उपचार नपाएर बिरामीको ज्यान जाँदैछ : मुख्यमन्त्री कार्यालय साइकल बाँड्छ, मन्त्रीहरू शिलान्यास र निरीक्षणमा छन्

उपचार नपाएर बिरामीको ज्यान जाँदैछ : मुख्यमन्त्री कार्यालय साइकल बाँड्छ, मन्त्रीहरू शिलान्यास र निरीक्षणमा छन्

A+ A A-

प्रदेश २ मा कोरोना संक्रमितका साथसाथै अन्य बिरामीको पनि उपचार नपाएर मृत्यु भइरहेको छ । अस्पतालमा बेड, अक्सिजन, आईसीयू, भेन्टिलेटरलगायतका सेवा तथा उपकरण नहुँदा बिरामी कि त रिफर भइ बाहिर जानुपर्ने कि त छटपटिएर मर्नुपर्ने बाध्यतामा छन् ।

समाजिक विकास मन्त्रालयको तथ्यांकअनुसार प्रदेशमा दिनहुँ ५ सयभन्दा बढी संक्रमित थपिँदै छन् । हाल साढे ८ हजार सक्रिय संक्रमित छन् ।

तर, प्रदेश सरकार भने मन्दिर शिलान्यास, निरीक्षण र साइकल वितरणमा अल्झिएको छ । गत बुधबार सामाजिक विकासमन्त्री नवलकिशोर साह र उद्योग, पर्यटन, वन तथा वातावरणमन्त्री रामनरेश राय मन्दिरको अनुगमनका लागि सप्तरी पुगे ।

मन्त्रीद्वय साह र राय सप्तरीको हनुमाननगर कंकालिनी नगरपालिकाको विभिन्न मन्दिर तथा पर्यटकीय स्थलमा घुम्दै गरेको तस्वीर मन्त्री साहकै स्वकीय सचिव राजकुमार यादवले सामाजिक सञ्जालमा राखेका थिए । यादवले मन्त्रीद्वयको तस्वीर सार्वजनिक गर्दै वैरवाको विवाह मण्डप, योगिनियाको वोटानिकल गार्डेन, सोही स्थानको राधाकृष्ण मन्दिर, हनुमाननगरको राम मन्दिरको स्थलगत निरीक्षण गरेको उल्लेख गरे ।

सोही दिन प्रदेशका उद्योग, पर्यटन, वन तथा वातावरण राज्यमन्त्री सुरेश मण्डलले सिरहाको कल्याणपुर नगरपालिका- १ भोक्राहामा शिव मन्दिरको शिलान्यास गरे । राज्मन्त्री मण्डल आफैँले समाजिक सञ्जालमा तस्वीर सार्वजनिक गरे । शिलान्यस र निरिक्षणको तस्वीर सार्वजनिक गरेलगत्तै उनीहरूको व्यापक आलोचना भयो ।

प्रदेश सरकारका मन्त्रीहरूको यो व्यवहार हेर्दा उनीहरूले अझै पनि कोरोना भाइरसको महामारीलाई नजरअन्दाज गरिरहेको जस्तो देखिन्छ । प्रदेश २ सरकारले कोरोना भाइरसभन्दा अन्य कुरालाई प्राथमिकतामा राखेको देखिन्छ ।

शुक्रबार मुख्यमन्त्री तथा मन्त्रिपरिषदको कार्यालयबाट सञ्चालित बेटी पढाउ बेटी बचाउ अभियानअन्तर्गत सिरहामा छात्रालाई साइकल वितरण गरिएको छ । महामारीले विद्यालय बन्द रहे पनि शुक्रबार सिरहाको गोलबजार नगरपालिका- ४ स्थित जनता माध्यमिक विद्यालय (प्राविधिक) को कक्षा ८ का छात्रालाई साइकल वितरण गरिएको हो ।

प्रदेश २ सरकारको बेवास्ताले करोडौंका भेन्टिलेटर थन्किए, उपचार नपाएर ज्यान गुमाउँदै बिरामी

मुख्यमन्त्री कार्यालयले पठाएको साइकल स्थानीय नेताहरूले एक कार्याक्रमको आयोजना गरी वितरण गरेका हुन् । जसपा नेता सञ्जिव यादव, रामनरायण यादव, विक्रम महरा र शिक्षकहरू सहभागी भएका सो कार्यक्रममा ४७ जना छात्रालाई साइकल वितरण गरिएको थियो ।

अझै बनेन कोभिड अस्पताल

खुला सीमाना, हेलचेक्र्याइँ तथा लापरबाहीले प्रदेशमा कोरोना संक्रमित बढ्दै छन् । प्रादेशिक अस्पताल जनकपुरका मेडिकल सुपरिटेन्डेन्ट डा. प्रमोद यादवका अनुसार बढ्दै गरेको संक्रमितको अनुपात हेर्दा एक सातापछि प्रादेशिक अस्पताल अन्तर्गत सञ्चालित कोभिड अस्पतालका सबै बेड भरिने छन् ।

