कोसीमा ६१ शय्याको कोभिड अस्पताल सञ्चालनमा, पहिलो दिन राखियो जटिल लक्षणका तीन संक्रमित

कोसीमा ६१ शय्याको कोभिड अस्पताल सञ्चालनमा, पहिलो दिन राखियो जटिल लक्षणका तीन संक्रमित

A+ A A-

विराटनगरस्थित कोसी अस्पतालमा भेन्टिलेटरसहित ६१ शय्याको कोभिड अस्पताल सञ्चालनमा ल्याइएको छ । कोसी अस्पताल परिसरभित्र छुट्टै भवनमा भेन्टिलेटरसहितको कोभिड अस्पताल बुधबारबाट सञ्चालनमा ल्याउने भनिए पनि तयारी नपुगेकाले बिहीबारबाट दिउँसोदेखि मात्र सञ्चालनमा ल्याइएको हो ।

बिहीबारबाट सञ्चालनमा ल्याइएको सो अस्पतालको पहिलो दिन जटिल लक्षण देखिएका तीन जना संक्रमितलाई भर्ना गरेर उपचार सुरु गरिएको कोसी अस्पतालका मेडिकल सुपरिटेन्डेन्ट डा. चुमनलाल दासले जानकारी दिए ।

‘क्रिटिकल केस तीनवटा भर्ना गरिएको छ । अरु पनि आइसोलनमा बसेका लाइनमा छन्,’ उनले शिलापत्रसँग भने, ‘अन्य छ/सात जना क्रिटिकललाई पनि भर्ना गर्न लागेका छौँ । त्यसपछि ननक्रिटिकललाई पनि हाल्छौँ ।’

उनले अन्य संक्रमितलाई पनि क्रमशः राख्दै जाने बताए । मेसु दासले उनले जटिल संक्रमितलाई पहिले भर्ना गरिसकेर मात्र अन्यलाई भर्ना लिइने बताए । ‘एकै पटक सबै बेडमा बिरामी राख्दा व्यवस्थापन गर्नै समस्या हुन्छ,’ उनले भने, ‘मिल्दै जान्छ, बिरामी भर्ना गर्दै जान्छौँ ।’

प्रदेश राजधानी विराटनगरमा तीव्र गतिमा कोरोना संक्रमण बढ्दै गएको र कोभिड अस्पतालमा शय्याको अभाव भएर जटिल लक्षण भएका संक्रमितको उपचारमा समस्या भएपछि कोसी अस्पतालले संक्रमितको उपचार गर्न छुट्टै संरचना तयार गरेको हो ।

अस्पतालमा पाँच शय्याको भेन्टिलेटरसहित, २४ शय्याको आईसीयू र ३२ अक्सिजनसहितको बेड रहने मेसु दासले जानकारी दिए । उनका अनुसार अस्पतालको मेडिकल कक्ष र ग्राउण्ड फ्लोरको पोस्टनेटल वार्डलाई कोभिड अस्पतालको रूपमा सञ्चालन गरिएको हो ।

मेसु दासले कोसी अस्पतालमा कार्यरत चिकित्सकको टोलीले नै संक्रमितको उपचार गर्ने बताए । ‘मेडिकलतिर डा. दिनेश न्यौपाने र क्रिटिकलतिरको डा. प्रवीण झा नेतृत्वमा संक्रमितको उपचार सुरु गरिएको छ । त्यसको नेतृत्व गर्ने जिम्मेवारी उहाँहरूलाई दिएका छौँ,’ उनले भने, ‘उहाँहरूकै नेतृत्वको स्वास्थ्यकर्मीको टोलिले संक्रमितको उपचार गर्नेछ ।’

योसहित विराटनगरमा प्रदेश सरकार मातहतको कोसी कोभिड उपचार केन्द्र, निजी क्षेत्रको नोबेल शिक्षण अस्पताल र बुढीगंगा गाउँपालिकास्थित विराट शिक्षण अस्पतालले संक्रमितको उपचार गरिरहेका छन् ।

प्रकाशित मिति: बिहीबार, जेठ ६, २०७८ १६:१६