सांसद खिमविक्रमको रिपोर्ट पोजिटिभ निकाल्ने ल्याबका सञ्चालक बने डिन

A+ A A-

पोखरा विश्वविद्यालयको स्वास्थ्य विज्ञान संकायको डिनमा डा. अमर नागिला नियुक्त भएका छन् । विश्वविद्यालयको सोमबार बसेको कार्यकारी परिषद्ले डा. नागिलालाई डिन नियुक्त गरेको हो । नागिला हाल स्कूल अफ हेल्थ एण्ड एलाईड साइन्सेसका सहप्राध्यापक हुन् ।

नवनियुक्त डिन डा. नागिला त्यही ल्याबका सञ्चालक हुन्, जसले गण्डकी प्रदेशका एक सांसदको कोरोना परीक्षण रिपोर्ट पोजिटिभ निकाल्दा खैलाबैला मच्चिएको थियो । एकैदिन संकलित राष्ट्रिय जनमोर्चा सांसद खिमविक्रम शाहीको स्वाबको नतिजा १५ वैशाखमा पोजिटिभ आएको थियो ।

अविश्वास प्रस्तावमाथि मतदान हुने कार्यसूची रहँदाकै दिन सांसद शाही सम्पर्कविहीन भएका थिए । त्यही दिन डा. नागिला सञ्चालक रहेको लाइफकेयर डाइग्नोस्टिकले सांसद शाहीको रिपोर्ट पोजिटिभ निकालेको थियो ।

१५ वैशाखमा लाइफकेयरले पोजिटिभ रिपोर्ट निकाल्दा प्रदेश क्षयरोग उपचार केन्द्रस्थित पीसीआर ल्याबमा सांसद शाहीको रिपोर्ट नेगेटिभ आएको थियो ।

‘बेपत्ता’ सांसदको कोरोना परीक्षण शंकास्पद : एकैदिन संकलित नमुनाको दुईथरी रिपोर्ट

राजनीतिक घटनाक्रममा आफ्नो ल्याबको नाम जोडिएपछि डा. नागिलाले जोडघटाउसँग आफ्नो ल्याबको कुनै सम्बन्ध नरहेको स्पष्टीकरण दिएका थिए ।

लाइफकेयरमा परीक्षण गरेपछि चरक मेमोरियल अस्पताल पनि सांसद शाहीलाई गायब बनाउन संलग्न रहेको भन्दै आलोचना भयो । चरकले १५ वैशाखमै प्रदेश क्षयरोग उपचार केन्द्रस्थित पिसिआर ल्याबमा स्वाब पठायो । सांसद शाहीको त्यो रिपोर्ट पोजिटिभ आएपछि प्रयोगशालाका जानकारले तीन वटा स्वाब एउटै व्यक्तिको हुन नसक्ने प्रतिक्रिया दिएका थिए ।

पोजिटिभ आएको स्वाब सांसद शाहीकै हो ? प्रयोगशालाकर्मी भन्छन् - केही गडबड छ

स्वास्थ्य विज्ञान संकायको डिनमा डा. नागिलासहित कार्यकारी परिषद्ले मानविकी तथा समाजशास्त्र संकायको डिनमा डा. अजय थापा र विज्ञान तथा प्रविधि संकाय डिनमा डा. रमेशकुमार ठगुराठीलाई नियुक्त गरेको विश्वविद्यालयका सूचना अधिकारी लोकप्रसाद ढकालले जानकारी दिए ।

डा. अजय स्कूल अफ डेभलपमेन्ट एण्ड सोसल ईञ्जिनियरिङका सह–प्राध्यापक हुन् भने डा. ठगुराठी स्कुल अफ ईञ्जिनियरिङका सह–प्राध्यापक हुन् । डिनको कार्यकाल चार वर्ष हुन्छ ।

त्यस्तै विश्वविद्यालयको परीक्षा नियन्त्रकमा चार वर्षका लागि डा. तुल्सीराम भण्डारी नियुक्त भएका छन् । भण्डारी स्कूल अफ हेल्थ एण्ड एलाईड साइन्सेसका सह–प्राध्यापक हुन् ।

प्रकाशित मिति: सोमबार, जेठ ३, २०७८ २२:०४