डेलिभरी सेवा प्रदायकको प्रशासनप्रति आक्रोश : संक्रमित परिवार आइसोलेसनमा बस्ने कि तरकारी किन्न जाने ?

डेलिभरी सेवा प्रदायकको प्रशासनप्रति आक्रोश : संक्रमित परिवार आइसोलेसनमा बस्ने कि तरकारी किन्न जाने ?

A+ A A-

अनलाइन अर्डरका खाद्यान्न डेलिभरी गर्ने प्लेटफर्म मेरोकिराना डटकमको गाडी सोमबार कमल पोखरीबाट हात्तीवनमा खाद्यान्न पुर्‍याउन जाँदै थियो । प्रहरीले लगनखेलमा त्यो गाडी रोक्यो ।

‘निषेधाज्ञा भन्ने थाहा छैन ? गाडी किन चलाएको ?’ प्रहरीको प्रश्न थियो । डेलिभरी गर्न गएका स्टाफ खासै केही बोल्न सकेनन् । आफ्नो कम्पनीमा फोन गरे र प्रहरीले छाड्ने समय पर्खिरहे ।

प्रहरीले गाडीलाई लगनखेलमै ५ घण्टा होल्ड गरिदियो । अरु खाना त केही भएन तर करिब २० हजार बराबरको फ्रोजन फुड भने खेर गयो ।

‘गाडीमा ग्यास, चामल, दाल, फ्रोजन फुडलगायत सामग्री थियो । यस्तो सामान रोक्न प्रहरीलाई पनि कसरी मन लाग्यो होला,’ मेरोकिराना डट कमका संस्थापक तथा ई-बिजनेस एसोसिएसन अफ नेपालका संयोजक सागरदेव भट्टले भने ।

लगनखेलमा होल्डमा राखिएको मेरोकिराना डट कमको गाडी

निषेधाज्ञाको दोस्रो दिन उपत्यकामा विगत ८ वर्षदेखि तरकारी डेलिभरी गर्दै आएको मेट्रो तरकारी डटकमको गाडीलाई प्रहरीले समात्यो ।

कारण- गाडी खाली थियो ।

‘प्रहरीले गाडी दिउँसो साढे चार बजे मैतिदेवीमा रोक्यो । हामीले तरकारी पुर्‍याएर आएको भन्दा सीडीओको हस्ताक्षर भएको पास देखाउन भनियो,’ मेट्रोतरकारी डट कमका संस्थापक अनिल बस्नेतले भने । तरकारीको गाडी चार घण्टापछि मात्रै छाडिएको अनिल बताउँछन् । अर्को दिन एकान्तकुनास्थित आफ्नो अफिसबाट तरकारी लिन बल्खु जाँदै गर्दा प्रहरीले सानेपामा रोकेको उनी बताउँछन् ।

‘यस्तै समस्या पर्छ भनेर हामीले पहिल्यै सीडीओ कार्यालयमा कुरा पनि गरेका थियौँ । त्यो बेलामा हामीलाई गाडीमा कम्पनीको डकुमेन्ट र स्टाफलाई आईडी कार्ड बोक्न भनियो तर अहिले प्रत्येक दिन हाम्रो गाडी समातिन्छ,’ उनले भने । त्यस्तै तयारी खाना डेलिभरी गर्ने कम्पनी थकालीखाना डट कममा स्टाफलाई पनि प्रहरीले दु:ख दिने गरेको कम्पनीका सह-संस्थापक सुशान्त नेपालले गुनासो पोखे ।

सरकारको निर्णय र फिल्डमा खटिएका प्रहरीको समन्वय नभएको डेलिभरी सेवा दिँदै आएका कम्पनीहरूको गुनासो छ । ‘उपत्यकामा धेरै जना एक्लै बस्नु हुन्छ । परिवारै बसे पनि उहाँहरूलाई कोभिड लागे पनि हामीले दुवै छाक खाना पुर्‍याउछौँ । तर, प्रहरीले हाम्रा स्टाफलाई होल्ड गर्नेलगायतका दुःख दिइरहनु भएको छ,’ सुशान्तले भने, ‘हामीले यो काम भर्खर सुरु गरेका हौँ तर पहिलो दिनमै हाम्रा तीन जना स्टाफ होल्डमा पर्नुभयो,’ उनले भने ।

काठमाडौं जिल्लाका प्रमुख जिल्ला अधिकारी कालीप्रसाद पराजुलीले किनमेलका लागि बिहान समय दिएकाले दिउँसो गाडी रोकिएको बताए । किनमेलका लागि बिहान पसल खोल्न दिएकाले दिउँसोको डेलिभरी सेवा रोकिएको उनले बताए ।

चाहिने सामान बिहानै नजिकको पसल तथा मार्टहरूमा खरिद गर्न उनले सुझाए । तयारी खानाका विषयमा भने लचिलो हुन सकिने उनको भनाइ छ । ‘उपत्यकामा कोही नभएका, एक्लै बसेका वा परिवारैलाई कोभिड लागेकालाई तयारी खाना डेलिभरी राम्रै हो । यो इस्यू नयाँ आयो । योबारेमा हामी छलफल गर्छौं,’ उनले भने, ‘यस्ता समस्या छन् भने सम्बोधन हुन्छ ।’

प्रमुख जिल्ला अधिकारी पराजुलीको उत्तरमा भट्ट भने असन्तुष्ट छन् । ‘कसैको परिवारैलाई कोभिड लागेको छ भने आइसोलेसनमा बस्ने कि बिहानै तरकारी किन्न बजार जाने ?,' उनको प्रश्न छ ।

भिडभाड कम गर्न घर-घरमा सेवा नै प्रभावकारी हुने डेलिभरी सेवा प्रदायकहरूको तर्क छ । प्रशासनले खाद्यान्नलगायतका अत्यावश्यक वस्तुको डेलिभरी रोकेर निश्चित समयावधि तोक्नु अव्यवहारिक भएको उपभोक्ता अधिकारकर्मी मदन तिमल्सिनाको भनाइ छ ।

‘बिहान मात्र पसल खोल्दा भएभरको मान्छे एकै पटक भिड हुन्छन् । परिवारको सबैलाई संक्रमण छ भने सामान खरिद गर्न जाँदा त्यो व्यक्तिबाट अरुलाई पनि सर्न सक्छ,’ उनले भने, ‘यस्तो समस्या हटाउन स्वास्थ्य मापदण्ड पूरा गराएर तयारी खाना, खाद्यान्न पसल, अत्याश्यक वस्तु र होम डेलिभरीप्रति प्रशासन लचिलो बन्नु पर्छ ।’

प्रकाशित मिति: बिहीबार, वैशाख ३०, २०७८ १५:१५