कोरोना नियन्त्रणमा खटिएका स्वास्थ्यकर्मीको मृत्यु भए प्रदेश १ ले २५ लाख दिने

कोरोना नियन्त्रणमा खटिएका स्वास्थ्यकर्मीको मृत्यु भए प्रदेश १ ले २५ लाख दिने

A+ A A-

प्रदेश- १ सरकारले कोरोनाको संक्रमण नियन्त्रण तथा रोकथाममा खटाएका स्वास्थ्यकर्मी तथा कर्मचारीको मृत्यु भए मृतकका परिवारलाई क्षतिपूर्तिस्वरूप २५ लाख रुपैयाँ दिने निर्णय गरेको छ ।

बुधबार मुख्यमन्त्री तथा मन्त्रिपरिषदको कार्यालयमा बसेको मन्त्रिपरिषद बैठकले कोभिड–१९ को पहिचान, निदान, उपचार, बिरामीको ओसारपसार र शव व्यवस्थापनमा प्रत्यक्ष रूपमा संलग्न भएका चिकित्सक, स्वास्थ्यकर्मी, चालक र सफाइकर्मीका साथै कर्मचारीहरूको कोभिड–१९ का कारणबाट मृत्यु भएमा उनीहरूको परिवारलाई क्षतिपूर्तिस्वरूप २५ लाख रुपैयाँ दिने निर्णय गरेको हो ।

त्यस्तै, बैठकले कोभिड–१९ को पहिचान, निदान, उपचार, बिरामीको ओसारपसार र शव व्यवस्थापनमा प्रत्यक्ष रूपमा संलग्न भएका चिकित्सक, स्वास्थ्यकर्मी, चालक र सफाइकर्मी तथा कर्मचारीहरू कोभिड–१९ बाट संक्रमित भई बिरामी भएमा प्रदेश सरकारले तोकेको सरकारी तथा निजी अस्पतालमा उपचार गर्दा लागेको सम्पूर्ण खर्च प्रदेश सरकारले व्यहार्ने निर्णय गरेको प्रदेश सरकारका प्रवक्ता तथा आन्तरिक मामिला तथा कानुनमन्त्री हिक्मतकुमार कार्कीले जानकारी दिए ।

उनका अनुसार कोभिड–१९ बाट संक्रमित भई होम आइसोलेसनमा बस्न सक्ने अवस्था नभई घरबाहिर संस्थागत वा होटल आइसोलेसनमा बस्दा लागेको सम्पूर्ण खर्चसमेत प्रदेश सरकारले व्यहोर्ने छ ।

त्यसैगरी, कोभिड–१९ को रोकथाम, नियन्त्रण, निदान तथा उपचार व्यवस्थापनका लागि प्रदेश सरकारद्वारा सञ्चालित कोसी अस्पताल कोभिड–१९ उपचार केन्द्र, प्रदेश जनस्वास्थ्य प्रयोगशाला विराटनगर तथा प्रदेश सरकारमातहतका सम्पूर्ण अस्पतालको कोभिड वार्डमा प्रत्यक्ष रूपमा खटिने चिकित्सक, स्वास्थ्यकर्मी, चालक र सफाइकर्मीका साथै कर्मचारीहरूलाई सुरु तलब स्केलको ५० प्रतिशत जोखिम भत्ता प्रदान गर्ने निर्णयसमेत भएको मन्त्री कार्कीले जानकारी दिए ।

त्यसरी खटिने कर्मचारी होम क्वारेन्टाइनमा बस्न सक्ने अवस्था नभई होटल क्वारेन्टाइन बस्नुपर्ने भएमा तोकिए बमोजिमको होटल क्वारेन्टाइनका साथै चालक, सफाइकर्मी, कार्यालय सहयोगीका तथा व्यवस्थापनमा खटिने अन्य कर्मचारीहरूका लागि प्रदेश सरकारले प्रबन्ध गरेको खाना तथा खाजासहितको क्वारेन्टाइन एवं होटल क्वारेन्टाइनको प्रबन्ध गर्नेसमेत प्रदेश सरकारले निर्णय गरेको छ ।

सरकारले सोबमोजिमको क्षतिपूर्ति, उपचार, जोखिम भत्ता तथा क्वारेन्टाइनबापतको खर्च सामाजिक विकास मन्त्रालयका लागि विनियोजित बजेटबाट भुक्तानी गरिने मन्त्री कार्कीले बताए ।

प्रकाशित मिति: बुधबार, वैशाख २२, २०७८ १८:३७