बजेट कार्यान्वयनः केन्द्रदेखि प्रदेश सरकारसम्म असफल

A+ A A-

बजेट कार्यान्वयनमा केन्द्रदेखि प्रदेश सरकारसम्म असफल देखिएका छन् । चालू आर्थिक वर्षको १० महिना बितिसक्दा केन्द्र सरकारदेखि सातवटै प्रदेश सरकारको बजेट खर्च निराशाजनक देखिएको हो ।

महालेखा नियन्त्रकको कार्यालयले दिएको जानकारीअनुसार ५ जेठसम्ममा केन्द्र सरकारले ५५.१४ प्रतिशत बजेट खर्च गरेको छ । यस्तै, प्रदेश १ ले २२.४१, प्रदेश २ ले १६.७४, प्रदेश ३ ले २३.०५, गण्डकी प्रदेशले २०.१८, प्रदेश ५ ले २५.२८, कर्णाली प्रदेशले ११.१० र सुदूरपश्चिम प्रदेशले २०.६२ प्रतिशत बजेट खर्च गरेका छन् ।

केन्द्र सरकार

संघीय (केन्द्र) सरकारको लक्ष्यअनुसार बजेट खर्च र राजस्व असुली दुवैको अवस्था दयनीय छ । केन्द्र सरकारले चालू आवका लागि १३ खर्ब १५ अर्ब १६ करोड १७ लाख रुपैयाँ बजेट खर्च गर्ने लक्ष्य लिएको थियो ।

लक्ष्यमध्ये ५ जेठसम्ममा ७ खर्ब २५ अर्ब १५ करोड ३९ लाख रुपैयाँ बजेट खर्च गरेको छ । यो भनेको कूल बजेटको ५५.१४ प्रतिशत मात्रै हो ।

राजस्व संकलनमा पनि केन्द्र सरकारको प्रगति कमजोर छ । चालू आवमा ८ खर्ब ३१ अर्ब ३१ करोड ८० करोड रुपैयाँ राजस्व उठाउने भनिएकोमा ५ जेठसम्ममा ५ खर्ब ६९ अर्ब १७ करोड ४१ लाख रुपैयाँ राजस्व उठेको छ । यो भनेको वार्षिक लक्ष्यको ६८.४७ प्रतिशत मात्रै हो ।

प्रदेश १

प्रदेश १ सरकारले चालू आवका लागि छुट्याइएको बजेटको २२.४१ प्रतिशत मात्रै खर्च गरेको छ । महालेखा नियन्त्रकको कार्यालयका अनुसार ५ जेठसम्ममा प्रदेश १ सरकारले ८ अर्ब ५ करोड ५१ लाख रुपैयाँ खर्च गरेको छ ।

प्रदेश १ सरकारले चालू आवका लागि ३५ अर्ब ९३ करोड ६० लाख रुपैयाँ बजेट ल्याएको थियो ।

प्रदेश २

प्रदेश २ सरकारले चालू आवका लागि २९ अर्ब ७८ करोड ६९ लाख रुपैयाँको बजेट ल्याएको थियो । यसमध्ये ५ जेठसम्म प्रदेश २ सरकारले ४ अर्ब ९८ करोड ५९ लाख रुपैयाँ मात्रै खर्च गरेको छ । प्रदेश २ सरकारले चालू आवको १० महिना बितिसक्दा लक्ष्यको १६.७४ प्रतिशत मात्रै खर्च गरेको हो ।

प्रदेश ३

बजेट खर्चको हिसाबले प्रदेश ३ सरकारको हालत पनि उस्तै छ । प्रदेश ३ सरकारले चालू आवका लागि ३५ अर्ब ६१ करोड ५४ लाख रुपैयाँको बजेट ल्याएको थियो । उसले ५ जेठसम्ममा ८ अर्ब २१ करोड १० लाख रुपैयाँ मात्रै बजेट खर्च गरेको छ । प्रदेश ३ सरकारले लक्ष्यको २३ प्रतिशत मात्रै बजेट खर्च गरेको छ ।

गण्डकी प्रदेश

गण्डकी प्रदेशले यो आवको १० महिनामा १०.१८ प्रतिशत मात्रै बजेट खर्च गरेको छ । उसले चालू आवका लागि २४ अर्ब २ करोड ३ लाख रुपैयाँको बजेट ल्याएको थियो । यसमध्ये ५ जेठसम्ममा ४ अर्ब ८४ करोड ७२ लाख रुपैयाँ मात्रै बजेट खर्च गरेको छ ।

प्रदेश ५

प्रदेश ५ सरकारले चालू आर्वको १० महिना सकिँदा कुल विनियोजित बजेटको एक चौथाइ मात्र खर्च गरेको छ । उसले चालू आवका लागि २८ अर्ब ९ करोड ३ लाख रुपैयाँको बजेट ल्याएको थियो । तर, ५ जेठसम्ममा ७ अर्ब १० करोड ९ लाख रुपैयाँ मात्रै बजेट खर्च गरेको छ ।
प्रदेश ५ सरकारले चालु आवका लागि छुट्याइएको बजेटको २५.२८ प्रतिशत खर्च गरेको छ ।

कर्णाली प्रदेश

केन्द्रीकृत राज्य व्यवस्थामा हेपिएको भनिएको कर्णाली प्रदेश सरकारले संघीय व्यवस्थामा पनि बजेट खर्चमा सबैभन्दा कमजोर उपस्थिति देखाएको छ । कर्णाली प्रदेशले चालू आवको १० महिनामा बजेटको ११.१० प्रतिशत मात्रै खर्च गरेको छ ।

कर्णालीले प्रदेशले चालू आवका लागि २८ अर्ब २८ करोड २८ लाख रुपैयाँको बजेट ल्याएको थियो । यसमध्ये ५ जेठसम्ममा ३ अर्ब १४ करोड १९ लाख रुपैयाँ मात्रै बजेट खर्च गरेको छ ।

सुदूरपश्चिम प्रदेश

चालू आव सकिन दुई महिनाभन्दा कम समय बाँकी हुँदासम्म सुदूरपश्चिम प्रदेशले बजेटको २०.६२ प्रतिशत मात्रै खर्च गरेको छ । उसले चालू आवका लागि २५ अर्ब ६ करोड ५६ लाख रुपैयाँको बजेट ल्याएकोमा ५ जेठसम्ममा ५ अर्ब १६ करोड ७३ लाख रुपैयाँ मात्रै खर्च गरेको छ ।

प्रकाशित मिति: बुधबार, जेठ ८, २०७६ ०१:५८