निषेधाज्ञाले जन्माएको थकाली खाना डट कम

A+ A A-

कोभिड १९ को महामारी मानव जातिले दोस्रो विश्वयुद्धपछि भोगेको सबैभन्दा ठूलो संकट हो । कोरोना संक्रमण रोक्न भन्दै लगाइएको निषेधाज्ञाले काठमाडौं उपत्यका ठप्प पारेको छ ।

अत्यावश्यक सेवाबाहेक सबै काम रोकिएका छन् । मान्छेहरू घरभित्र थुनिएका छन् । तर, यही मेसोमा दुई युवाले भने नयाँ व्यवसाय सुरु गरेका छन् ।

संकटको समयलाई उनीहरूले आर्जन गर्ने मौकामा बदलेका छन् । निषेधाज्ञामा पनि खाना, खाद्यान्न होम डेलिभरी गर्न पाइने छुटको सदुपयोग गरे बाराका २२ वर्षीय सुशान्त नेपाल र सुर्खेतका २८ वर्षीय मनिषजंग शाहीले ।

थकाली खाना डट कमका नाममा उनीहरूले निषेधाज्ञामा घर–घरमा खाना पुर्‍याउने व्यवसाय सुरु गरेका छन् । यसअगाडि यी दुवै जनाले खानासम्बन्धी व्यवसाय गरेका थिएनन् । सुशान्त डिजिटल मार्केटिङ एजेन्सी चलाउँथे भने मनिष होस्टल चलाउँथे । मनिष आफ्नो होस्टलको मार्केटिङको सिलसिलामा सुशान्तलाई भेटिरहन्थे ।

केही नयाँ काम गर्ने दुवै जनाको सोच थियो । दुवै जनाको सोच मिलेरै उनीहरूको व्यावसायिक सम्बन्ध दोस्तीमा बदलियो । त्यही दोस्तीको सम्बन्ध अहिले फेरि व्यावसायिक साझेदारीमा परिणत भएको छ । कोरोना भाइरसको दोस्रो लहर रोक्न सरकारले गरेको निषेधाज्ञामा सुशान्त र मनिषले गर्दै आएको मार्केटिङ र होस्टल व्यवसाय ठप्प भयो । तर, मनिषको होस्टलमा खाना पकाउने स्टाफ भने बाँकी थिए ।

‘हामी दुवै जना काठमाडौंमा एक्ला एक्लै बस्छौँ । खाना बनाउन कहिले अल्छी लाग्ने त कहीले नभ्याउने । निषेधाज्ञामा हामीलाई जस्तै समस्या अरुलाई पनि परेको होला जस्तो लाग्यो,’ सुशान्त भन्छन् ।

उनीहरूले योबारे केही अध्ययन गरे र आफ्नो होस्टलकै स्टाफले पकाएको खाना घरघरमा पुर्‍याउन सकिने निष्कर्ष निकाले । अनि सुरु भयो थकाली खाना डट कम । घरघरमा खाना पुर्‍याउने भने पनि खानाको मूल्य कति राख्ने भन्नेमा भने उनीहरूले निकै सोच विचार गर्नुपर्‍यो । ‘यस्तो समयमा मानिससँग धेरै पैसा हुँदैन, त्यसैले थोरै पैसामा गुणस्तरीय खाना उपलब्ध गराउनुपर्ने भयो,’ सुशान्तले भने ।

यसको पनि उनीहरूले समाधान निकाले । उनीहरूले एक/दुई दिनका ग्राहकभन्दा पनि मासिक खाना खाने ग्राहक खोजे । ‘मासिक रूपमा खानेका लागि दुई छाक सादा खानाको ५ हजार र थकाली खानाको ७ हजार लिने निर्णय गर्‍यौँ,’ सुशान्तले भने ।

नेपाली खानामा दाल, भात, तरकारी, साग, अचार, सलाद र हप्ताको दुई पटक कुखुराको मासु हुनेछ भने थकाली खाना सेटमा दाल, भात, तरकारी, अचार, साग, साँधेको गुन्द्रुक, दही र घ्यु हुने सुशान्तले जानकारी दिए ।

