लुम्बिनी प्रादेशिक अस्पतालमा बेड कुर्दाकुर्दै पाँच जना संक्रमितको मृत्यु

लुम्बिनी प्रादेशिक अस्पतालमा बेड कुर्दाकुर्दै पाँच जना संक्रमितको मृत्यु

A+ A A-

बुटवलस्थित लुम्बिनी प्रादेशिक अस्पतालमा आईसीयू र एचडीयू बेड कुर्दाकुर्दै पाँच जना कोरोना संक्रमितको मृत्यु भएको छ ।

आज रातभरमा छ जनाको मृत्यु भएकोमा पाँच जनाको अस्पतालको इमर्जेन्सी वार्डमा बसेर आइसीयू र एचडीयू बेड कुर्दाकुर्दै मृत्यु भएको हो । एक जनाको भने प्रादेशिक अस्पतालबाट कोरोना विशेष अस्पतालको एचडीयू बेडमा लगेलगत्तै मृत्यु भएको थियो ।

आज मृत्यु हुनेहरूमा मंगलबार इमर्जेन्सीमा आएका तानसेन १४ का ३८ वर्षीय पुरुष रहेका छन् । उनको मंगरबार राती ११ बजे मृत्यु भएको थियो । त्यस्तै सैनामैना ७ रूपन्देहीका ३५ वर्षीय पुरुषको मंगरलबार साँझ ६:३५ बजे मृत्यु भएको छ ।

वैशाख २६ गतेदेखि इमर्जेन्सीमा रहेका बुटवल ११ का ५२ वर्षीय पुरुषको मंगलबार साँझ ५:३३ बजे मृत्यु भएको थियो । मंगलबार नै लुम्बिनी प्रादेशिक अस्पतालको इमर्जेन्सीमा पुगेकी तिलोत्तमा ६ की ७० वर्षीया महिलाको आज बिहान ७:५२ मा मृत्यु भएको हो ।

वैशाख २४ देखि इमर्जेन्सीमा रहेका तिलोत्तमा १ का ५७ वर्षीय पुरुषको पनि आज बिहान ५:५२ बजे मृत्यु भएको अस्पतालका प्रवक्ता डा. विष्णु गौतमले बताए ।

मंगलबार नै सिकिस्त अवस्थामा इमर्जेन्सीमा ल्याइएका बुटवल ६ का ४४ वर्षीय पुरुषलाई थप उपचारका लागि कोरोना विशेष अस्पतालको एचडीयू बेडमा लगिएकामा मंगरबार राती ७ बजे मृत्यु भएको उनले बताए ।

डा. गौतमका अनुसार मृतकहरूमध्य पाँच जना कोरोना विशेष अस्पतालमा आईसीयू र एडीयू बेड कुरेर इमर्जेन्सी वार्डमा थिए । विशेष अस्पतालमा बेड खाली नभएपछि उनीहरूको इमर्जेन्सीमै ज्यान गएको थियो ।

‘अक्सिजन नभई नहुने संक्रमितलाई घर पठाउन पनि नमिल्ने र बेड दिन पनि नसकिने अवस्था आयो,’ डा. गौतमले भने, ‘संक्रमितको अवस्था र गाम्भीर्यता हेरेर प्रतिक्षा सूचिमा राख्ने गराका छौँ ।’