नेपालगञ्जमा होम आइसोलेसनमा बसेका बिरामीलाई घरमै उपचार थालियो

A+ A A-

नयाँ भेरियन्टको कोभिड १९ को संक्रमण समुदायमै फैलिएपछि नेपालगञ्जमा झण्डै चार हजार संक्रमित होम आइसोलेसनमा छन् ।

उनीहरूको उपचारका लागि नेपालगञ्ज उपमहानगरपालिकाले वडास्तरमै चिकित्सकसहितको स्वास्थ्य टोली खटाएको छ । होम आइसोलेसनका बिरामीको उपचार वडा नं. १ धम्बोझीबाट थालिएको छ ।

भेरी अस्पतालका फिजिसियन डा. पारश श्रेष्ठको नेतृत्वमा घरघरै स्वास्थ्यकर्मी पठाएर शनिबार २५ संक्रमितलाई स्वास्थ्य सेवा दिएको वडाध्यक्ष प्रमोद रिजालले बताए । स्वास्थ्य टोलीमा तीन चिकित्सक र पाँच स्टाफ नर्स संलग्न छन् । संक्रमितको स्वास्थ्य जाँच, औषधि तथा एक्स-रेलगायतका परीक्षणको सम्पूर्ण खर्च वडा कार्यालयले व्यहोर्ने व्यवस्था मिलाइएको उनले जनाए ।

अक्सिजन चाहिने अवस्थाका बिरामीलाई घरमै व्यवस्थापन गर्ने, थप उपचार आवश्यक पर्ने संक्रमितलाई उपमहानगरले सञ्चालन गरेका अक्सिजनसहितका आइसोलेसनमा राखिने र गम्भीर बिरामीलाई अस्पतालमा पठाउने गरी उपचार व्यवस्था मिलाइएको छ ।

उपचार गर्न जाँदा संक्रमितलाई स्वास्थ्य तथा हाइजिन किटसमेत उपलब्ध गराउने गरिएको छ । नेपालगञ्ज १ मा हाल होम आइसोलेसनमा झण्डै २ सय सक्रिय संक्रमित रहेका उपमहानगरपालिका स्वास्थ्य शाखा प्रमुख रामबहादुर चन्दले जनाए ।

चिकित्सकसहितको स्वास्थ्य टोली होम आइसोलेसन पुगेर उपचार गर्ने सेवा नगरका सबै वडामा विस्तार गरिने चन्द बताउँछन् । नेपालगञ्ज नगर क्षेत्रका भृकुटीनगर, गडेरियनपुर, गणेशपुर, न्यूरोड, सदरलाईन क्षेत्रमा ठूलो संख्यामा कोभिड संक्रमितहरू होम आइसोलेसनमा छन् ।