बहुमतको सरकार बनाउन ओलीले नागरिकतासम्बन्धी अध्यादेश ल्याउँदै, संविधान संशोधन कार्यदल पनि बनाउने

बहुमतको सरकार बनाउन ओलीले नागरिकतासम्बन्धी अध्यादेश ल्याउँदै, संविधान संशोधन कार्यदल पनि बनाउने

A+ A A-

बिहीबार मन्त्रिपरिषद् बैठक सकिएलगत्तै प्रधानमन्त्री केपी शर्मा ओलीलाई भेट्न जसपाका अध्यक्ष महन्थ ठाकुर र नेता राजेन्द्र महतो बालुवाटार पुगे । उनीहरूबीच संविधानको धारा ७६ को उपधारा ५ अनुसार सरकार गठनको विषयमा छलफल केन्द्रीत थियाे ।

नागरिकता र संविधान संशोधनका एजेण्डामा प्रधानमन्त्री केपी ओली ठाकुर र महतोको फेस सेभिङका लागि नयाँ निर्णय पनि गर्न लागेका छन् । यी दुई मुद्दा ओलीले सम्बोधन गरेलगत्तै ठाकुर र महतो प्रधानमन्त्री ओलीलाई समर्थन गर्ने तहमा पुग्नेछन् ।

५ जेठमा ठाकुर र उपेन्द्र यादवको ७ बुँदे समझदारी त्यसै दिन विवादमा आइसकेका कारण उक्त समझदारी अनुसार सर्वदलीय वा आफ्नो नेतृत्वको सरकार बनाउन ठाकुर र महतोले पहल नगर्ने जसपाका एक नेताले बताए । ठाकुरनिकट ती नेताका अनुसार एमालेका माधव नेपाल पक्षलाई साथमा लिई ठाकुर र महतो पक्षका सांसदको समेत समर्थनमा बहुमतको सरकार बनाउने प्रयासमा छन् ।

एमालेसँग १ सय २१ सिट छ । ठाकुर र महतो पक्षमा २० जना सांसद रहेको बताइएको छ । त्यसो हुँदा ओलीसँग १ सय ४१ सिट हुनेछ । अहिले संसदमा विद्यमान संख्याका आधारमा १ सय ३६ सिट भए बहुमत पुग्छ ।

त्यसैले ओलीले संविधानको धारा ७६ को उपधारा ५ अनुसार बहुमतको सरकार बनाउने प्रयासमा लागेका छन् । त्यसका लागि ठाकुर र महतोले भनेअनुसार नागरिकता र संविधान संशोधनसम्बन्धी दुई काम गर्दैछन् ।

नागरिकतासम्बन्धी अध्यादेश राष्ट्रपति कार्यालयमा

सरकारले मधेस केन्द्रित दलका नेताहरूले उठाएझैँ नागरिकतासम्बन्धी मुद्दा सल्टाउने गरी अध्यादेश तयार गरेको छ । र, त्यो अध्यादेश राष्ट्रपति कार्यालयमा पठाइसकेको छ । तर, राष्ट्रपति कार्यालयबाट जारी भने भइसकेको छैन ।

गत सोमबारको मन्त्रिपरिषद् बैठकले तीनवटा अध्यादेश ल्याउने निर्णय गरेको थियो । त्यसदिन छलफल भएकामध्ये शपथ ग्रहणसम्बन्धी र कोराना संकट व्यवस्थापनसम्बन्धी अध्यादेश जारी भएको छ । एक मन्त्रीले शिलापत्रलाई दिएको जानकारी अनुसार बिहीबार राष्ट्रपतिबाट नागरिकतासम्बन्धी अध्यादेश जारी भएन ।

ती मन्त्रीले भने ‘सोमबारको मन्त्रिपरिषद् बैठकमा तीनवटा अध्यादेश ल्याउने विषय टुंगो लागेको थियो तर, नागरिकतासम्बन्धी आएन सायद राष्ट्रपतिले अध्ययन गर्दै हुनुहुन्छ होला ।’

नागरिकतासम्बन्धी अध्यादेशमा दुईवटा मुद्दालाई जोडिएको पनि ती मन्त्रीले जानकारी दिए । ती मन्त्रीका अनुसार जन्मसिद्ध नागरिकता लिएका बाबुआमाका सन्तानलाई बंशजको नागरिकता दिने र नेपालमा जन्मेर बसोवास गरिरहेका तर आमाबाबु पत्ता नलागेकाहरूलाई पनि जन्मसिद्द नागरिकता उपलब्ध गराउने गरी अध्यादेश तयार गरिएको छ ।

संविधान संशोधनसम्बन्धी कार्यदल

प्रधानमन्त्री केपी ओली जसपाका नेताहरू ठाकुर र महतोको माग अनुसार संविधान संशोधनसम्बन्धी कार्यदल बनाउन सहमत भएका छन् ।

जसपाका एक नेताका अनुसार बिहीबारको मन्त्रिपरिषद् बैठकबाट संशोधनका लागि विज्ञहरू सम्मिलित कार्यदल बनाउने आश्वसन प्रधानमन्त्री ओलीले दिएका थिए । नागरिकतासम्बन्धी अध्यादेश र कार्यदल एकसाथ आउने ओलीको भनाइ थियो । एक मन्त्रीका अनुसार मन्त्रिपरिषद् बैठकमा उक्त कार्यदलबारे भने छलफल भएन ।

प्रकाशित मिति: बिहीबार, जेठ ६, २०७८ २०:५२