लाइभ साेका लागि नेहा कक्कर काठमाडौं आउँदै

A+ A A-

बलिउडकी चर्चित गायिका नेहा कक्करले काठमाडौंमा लाइभ प्रस्तति गर्ने भएकी छन् । पारामाउन्ट इन्टरटेन्मेन्टको आयोजनामा काठमाडौंको लर्ड अफ दि डिङ्क्स (एलओडी) मा २५ जेठमा हुने विशेष सोमा उनले प्रस्तुति दिने भएकी हुन् ।

नेहासँग ब्यान्ड मेम्बर र यस सिजनका इन्डियन आइडलका ‘टप टेन’ प्रतिस्पर्धीसमेत नेपाल आउन लागेको आयोजकले जनाएको छ ।

पर्यटन वर्ष २०२० लक्षित गरेर नेहा र इन्डियन आइडलका टप टेनलाई नेपाल ल्याउन लागेको पारामाउन्ट इन्टरटेन्मेन्टका सञ्चालक जनार्जन ढुंगेलले बताए ।

‘युवामाझ निकै लोकप्रिय रहेकी नेहाको नेपाल आगमनले भारतमा नेपालको विषयमा उल्लेखनीय प्रचार हुने विश्वास छ,’ ढुंगेलले भने ।

त्यस्तै, नेहाले ठमेलस्थित लर्ड अफ द डिङ्क्स (एलओडी)मा प्रस्तुति दिन आफू नेपाल आउन लागेको भन्दै युटुबमार्फत जानकारीसमेत गराएकी छन् ।

नेहाका आँख मारे, काला चस्मा, लन्डन ठुमकरा, दिलबरलगायतका गीत नेपालमा पनि उत्तिकै हेरिन्छ । इन्डियन आइडल सिजन–२ मा प्रतिस्पर्धा गरेकी नेहाले इन्डियन आइडलको १०औं संस्करणमा निर्णायकको भूमिका निर्वाह गरेकी थिइन् । उनले जी टिभीको ‘सारेगमपा लिटिल च्याम्पस’मा पनि निर्णायकको भूमिका निर्वाह गरेकी छन् । उनले सन् २००८ मा पहिलो एल्बम ‘नेहा दि रक स्टार’ सार्वजनिक गरेकी थिइन् ।

‘कुमार सानुको कार्यक्रम काठमाडौं र बुटबलमा गराएको अनुभवले पनि नेहाको कार्यक्रम उत्कृष्ट बनाउने तयारीमा छौं,’ ढुंगेलले भने, ‘नेपाल र भारतका कलाकारको प्रस्तुति आदानप्रदान गर्ने कार्यक्रममा वृद्धि गर्ने हाम्रो योजना छ । र, भिजिट नेपालका लागि प्रचारप्रसार गर्न सकिन्छ कि भनेर हामी योजना बनाइरहेका छौं ।’

प्रकाशित मिति: मंगलबार, जेठ ७, २०७६ ०४:५०