जलविद्युत् कम्पनीले आयोगको पूर्वस्वीकृति नलिई आईपीओ जारी गर्न नपाउने

A+ A A-

जलविद्युत् कम्पनीले विद्युत् नियमन आयोगको स्वीकृति नलिई सार्वजनिक निष्कासन (आईपीओ) जारी गर्न नपाउने भएका छन् ।

विद्युत् नियमन आयोग स्थापना भई काम थालेकोले नियमक निकायबाट स्वीकृति लिएर मात्रै आईपीओ जारी गर्ने स्वीकृतिका लागि आउन धितोपत्र बोर्डले भनेको छ ।

बोर्डले विज्ञप्ति जारी गर्दै नयाँ कम्पनी र आईपीओ जारी गर्ने स्वीकृतिका लागि बोर्डमा पेस भएका कम्पनीको हकमा पनि नयाँ व्यवस्था लागू हुने जानकारी गराएको छ ।

‘हालसम्म विद्युत् क्षेत्रमा प्रत्यक्ष नियमन निकायको अभाव भइरहेकोमा नेपाल सरकारले विद्युत् नियमन आयोग ऐन र सोसम्बन्धी विद्युत् नियमन आयोग नियमावली कार्यान्वयनमा ल्याइसकेको छ । जलविद्युत् कम्पनीको सार्वजनिक निष्कासनका लागि बोर्डमा निवेदन पेस गर्दा तथा निवेदन दिई स्वीकृत हुन बाँकी रहेका कम्पनीले समेत विद्युत् नियमन आयोगको पूर्वस्वीकृति पेस गर्नुपर्ने व्यवस्था गरिएको छ,’ बाेर्डले जारी गरेको विज्ञप्तिमा भनिएको छ ।

आयोगले आफ्नो पूर्वस्वीकृति नलिएका कम्पनीलाई आईपीओ जारी गर्ने अनुमति नदिन बोर्डलाई पत्राचार गरेको थियो । आयोगको पत्रपछि बोर्डले यस्तो व्यवस्था गरेको हो । विद्युत् उत्पादन, प्रसारण, वितरण वा व्यापारको काम गर्न अनुमति प्राप्त कम्पनी वा संस्थाले सार्वजनिक रुपमा सेयर निष्कासन गर्न विद्युत् नियमन आयोगको पूर्वस्वीकृति लिनुपर्ने व्यवस्था गरिएको छ ।

जलविद्युत् क्षेत्रको नियमन निकायको स्थापनासँगै उक्त आयोगले जलविद्युत् कम्पनीको सार्वजनिक निष्कासनको आवश्यकता, संस्थागत सुशासनलगायतका विषयमा नियमन गर्ने देखिएकोले जलविद्युत् क्षेत्रमा लगानी गर्ने लगानीकर्ताको हित संरक्षणमा थप मद्दत पुगी धितोपत्र बजार थप प्रभावकारी तथा विश्वसनीय हुने बोर्डको विश्वास छ ।

प्रकाशित मिति: बिहीबार, जेठ ९, २०७६ ०३:४७