त्यस्तै, शाकाहारीका लागि हप्ताको एक दिन पनिर र एक दिन च्याउको तरकारीको व्यवस्था गरिएको छ । चक्रपथबाट २ किलोमिटर बाहिरसम्म नि:शुल्क खाना डेलिभरी गर्ने र त्यसभन्दा बाहिर शुल्क लिने निर्णय गरेका छन् उनीहरूले । एक दिन मात्र खाना अर्डर गर्नेले भने केही बढी शुल्क तिर्नुपर्छ ।

यति सस्तोमा घरमै खाना पुर्‍याउँदा नाफा कमाउन सकिन्छ त भन्ने प्रश्नको जवाफमा सुशान्त भन्छन, ‘अहिलेका लागि नाफाभन्दा पनि नयाँ व्यापार सुरु गर्न हाम्रो उपलब्धि हो । सुरुमा त कमाउन सकिँदैन तर दैनिक ५ सयवटा डेलिभरी गर्न सकियो भने नाफा बस्छ ।’

व्यवसाय सुरु गरेको पहिलो दिनमै ८० भन्दा धेरै डेलिभरी आउँदा उनीहरू उत्साहित छन् । टाढा–टाढा खाना पुर्‍याउँदा खाना सेलाउँछ । खाना नसेलाओस् भन्नका लागि उनीहरूले हटकेसको व्यवस्थासमेत गरेका छन् ।

अहिले उनीहरूसँग १० जना कर्मचारी छन् । जसमा पाँच जनाले खाना पुर्‍याउने काम गर्छन् भने पाँच जनाले भान्साको काम सम्हाल्छन् । खानाको माग बढ्दै गएपछि कर्मचारी थप्ने उनीहरूको योजना छ ।

‘अहिले त हामी आफैँ पनि खटिएका छौँ । पछि स्टाफ पनि थप्छौँ,’ उनले भने । त्यस्तै स्वास्थ्य सुरक्षाका लागि सेनिटाइजर, पञ्जा, मास्क, अनिवार्य गरिएको र सबै कर्मचारीलाई महिनाको एक पटक पीसीआर टेस्ट गर्ने तयारी रहेको मनिषले बताए ।

यसरी घर–घरमा खाना पुर्‍याउँदा कोठामा एक्लै बस्ने कोभिडका बिरामीलाई पनि प्रत्यक्ष फाइदा पुग्ने उनीहरूको तर्क छ ।

खानाको पैसा नगद, ई–सेवा, खल्ती वा क्यूआर कोडमार्फत तिर्न सकिने उनले जानकारी दिए । यो व्यवसायलाई उनीहरूले निषेधाज्ञापछि पनि निरन्तरता दिने योजना बुनेका छन् । ‘हामीले कम मूल्यमा राम्रो खाना घरमै पुर्‍याइदिएपछि होटलमा जाने झन्झट कसले बेहोर्छ ? पछि यसलाई झन् ठूलो बनाउने योजना छ,’ उनले भने ।

सरकारले तोकेको मापदण्ड अपनाएर काम गर्न डेलिभरी गर्ने मान्छेलाई प्रहरीले धरपकड गर्दा भने समस्या पर्ने मनिषले दु:खेसो पोखे । ‘पहिलो दिनै हाम्रा तीन जना स्टाफलाई प्रहरीले रोक्यो । सरकारले यस्तो काममा त सजिलो बनाइदिए पो राम्रो हुन्थ्यो,’ उनले भने ।

हाल फोन र वेबसाइडबाट अर्डर लिइने भए पनि एक महिनाभित्र एपमार्फत काम गर्ने कम्पनीको योजना छ । एप सार्वजनिक भएपछि ग्राहकले आफूले रोजेको तरकारी खाने व्यवस्था मिलाइने उनले जानकारी दिए ।

प्रकाशित मिति: मंगलबार, वैशाख २८, २०७८ १५:५७