'टेम्पोलाई एम्बुलेन्स बनाए बिरामी अस्पताल जान पाएर बाँच्थे, हामी खान पाएर बाच्ने थियौँ'

'टेम्पोलाई एम्बुलेन्स बनाए बिरामी अस्पताल जान पाएर बाँच्थे, हामी खान पाएर बाच्ने थियौँ'

A+ A A-

निषेधाज्ञाको २० दिन । हरेक दिन सडकमा कोही गाडामा कोही काँधमा त कोही रिक्सामा बिरामीलाई अस्पताल लगिरहको दृश्य देखिन्छ । त्यति मात्र नभएर बिरामी साह्रै भयो भन्दै सडकमा गाडी पर्खिने पनि उत्तिकै भेटिन्छन् ।

अन्य समय हुँदो हो त सिन्धुपाल्चोककी शान्ति क्षेत्री ती दृश्य देख्नेबित्तिकै बिरामी बोकेर अस्पतालसम्म पुर्‍याउन तम्सिन्थिन् । तर, कोरोना संक्रमण बढेको भन्दै सरकाले निषेधाज्ञा लगाएपछि उनी हरेक दिन यस्ता दृश्यकी साक्षी बन्दै आएकी छन् ।

घरमा टेम्पो थन्किएको र बाहिर बिरामी अस्पताल पुर्‍याउने साधन नपाएर छटपटिएको देख्दा उनी भक्कानिन्छन् । भन्छिन्, ‘सहयोग गर्न जाऊ पुलिसले पक्रने, नजाउँ खिया लागेको टेम्पो र सकिँदै गरेको जिन्दगी हेर्नुपर्ने ।’

अझ टेम्पो चलाएर तिर्ने भन्दै बैंकबाट लिएको एक लाख ऋणको पहिले किस्ता पनि तिर्न पाएकी छैनन् ।

खाली टेम्पोले भविष्यको दुर्दशा र सडकको दृश्यले काहालीलाग्दो जीवन देखाउँछ उनलाई । अखबारमा बिरामी बोक्ने एम्बुलेन्स नपाएर कैयौँ मानिस मरे अनि कहीँ टेम्पोलाई नै एम्बुलेन्स पनि बनाएको खबर पढ्छिन् ।

‘रित्तै थन्किएको छ टेम्पो, छाक टार्ने पैसा छैन । बरु एम्बुलेन्सको काम गर्न दिए हुन्थ्यो नी ?,’ उनी भन्छिन्, ‘बिरामी सजिलै अस्पताल जान पाएर बाँच्थे हामी खान पाएर बाच्ने थियौँ ।’

२०६७ सालदेखि काठमाडौंको कोटेश्वर-लगनखेल रुटमा टेम्पो चलाउँदै आएकी शान्ति सरकारले संकटलाई समस्याका रूपमा मात्र हेरेको गुनासो गर्छिन् । ‘संकट छ हामी पनि बुझ्छौँ,’ उनी भन्छिन्, ‘तर वैकल्पिक योजना ल्याउन किन चुक्यो ? हामी आफैँ सुरक्षित भएर बिरामीलाई ओसारपोसार गर्छौंभन्दा कानमा तेल हालेर बसेको छ । यसरी बिरामी पनि मर्छन् हामी पनि मर्छौं ।’

शान्तिजस्तै बिन्दा थपलिया पनि घरमा थन्किएको टेम्पो बिरामी बोक्न प्रयोग गर्न आग्रह गर्छिन् । थपलिया र उनका श्रीमान् दुवै टेम्पो चलाउने भएकोले निषेधाज्ञासँगै उनीहरूका दुवै टेम्पो थन्किएका छन् । सरकारले चलाउन अनुमति दिए घरघरै पुगेर बिरामी ओसार्नेदेखि औषधि पुर्‍याउने काम पनि गर्न सक्ने उनीहरूको भनाइ छ ।

यतिबेला टेम्पो व्यवसायी विभिन्न संघसंगठनको पहलमा टेम्पोलाई एम्बुलेन्सको काम गर्न दिन सरकारलाई आग्रह गर्दैछन् । उपत्यकाबाहिर संचालनमा आइसके पनि उपत्यकामा भने टेम्पोलाई पनि एम्बुलेन्सको विकल्प बनाउन उपत्यकाका तीनै स्थानीय तह तातेका छैनन् ।

अखिल नेपाल यातायात मजदुर संघका अध्यक्ष रामचन्द्र कार्की सीडीओ कार्यलयमा समेत कुरा राखे पनि कुनै प्रतिक्रिया नआएको बताउँछन् । ‘हामी सुरक्षित भएर बरु थोरै पैसामा एम्बुलेन्सको काम गर्न सक्छौँ भनेर बारम्बार जिल्ला प्रसासन कार्यलयमा कुरा राखेका छौँ,’ अध्यक्ष कार्की भन्छन्, ‘अनुमति पाए काम गर्न तयार छौँ ।’

प्रकाशित मिति: बुधबार, जेठ ५, २०७८ १७:४६