यी श्रीमान् जसले ८ घण्टा पिठ्यूँमा बोकेर अस्पताल पुर्‍याए कोरोना संक्रमित श्रीमती

यी श्रीमान् जसले ८ घण्टा पिठ्यूँमा बोकेर अस्पताल पुर्‍याए कोरोना संक्रमित श्रीमती

A+ A A-

कालीकोटकी एक कोरोना संक्रमित महिलालाई उनका श्रीमानले ८ घण्टा पिठ्यूँमा बोकेर सदरमुकाममा रहेको कोभिड अस्पताल पुर्‍याएका छन् ।

सोमबार कालीकोटको नरहरिनाथ गाउँपालिका– ६ की भरु बिकलाई उनका श्रीमान् गज्जे बिकले पिठ्यूँमा बोकेर ८ घण्टामा कालिकोटको सदरमुकाममा रहेको कोभिड अस्पतालमा भर्ना गराएका हुन् ।

यातायातको सुविधा नभएको नरहरिनाथ गाउँपालिकाबाट कर्णाली राजमार्गसम्म गज्जेले श्रीमतीलाई पिठ्यूँमा नै बोकेर ल्याएका थिए । राजमार्गमा पनि सवारीसाधन नपाउँदा बोकेर नै सदरमुकाम ल्याएको गज्जेले बताए ।

दमको रोगी रहेकी आफ्नी श्रीमतिलाई गाउँमा दमले बढी च्यापेपछि सदरमुकाममा रहेको अस्पतालमा बोकेर नै ल्याएको गज्जेले बताए ।

‘पहिलादेखि नै यो दमको रोगी थिई । गाउँमा बिरामले च्यापेपछि सदरमुकाममा ल्याएको हुँ,’ उनले भने, ‘दमको रोग बढेपपछि गाउँमा कोरोना संक्रमित होली भनेर कसैले सहयोग नगरेका कारणले आफू एक्लैले सदरमुकाम ल्याएको हुँ ।’

मान्म सदरमुकाममा रहेको कोभिड अस्पतालमा चेकजाँच गर्दा उनमा कोरोना पोजिटिभ देखिएको कोभिड अस्पतालका प्रमुख डा. राजकमल कार्कीले बताए ।

‘उहाँले श्रीमतिलाई बोकेर अस्पतालमा पुर्याउनु भएको हो,’ कार्कीले भने, ‘उहाँमा दम रोग रहेछ । अक्सिजनको मात्र कम रहेको छ । उहाँको उपचार अहिले अक्सिजन दिएर भइरहेको छ ।’

हवाई उद्दारबारे जानकारी भएन

स्थानीय तथा जिल्ला तहका अस्पतालहरूले कोरोना संक्रमितका बिरामी एम्बुलेन्स र कर्णाली प्रदेश सरकारले दुर्गमका कोरोना संक्रमितका जटिल बिरामीलाई हेलिकप्टरबाट उद्दार गर्ने निर्णय गरेको भए पनि गज्जेले त्यसबारे जानकारी नभएको बताए ।

‘त्यो कुरा त ठूलाबडालाई थाहा होला । म गाउँमा बस्ने साधारणलाई के थाहा ?’ उनले भने, ‘वडा अध्यक्षले बोकेर मान्म कोरोना अस्पतालमा लैजा भन्नुभयो । त्यही आधारमा ल्याएको हुँ ।’

कर्णाली प्रदेश सरकार र स्थानीय तहले कोरोना संक्रमितका बिरामीलाई उपचार तथा उनीको उद्दारका लागि बिभिन्न नीति नियम बनाएको भए पनि दुर्गम तथा पिछडिएका सर्वसाधारणले त्यसको सहुलियत प्रयोग गर्न सकेका छैनन् ।

गाउँमा केही नहुँदा सदरमुकाम जान भनेको हुँ : वडाअध्यक्ष तुलाराज बिक

उहाँ पहिलादेखि नै गाउँमा दमको बिरामी हुनुहुन्थ्यो । गाउँमा अरु पनि रुघाखोकी तथा ज्वरोका बिरामी रहेका छन् । गाउँपालिकामा कोरोना चेकजाँचका लागि ५० वटा किट मात्र आएका छन् । उहाँमा जटिल समस्या देखिएपछि गाउँको भन्दा सदरमुकाममा रहेको कोभिड अस्पतालमा राम्रो उपचार होला भनेर लैजान भनेको हो ।

मेरो वडामा एक हजार जनसंख्या रहेका छन् । त्यसमध्ये करिब १ सयभन्दा बिरामी छन् । गाउँपालिकामा ५० वटा कोरोना चेकजाँच गर्न किट आएको जानकारी पाएको छु । उहाँमा जटिल खालको समस्या देखिएका कारणले उपचारका लागि सदरमुकाममा जान भनेको हुँ ।

कर्णाली प्रदेश सरकारले हवाई उद्दार लगाएतका अन्य उपचारका लागि निःशुल्क गर्ने भनेको भए पनि त्यसको प्रक्रियाबारे खासै थाहा छैन । प्रक्रिया झन्झटिलो होला भनेर उहाँको जटिल अबस्था देख्दा सदरमुकाम लैजान भनेको हुँ ।

प्रकाशित मिति: शुक्रबार, जेठ ७, २०७८ ०७:४८