इजरायल र प्यालेस्टाइनबीच बमबारी : सुरक्षाका उपाय खोज्न नेपालीलाई दूतावासको आग्रह

इजरायल र प्यालेस्टाइनबीच बमबारी : सुरक्षाका उपाय खोज्न नेपालीलाई दूतावासको आग्रह

A+ A A-

इजरायल र प्यालेस्टाइनबीचको तनावले इजरायलमा काम गर्ने नेपाली त्रसित बनेका छन् । विगत केही दिनदेखि जेरुसेलम र दक्षिण इजरायली क्षेत्रमा सैयौँ रकेट आक्रमण भएको छ ।

हिजो राति मात्रै गाजाबाट तेल अबिबलाई निशाना बनाई १८० भन्दा बढी रकेट प्रहार भएको इजारयलस्थित नेपाली दूतावासले जनाएको छ । यसबाट नआत्तिन तथा सम्भव भएसम्म सुरक्षाका उपायहरूको खोजी गर्नेतर्फ लाग्न इजरायलमा रहेका नेपालीलाई दूतावासले आग्रह गरेको छ ।

राजदूत डा. अन्जान शाक्यले विज्ञप्ति जारी गर्दै भनेकी छन्, 'खासगरी साइरन बज्नासाथ घरभित्र हुनुहुन्छ भने बङ्कर, भर्याङ वा त्यस्तै सुरक्षित क्षेत्रमा जान, झ्याल नजिक नजान, यदि घरबाहिर (बजार, सडक, फार्म वा अन्यत्र कतै) हुनुहुन्छ भने पनि नजिकैको बङ्करमा पुगिहाल्नुहुन र त्यो उपलब्ध नभएमा जहाँ हुनुहुन्छ त्यहाँ सुरक्षित हुने उपाय अपनाउन, कुनै समस्या परेमा दूतावास वा आफ्नो साथीभाइ वा इजरायलमा क्रियाशील नेपाली संघसंस्थाका प्रतिनिधिहरूलाई सम्पर्क गर्न समेत अपिल गर्दछौँ ।'

ईजरायलवासी नेपालीहरुमा अपिल!

विगत केही दिनयता ईजरायल र प्यालेष्टाइन बीच तनाव बढ्दै गएको सम्बन्धमा सबै जानकार नै हुनुहुन्छ। केही दिनदेखि जेरुसेलम र दक्षिण ईजरायली क्षेत्रमा सैयौं रकेट आक्रमण भएको छ, हिजो राती मात्रै गाजाबाट तेल अबिबलाई निशाना बनाई १८० भन्दा बढी रकेट प्रहार भएको छ। यसले हामी सबैलाई त्रसित तुल्याएको छ। तथापि, यसबाट नआत्तिन तथा सम्भव भएसम्मका सुरक्षाका उपायहरुको खोजी गर्नेतर्फ लाग्न हामी ईजरायलवासी सबै नेपालीहरुमा हार्दिक अपिल गर्दछौं।

खासगरी साइरन बज्नासाथ घर भित्र हुनुहुन्छ भने बङ्कर, भर्याङ्ग वा त्यस्तै सुरक्षित क्षेत्रमा जान, झ्याल नजिक नजान, यदि घरबाहिर (बजार, सडक, फार्म वा अन्यत्र कतै) हुनुहुन्छ भने पनि नजिकैको बङ्करमा पुगिहाल्नुहुन र त्यो उपलब्ध नभएमा जहाँ हुनुहुन्छ त्यहाँ सुरक्षित हुने उपाय अपनाउन, कुनै समस्या परेमा दूतावास वा आफ्नो साथीभाइ वा ईजरायलमा क्रियाशील नेपाली संघसंस्थाका प्रतिनिधिहरुलाई सम्पर्क गर्न समेत अपिल गर्दछौं।

डा. अन्जान शाक्य
राजदूत
तथा नेपाली राजदूतावास परिवार,
तेल अबिब, ईजरायल।

प्रकाशित मिति: बुधबार, वैशाख २९, २०७८ २१:३४