जटिल रोगीले भेन्टिलेटर भरिभराउ हुँदा बिरामीलाई निजी अस्पताल रिफर गर्नुपर्ने बाध्यता रहेको उनले बताए । समयमै उपचार नपाएर धनुषा र महोत्तरीमा मात्र १० दिनयता चार जना बिरामीको मृत्यु भइसकेको छ । तीमध्ये तीन जना कोरोना संक्रमित हुन् ।

गत वैशाख २० गते जनकपुरस्थित मणिपाल शिक्षण अस्पतालको भवनलाई कोभिड अस्पताल बनाउने निर्णय भएको थियो । अहिलेसम्म त्यसको प्रारम्भिक काम मात्र सुरु भएको छ । प्रदेश सरकारले निर्माण गर्न लागेको १०० बेड क्षमताको उक्त भवनलाई २० दिनभित्रै कोरोना विशेष अस्पतालको रुपमा प्रयोगमा ल्याउने गरी मणिपाल शिक्षण अस्पतालको मर्मत तथा ठेक्का दिने काम अगाडि बढाइएको बताइएको छ । काम भने सुस्त गतिमा भइरहेको छ ।

हालसम्म अस्पताल वरपर घाँस उखेल्ने र सरसफाई मात्र भएको छ । प्रदेश सरकारले मणिपाल शिक्षण अस्पतालको जीर्ण भवनलाई कोभिड अस्पतालको रुपमा विकास गर्ने जिम्मा मुख्यमन्त्री स्वच्छता अभियानका संयोजक एवं सिनियर डिभिजन ईन्जिनियर भगवान झालाई दिएको छ ।

त्यहाँ २० आईसीयू बेडसहित १ सय शय्याको कोभिड अस्पताल सञ्चालनमा ल्याइने ईन्जिनियर झाले जानकारी दिए । अस्पताल सञ्चालनका लागि अनलाइन टेन्डर प्रकृया पूरा भएको र जनशक्ति भर्नाको प्रकृया अगाडि बढाइएको उनले जानकारी दिए ।

जनशक्ति अभावले थन्किए आईसीयू र भेन्टिलेटर

जनशक्ति अभावले जिल्ला अस्पताल जलेश्वरको आईसीयू तथा भेन्टिलेटर थन्किएका छन् । भेन्टिलेटर र आईसीयू नहुँदा त्यहाँबाट रिफर भएका बिरामीले ज्यानै गुमाएका छन् ।

एक वर्षअघि दुई करोड खर्चेर जडान गरिएको ५ वटा भेन्टिलेटर सञ्चालनका लागि जनशक्ति पठाउन प्रदेश सरकारलाई बारम्बार तकेता गरे पनि अटेर गरेको अस्पताल व्यवस्थापन समितिका अध्यक्ष सुरेश पाण्डेयको भनाइ छ ।

मुख्यमन्त्रीलाई ज्ञापनपत्र बुझाउँदै पाण्डेयले विगतको बाँकी बक्यौताको भुक्तानी, कर्मचारीको कोभिड भत्ता, ५० शय्याको दरबन्दी अनुसार पदपूर्ति, आईसीयूका लागि दक्ष जनशक्ति, कोभिड बिरामी तथा काम गर्ने कर्मचारीका लागि क्वारेन्टाइन, खाना, बास, औषधि तथा कोभिड व्यवस्थापनमा लाग्ने अन्य खर्च रकम ५ जेठसम्म उपलब्ध नगराए आमरण अनशन बस्ने चेतावनी दिएका छन् ।

प्रदेश सरकारले केही स्वास्थ्यकर्मी पठाए पनि अति आवश्यक रहेको इन्टर्नल मेडिसिन, एमडी एनेस्थेसिया र रेडियोलोजिस्ट नपठाउँदा सेवा सञ्चालन गर्न नसकिएको पाण्डेयले बताए । प्रदेश सरकारले स्टाफ नर्स तथा मेडिकल अफिसर मात्रै पठाएको उनले बताए ।

अस्पताल रेफरल सेन्टर जस्तै भएको देख्दा आत्मग्लानी महसुस भएको पाण्डेयको भनाइ छ । ‘आम जनसमुदायको तथानाम गालीगलौज सुन्दासुन्दै हैरान भएर मुख्यमन्त्रीलाई ज्ञापनपत्र लेखेको छु,’ उनले भने ।

प्रकाशित मिति: शनिबार, जेठ १, २०७८ १८:२१