विपक्षी दलहरूको आक्रोश : प्रधानमन्त्री र राष्ट्रपतिको 'जालसाजी'मा मध्यरातमा संसद् विघटन

विपक्षी दलहरूको आक्रोश : प्रधानमन्त्री र राष्ट्रपतिको 'जालसाजी'मा मध्यरातमा संसद् विघटन

फाइल तस्वीर

A+ A A-

संविधानको धारा ७६ को ५ अनुसार सरकार गठनलाई मान्यता नदिएर राष्ट्रपति विद्यादेवी भण्डारीले प्रतिनिधिसभा विघटनको संवैधानिक बाटोलाई खुला गरिन् । त्यसपछि मध्यरातमा मन्त्रिपरिषद्को बैठक राखेर प्रधानमन्त्री केपी ओलीले प्रतिनिधिसभा विघटन सिफारिस गर्दै मध्यावधि निर्वाचन घोषणा गरे ।

मध्यरातमा डाकिएको आकस्मिक मन्त्रिपरिषद् बैठकले प्रतिनिधिसभा विघटन गर्न र २६ कात्तिक र ३ मंसिरमा मध्यावधि निर्चाचन गर्न राष्ट्रपितलाई सिफारिस गर्‍यो । मन्त्रिपरिषदले सिफारिस गरेलगत्तै राष्ट्रपति भण्डारीले त्यसलाई सदर गरिन् ।

यो प्रक्रियालाई विपक्षी दललहरूले प्रधानमन्त्री ओली र राष्ट्रपति भण्डारीले मध्यरातमा 'जालसाजी' गरेको आरोप लगाएका छन् । नेपाली कांग्रेसका सह-महामन्त्री प्रकाशरण महतले प्रधानमन्त्रीको संसद विघटनको अभिष्टलाई राष्ट्रपति भण्डारीले जालसाजी गर्दै पूरा गरेको प्रतिक्रिया दिए ।

‘राष्ट्रपतिले संसद् विघटन गर्ने प्रधानमन्त्री ओलीको आशयलाई जालसाजी ढंगले पूरा गर्नुभयो । उहाँले नयाँ सरकार गठन हुन सक्ने आधार हुँदाहुँदै मुलुकलाई मध्यावधि निर्वाचनमा लाने कामको कांग्रेसले भर्त्सना गर्छ,’ उनले भने ।

त्यस्तै, कांग्रेस प्रवक्ता विश्वप्रकाश शर्माले राष्ट्रपति र प्रधानमन्त्रीबा संविधानमाथि सामूहिक बलात्कार भएको टिप्पणी गर्दै महाव्याधिका बेला मध्यावधिको रंगिन सपना महँगो पर्ने चेतावनी दिएका छन् ।

'बुझिराख्नु राष्ट्रपति महोदया र कमरेड प्रधानमन्त्रीजी, महाव्याधिका बेला मध्यावधिको रंगीन सपना महँगो पर्नेछ । संविधानको सामूहिक बलात्कारको दुश्परिणाम महँगो पर्नेछ' उनले ट्विट लेखेका छन् ।

यस्तै, कांग्रेस नेता रमेश लेखेकले राष्ट्रपति र प्रधानमन्त्री मिलेर संविधान च्यात्ने काम गरेको बताएका छन् । राष्ट्रपितबाट संविधान र लोकतन्त्रको रक्षा हुन नसकेको उनको टिप्पणी छ । 'राष्ट्रपतिजीले फेरि आफ्नो पदको सम्मान, मर्यादा र गरिमा समाप्त गर्दै संविधान च्यात्ने काम गरिन् । यीनबाट गणतन्त्र र लोकतन्त्रको संरक्षण हुन सक्दैन' सामाजिक सञ्जालमा उनको भनाइ छ ।

यस्तै, माओवादी केन्द्रका नेता वर्षमान पुन 'अनन्त'ले राष्ट्रपति र प्रधानमन्त्रीले मध्यरातमा डकैती गरेको आरोप लगाएका छन् । राष्ट्रपतिबाट शाहीकालको जस्तै मध्यरातमा कदम चालिएको उनको भनाइ छ । ‘ज्ञानेन्द्रले पनि मध्यरात शुक्रबार रोज्थे । राष्ट्रपतिले मध्यरातमा डकैती गर्नुभयो,’ उनको ट्वीट थियो ।

उनले नेपालीले आफ्नो संविधान बनाएको मन नपराउने शक्तिको डिजाइनको गोटी ओली बनेको र ओलीको गोटी राष्ट्रपति बनेको तर्क गरे । उनले राष्ट्रपति र प्रधानमन्त्रीबाट संविधान च्यातेर लोकतन्त्रमाथि प्रहार गर्ने काम गरेको भन्दै जनभावना कुल्चेर घोषणा गरिएको चुनावले खती हुने चेतावनी दिए ।

राष्ट्रपति भण्डारीले प्रधानमन्त्री दाबी गरेका एमालेका अध्यक्ष ओली र नेपाली कांग्रेसका सभापति शेरबहादुर देउवा दुवैको दाबी नपुग्ने ठहर गर्दै दाबी अस्वीकार गरेकी थिइन् । राष्ट्रपति कार्यालयले मध्यरातमा जारी गरेको विज्ञप्तिमा संविधानको धारा ७६ को उपधारा ५ बमोजिम दुवै दाबी नपुगेको उल्लेख छ ।

दाबीकर्ता दुवै प्रतिनिधिसभा सदस्यका समर्थक भनिएका सदस्य एकार्कामा दोहोरो परेको, दलको निर्णय विपरीत एकले अर्कालाई समर्थन गरेको र सम्बन्धित दलले मान्यता नदिन लेखिआएको तथा संविधानको धारा ८९ एवं राजनीतिक दलसम्बन्धी ऐन, २०७३ लाई ध्यानमा राख्दा दुवैले विश्वास प्राप्त गर्न सक्ने ठोस आधार नदेखिएकाले दाबी अस्वीकार भएको विज्ञप्तिमा भनिएको छ ।

प्रकाशित मिति: शनिबार, जेठ ८, २०७८ ०१:५६