प्रदेश २ सरकारको बेवास्ताले करोडौंका भेन्टिलेटर थन्किए, उपचार नपाएर ज्यान गुमाउँदै बिरामी

प्रदेश २ सरकारको बेवास्ताले करोडौंका भेन्टिलेटर थन्किए, उपचार नपाएर ज्यान गुमाउँदै बिरामी

A+ A A-

उच्च ज्वरो देखिएपछि २६ वैशाखमा जलेश्वर नगरपालिका-४ का ५५ वर्षीय सुखिचन महतो जिल्ला अस्पताल जलेश्वरमा भर्ना भए । उच्च ज्वरोसँगै श्वास प्रश्वासमा समस्या देखिएपछि उनको स्वास्थ्य अवस्था बिग्रिँदै गयो ।

महतोलाई भेन्टिलेरमा राख्नुपर्ने भन्दै अस्पतालले प्रादेशिक अस्पताल जनकपुरमा रिफर गर्‍यो । जनकपुरस्थित प्रादेशिक अस्पतालमा पनि भेन्टिलेटर नपाएपछि त्यहाँबाट निजी अस्पताल चन्द्रकला हस्पिटलमा लैजाँदै गर्दा उनको बाटोमै मृत्यु भयो ।

महोत्तरी गाउँपालिका-४ का ४२ वर्षीय रघुनाथ पाण्डेयलाई समेत गत बिहीबार श्वासप्रश्वासमा समस्या आएपछि जलेश्वर अस्पताल भर्ना गरियो । आइसोलसेन कक्षमा अक्सिजन दिएर राखिएका उनमा शुक्रबार कोरोनामा कोरोना पुष्टि भयो । स्वास्थ्य बिग्रिँदै गएपछि शनिबार राति अस्पतालले उनलाई भेन्टिलेटरमा राख्नु पर्ने परिवारलाई जानकारी गरायो ।

तर, प्रादेशिक अस्पताल जनकपुर लैजाँदै गर्दा उनको बाटोमै मृत्यु भयो । ‘चिकित्सकले उनलाई भेन्टिलेटरमा राख्नुपर्छ भनेर जनकपुर रेफर गरिदिए । एम्बुलेन्स खोज्दा खोज्दै रातिको साढे १० बज्यो । जनकपुर लैजाँदै गर्दा बाटोमै उनको मृत्यु भयो,’ पाण्डेयका आफन्त वैभव चौधरीले भने । जलेश्वरमा अस्पतालमा आईसीयू र भेन्टिलेटर हुँदाहुँदै सञ्चालनमा ल्याउन नसक्दा ज्यान गुमाउने महतो र पाण्डेय प्रतिनिधि पात्र मात्र हुन् ।

अस्पताल सञ्चालन तथा व्यवस्थापन समितिका अध्यक्ष सुरेश पाण्डेयका अनुसार अस्पतालमा आईसीयू तथा भेन्टिलेर हुँदाहुँदै जनशक्ति अभावमा सञ्चालन गर्न नसकिएको बताए । जलेश्वर अस्पतालको आईसीयू र भेन्टिलेटर सञ्चालनमा नआउँदा बिरामी रेफर गर्नु पर्ने बाध्यता भएको र कतिपयले समयमै भेन्टिलेटर तथा आईसीयू सेवा नपाउँदा ज्यान गुमाउने गरेको उनले बताए ।जलेश्वर अस्पतालमा एक वर्षअघि नै जडान गरिएको भेन्टिलेटर जनशक्ति अभावका कारण सञ्चालनमा आउन सकेको छैन । गत वर्ष जलेश्वर अस्पतालले दुई करोड खर्चेर ५ वटा भेन्टिलेटर खरिद गरेको थियो ।

प्रदेश सरकारले केही स्वास्थ्यकर्मी पठाए पनि अति आवश्यक रहेको इन्टर्नल मेडिसिन, एमडी एनेस्थेसिया र रेडियोलोजिस्ट नपठाउँदा सेवा सञ्चालन गर्न नसकिएको अध्यक्ष पाण्डेयले बताए । प्रदेश सरकारले स्टाफ नर्स, मेडिकल अफिसर मात्रै पठाएको उनले बताए ।

‘जनशक्ति व्यवस्थान गरेर दिन प्रदेश सरकारलाई भन्दा भन्दै थाकिसक्यौं,’ अस्पताल विकास समितिका अध्यक्ष पाण्डेले भने, ‘अहिलेसम्म कुनै सुनुवाइ भएको छ ।’ उनका अनुसार नेपालकै पुरानोमध्येको एक जलेश्वर अस्पतालमा हालसम्म प्राइमरी अस्पतालको दरबन्दी अनुसार २८ जना दरबन्दी रहेकोमा २२ जना मात्र पदपूर्ति भएको छ । जसमध्ये ८ जना कार्यालय सहयोगी नै हुन् । जबकि गत वर्ष कोरोना महामारीमा १ सय बेडको सेवा प्रवाह गरेको यो अस्पतालाई सेकेन्डरी ए लेभलको ५० बेडको अस्पताल बनाउन प्रदेश मन्त्रिपरिषद्‍बाट गत वर्ष नै स्वीकृत भइसकेको छ ।

तर, काम कागजमै सीमित हुँदा अस्पतालले प्रसूति, इमरजेन्सी, ल्याब, डिजिटल, एक्सरेलगायतका सेवा दैनिक ज्यालादारीमा सञ्चालन गरिरहेको छ । दरबन्दी र दक्ष जनशक्ति नहुँदा अस्पतालभित्र रहेको ५ बेडको आईसीयू सेवा सञ्चालनमा ल्याउन नसकिएको अध्यक्ष पाण्डेयको भनाइ छ । दक्ष जनशक्ति माग गर्दै उनले मुख्यमन्त्री तथा मन्त्रिपरिषद्‍को कार्यालयलाई ज्ञापनपत्र समेत बुझाएका छन् ।

विगतको बाँकी बक्यौताको भुक्तानी, कर्मचारीको कोभिड भत्ता, ५० शय्याको दरबन्दी अनुसार पदपूर्ति, आईसीयूका लागि दक्ष जनशक्ति, कोभिड बिरामी तथा काम गर्ने कर्मचारीका लागि क्वारेन्टाइन, खाना, बास, औषधि तथा कोभिड व्यवस्थापनमा लाग्ने अन्य खर्च रकम ५ जेठसम्म उपलब्ध नगराए आमरण अनशनमै बस्ने अध्यक्ष पाण्डेयद्वारा जारी विज्ञप्तिमा उल्लेख छ ।

प्रकाशित मिति: बिहीबार, वैशाख ३०, २०७८ १८:०६