छौँ । यसले चौबीसै घण्टा स्वास्थ्य परामर्श दिनुका साथै घरमै आइसोलेसन बसेका सबैलाई दिनहुँ स्वास्थ्य परामर्श प्रदान गर्दछ ।'

एनसेल कोभिड–१९ हटलाइन सेवा ९८०५५५४५०० मा फोनगरि कोरोनाभाइरस रोग सम्बन्धी कुनै पनि जिज्ञासा भए हटलाइनमार्फत चिकित्सक तथा स्वास्थ्यकर्मीसँग निःशुल्क स्वास्थ्य परामर्श लिन सकिन्छ । साथै धुलिखेल अस्पतालमा स्थापना भएको हटलाइनको कल सेन्टरले देशभरि घरमै आइसोलेसनमा बसेका बिरामीलाई दैनिक निःशुल्क स्वास्थ्य परामर्श पनि प्रदान गर्दछ ।

कोरोना महामारीको विषम परिस्थितिमा ग्राहकको बढ्दो सञ्चारको आवश्यकतालाई ध्यानमा राख्दै एनसेलले डेटा प्याकमा बोनस, वर्क फ्रम होम प्लानहरू, डिजिटल प्लाटफर्मबाट सेवाहरू खरिद गर्दा बोनस डेटा, सापटी सेवामा थप विकल्पहरू, जस्ता विभिन्न राहत प्याकहरू ग्राहकका लागि ल्याएको छ ।

आफ्ना कर्मचारी कल्याणका लागि संचालित अभियान अन्तर्गत एनसेलले यो कठिन समयमा आफ्ना कर्मचारीहरूलाई विषेश होम केयर सहयोग पनि प्रदान गर्दै आएको छ । कम्पनीले इमरजेन्सीका बेलामा काठमाडौंभित्र र जिल्लामा रहेका कर्मचारीहरूलाई तत्काल अक्सिजन कन्सन्ट्रेटर्स, ह्वील चेयर र स्ट्रेचर उपलब्ध गराउँदछ । यसका साथै कम्पनीले आफ्ना कर्मचारीहरूलाई मास्क, स्यानिटाइजरको व्यवस्था गर्नुका साथै उनीहरूलाई आवश्यक परेको खण्डमा औषधिहरू घर—घरमै डेलिभरी गरिदिने व्यवस्था पनि गरेको छ ।

कम्पनीले डाक्टर तथा सम्बन्धित क्षेत्रका विज्ञहरूलाई भर्चुअल सेसनमार्फत कोभिड-१९ को लक्षण, बच्ने उपाय तथा त्यसको उपचार, फोक्सोको कार्य सुधार गर्ने तथा शरीरमा तनावको स्तर कम गर्ने विविध विषयमा कार्यक्रमहरू पनि संचालन गरेको छ ।

एनसेलको सामाजिक पहल अन्तर्गत एनसेलले स्वास्थ्य तथा जनसंख्या मन्त्रालयसँगको सहकार्यमा गत वर्षदेखि नै कोरोनाबाट बच्ने जनस्वास्थ्यसम्बन्धी जनसचेतना अभिवृद्धिका सन्देशहरू विभिन्न माध्यमहरूबाट प्रवाह गर्दै आएको छ । सन् २०२० मा एनसेलले कोभिड प्रतिकार्य अन्तर्गत कोरोना भाइरस संक्रमण रोकथाम, नियन्त्रण तथा उपचार कोषमा १० करोड योगदानसहित गरी ९.७० अर्ब रुपैयाँ बराबरको सेवा, सुविधा र योगदान पुर्‍याएको थियो ।

कोरोनाको दोस्रो लहरले सिर्जना गरेको कठिन परिस्थितिमा आफ्ना ग्राहकहरूको सञ्चार सेवाको आवश्यकता परिपूर्ति गर्न तथा उनीहरूलाई सहजै सम्पर्कमा रहिरहन सघाउन एनसेलले प्रत्येक रिचार्जमा बोनस, डेटा सेवामा आकर्षक बोनस, घरबाटै काम गर्न र अनलाइन कक्षाका लागि प्याकहरू र एनसेल सापटीमा विभिन्न थप सुविधालगायतका राहत अफरहरू प्रदान गर्दै आएको छ ।

प्रकाशित मिति: शनिबार, जेठ ८, २०७८ १४:५१