गण्डकीमा नयाँ सरकार गठनमा जनमोर्चा सांसद विभाजित, सचेतकले लगाइन् ह्वीप

A+ A A-

गण्डकी प्रदेशमा नयाँ सरकार बनाउने विषयमा राष्ट्रिय जनमोर्चाका सांसद विभाजित भएका छन् । तीन सांसद रहेको सो पार्टीका दुई सांसद कांग्रेस नेतृत्वमा नयाँ सरकार बनाउन नहुने पक्षमा र एक जना बनाउनुपर्ने पक्षमा छन् ।

सचेतक पियारी थापाले नयाँ सरकार बनाउने पक्षमा हस्ताक्षर गर्न भन्दै ह्वीप जारी गरेकी छन् । संसदीय दलले निर्णय नगरी उनले ह्वीप जारी गरिएको पत्र सोमबार दलका नेता कृष्ण थापा र सांसद खिमविक्रम शाहीलाई पठाएकी छन् ।

उनले कांग्रेसका कृष्णचन्द्र नेपाली पोखरेललाई मुख्यमन्त्री बनाउन प्रदेश प्रमुखलाई सरकार गठनका लागि दिइने दावीपत्रमा अनिवार्य हस्ताक्षर गर्न निर्देशन दिँदै ह्वीप जारी गरेकी हुन् ।

नयाँ सरकार बनाउनुपर्ने पक्षमा रहेकी सचेतक थापाले बाँकी दुई सांसदलाई ह्वीप जारी गरिएको पत्र पठाएकी छन् । सांसद कृष्ण थापा र खिमविक्रम शाही नयाँ सरकार बनाउन नहुने पक्षमा देखिन्छन् ।

ह्वीप लगाउनेबारे दलले भने कुनै निर्णय गरेको छैन । ‘लगाइएको होला, मलाई थाहा छैन,’ दल नेता थापाले भने ।

यही कारण गण्डकीमा नयाँ सरकार बन्ने विषय अन्योलमा परेको छ । मुख्यमन्त्री पृथ्वीसुब्बा गुरुङले आइतबार राजीनामा दिएपछि प्रदेश प्रमुखले तीन दिनभित्र नयाँ सरकार गठन गर्न आह्वान गरेकी छन् ।

तीन दिनभित्र सरकार गठनका लागि बहुमत रहेको हस्ताक्षर विपक्षी दलले बुझाउनुपर्छ । जनमोर्चा पनि नयाँ सरकार गठनको पक्षमा नभए गण्डकीमा नयाँ सरकार बन्दैन । बहुमतको हस्ताक्षर बुझाउने अवधि भोलिसम्म भए पनि जनमोर्चाका सांसद विभाजित भएका हुन् ।

६० सदस्यीय गण्डकी प्रदेश सभामा नयाँ सरकार बनाउन ३१ सांसद चाहिन्छ । अहिले एमालेको पक्षमा स्वतन्त्रसहित २८ र विपक्षीसँग २८ सांसद छन् । जनमोर्चाका सांसद विपक्षीसँग लागेमात्रै गण्डकीमा कृष्णचन्द्र नेपाली पोखरेलको नेतृत्वमा सरकार बन्ने छ ।

प्रकाशित मिति: सोमबार, वैशाख २७, २०७८ १७:२९