अब गण्डकीमा जनमोर्चा के गर्छ ?, चित्रबहादुर केसी भन्छन्- दुःखका साथ नयाँ सरकारलाई समर्थन

अब गण्डकीमा जनमोर्चा के गर्छ ?, चित्रबहादुर केसी भन्छन्- दुःखका साथ नयाँ सरकारलाई समर्थन

A+ A A-

गण्डकी प्रदेशका मुख्यमन्त्री पृथ्वीसुब्बा गुरुङले राजीनामा दिएपछि अब कांग्रेस नेतृत्वमा नयाँ सरकार बन्ने छ । कांग्रेस संसदीय दलका नेता कृष्णचन्द्र नेपाली पोखरेल मुख्यमन्त्री बन्ने छन् ।

तर, सरकार बनाउन उनले आफ्नो पक्षमा बहुमत देखाउनुपर्ने हुन्छ । त्यसका लागि अहिले अविश्वासको पक्षमा रहेका दल एक हुनुपर्छ । जनमोर्चाका सांसद सरकार ढाल्ने-नढाल्ने विषयमा एकजुट थिएनन् । जनमोर्चाले के गर्छ भन्ने धेरैको चासो छ । जनमोर्चाका केन्द्रीय अध्यक्ष चित्रबहादुर केसीले नयाँ सरकार गठनमा पनि आफूहरूले सहयोग गर्ने बताए ।

‘प्रधानमन्त्रीसँगै प्रदेशमा वामपन्थी नेतृत्वको सरकारलाई समर्थन दिएको हो । उहाँहरूले सक्नुभएन । संसद खत्तम पार्नुभयो । संसदीय नीति ध्वस्त पार्नुभयो,’ उनले शिलापत्रसँग भने, ‘प्रतिगमनको विरोधमा जो आउँछ उनीहरूलाई नै हाम्रो साथ रहन्छ, दुःखका साथ ।’

आफूहरूले सरकार बन्दा वामपन्थी भनेर साथ दिएको तर अब केपी ओली नसच्चिए साथ दिन नसकिने अध्यक्ष केसीले बताए । ‘हामी वामपन्थी समर्थन गर्छौं भनेर गएको । तर, केपीजीले संसद खत्तम, संविधान खत्तम पार्नुभयो र आफ्नै पार्टीसमेत खत्तम । त्यो भएकाले सुध्रिनु भयो भने समर्थन रहला । अहिले उहाँहरूलाई समर्थन रहेन,’ अध्यक्ष केसीले भने ।

पृथ्वीसुब्बा गुरुङ नेतृत्वको सरकार ढाल्ने विषयमा जनमोर्चाका तीन सांसद विभाजित थिए । जनमोर्चा दल नेता कृष्ण थापा र खिमविक्रम शाही सकेसम्म सरकार जानु हुँदैन र पियारी थापा सरकार ढाल्नुपर्छ भन्ने पक्षमा थिए ।

मुख्यमन्त्री गुरुङले राजीनामा दिएसँगै तीन दिनभित्र सरकार गठन गर्न प्रदेश प्रमुख सीताकुमारी पौडेलले आह्वान गरेकी छन् । मुख्यमन्त्री गुरुङको राजीनामा स्वीकृत गर्दै प्रदेश प्रमुख सीताकुमारी पौडेलले संविधानको धारा १६८ को उपधारा (२) बमोजिम ३ दिनभित्र सरकार बनाउन आह्वान गरेकी छन् ।

संविधानको धारा १६८ को उपधारा २ मा स्पष्ट बहुमत नभए दलहरू मिलेर सरकार बनाउन सक्ने व्यवस्था छ । ‘प्रदेशसभामा कुनै दलको स्पष्ट बहुमत नरहेको अवस्थामा प्रदेशसभामा प्रतिनिधित्व गर्ने दुई वा दुई भन्दा बढी दलहरूको समर्थनमा बहुमत प्राप्त गर्न सक्ने प्रदेशसभा सदस्यलाई प्रदेश प्रमुखले मुख्यमन्त्री नियुक्त गर्नेछ,’ धारा १६८ को उपधारा २ मा भनिएको छ ।

सो व्यवस्था अनुसार गण्डकी प्रदेशमा अब गठबन्धन सरकार बन्ने छ । ६० सदस्यीय गण्डकी प्रदेशसभामा बहुमत पुर्‍याएर नयाँ सरकार गठन गर्न ३१ सांसद चाहिन्छ । अहिले नयाँ सरकार गठनको पक्षमा ३२ सांसद छन् । गण्डकी प्रदेशसभामा एमालेका २७, कांग्रेसका १५, माओवादीका १२, राष्ट्रिय जनमोर्चाका तीन र जनता समाजवादी पार्टी दुई गरेर ५९ सांसद छन् । त्यसबाहेक एक जना मनाङ ‘ख’ बाट निर्वाचित स्वतन्त्र सांसद राजीव गुरुङ (दीपक मनाङ) छन् ।

मुख्यमन्त्री गुरुङको विपक्षमा एमालेका २७ र स्वतन्त्र सांसद मनाङे गरेर २८ सांसद थिए । आफ्नो विपक्षमा स्पष्ट बहुमत रहेपछि मुख्यमन्त्री गुरुङले आइतबार राजीनामा बुझाएका हुन् ।

प्रकाशित मिति: आइतबार, वैशाख २६, २०७८ १८:२८