अविश्वास प्रस्तावमाथिको मतदान लम्ब्याउने पक्षमा मुख्यमन्त्री गुरुङ

A+ A A-

गण्डकी प्रदेशका मुख्यमन्त्री पृथ्वीसुब्बा गुरुङले अविश्वास प्रस्तावमाथिको मतदान जेठसम्म धकेल्न प्रस्ताव गरेका छन् ।

मंगलबार बसेको सर्वदलीय बैठकमा मुख्यमन्त्री गुरुङले जेठ पहिलो सातामात्रै अविश्वास प्रस्तावमाथिको मतदान प्रक्रियालाई अगाडि बढाउनुपर्ने बताएका हुन् ।

`अहिले कोभिडको महामारी छ । यहाँ निषेधाज्ञा पनि छ । त्यसैले अहिले अगाडि नबढाऔँ भनेर मुख्यमन्त्रीले भन्नुभयो,´ जसपा दलका नेता हरिशरण आचार्यले भने, `जेठ पहिलो हप्ता यसलाई अगाडि बढाऔँ भन्ने धारणा उहाँको छ।´

मुख्यमन्त्रीको प्रस्तावमा विपक्षी दलले भने असहमति जनाए । उनीहरूले अविश्वासलाई अल्झाएर राख्नभन्दा छिटो टुंगोमा पुर्‍याउनुपर्नेमा जोड दिएका छन् ।

`अब झनै कोभिडको जोखिम बढ्छ । हामीले यो हप्तामै टुंग्याउनुपर्छ भन्यौं । त्यसमा सहमति नजुटेपछि आ-आफ्नो दलको बैठकमा छलफल गर्ने गरी आजको बैठक सकियो,´ माओवादी संसदीय दलका नेता हरिबहादुर चुमानले भने ।

सोमबारको कार्यव्यवस्था परामर्श समितिको बैठकले संसद बैठक बोलाउने मिति टुंग्याउने जिम्मा दलका नेतालाई दिने निर्णय गरेको थियो । तर, मंगलबार बसेको सर्वदलीय बैठक पनि निष्कर्षविहीन बनेको हो ।

मुख्यमन्त्री गुरुङविरुद्ध कांग्रेस, माओवादी, जनमोर्चाका २८ सांसदले गत २ वैशाखमा अविश्वास प्रस्ताव संसद सचिवालयमा दर्ता गराएका थिए ।

१३ वैशाखमा संसदमा पेस भएको अविश्वास प्रस्तावमाथि मतदान हुने कार्यसूची तय भएकै दिन राष्ट्रिय जनमोर्चाका सांसद खिमविक्रम शाही सम्पर्कविहीन भएपछि सभामुख नेत्रनाथ अधिकारीले बैठक अनिश्चितकाललाई स्थगित गरेका थिए ।

ठूलो दलसँग छलफल नगरी दलीय स्वार्थ हेरेर बैठक स्थगित गरेको भन्दै एमाले सभामुख नेत्रनाथ अधिकारीसँग रुष्ट छ । सभामुखले चालेको कदमको प्रसङ्ग मुख्यमन्त्री गुरुङले आजको बैठकमा उठाएका थिए ।

`सांसद हराए सम्बन्धित दल जवाफदेही हुन्छ । प्रदेशसभाले खोज्ने होइन,´ मुख्यमन्त्री गुरुङले बैठकमा भनेका थिए ।

त्यसको जवाफमा सभामुख अधिकारीले संसदमा आउने तयारी गर्दा एक्कासी हराएको र त्यो विषय संवेदनशील भएकाले संसद स्थगन गरेको जवाफ दिए । `संवेदनशील भएकाले अहिले स्थगित गरेर कार्यव्यवस्थामा छलफल गर्छु भनेर टुंग्याएँ,´ सभामुखको भनाइ उदृत गर्दै माओवादी दल नेता चुमानले भने ।

जनमोर्चा सचेतक पियारी थापाले सांसद शाहीको अवस्था सार्वजनिक नहुँदासम्म संसद रोक्न माग गरेकी थिइन् । त्यसपछि सभामुख नेत्रनाथ अधिकारीले संसद स्थगित गरेका थिए ।

१५ वैशाखमा सभामुखले संसद बैठक स्थगित नगरेको भए अविश्वास प्रस्ताव फेल हुने पक्का थियो । जनमोर्चाका एक सांसद अनुपस्थित हुँदा अविश्वास प्रस्ताव ल्याएका कांग्रेस, माओवादी, जसपा र प्रस्तावलाई समर्थन गरेको जनमोर्चासहित ३० सांसद हुन्थे । ६० सदस्यीय गण्डकी प्रदेश सभामा अविश्वास प्रस्ताव पारित हुन ३१ मत चाहिन्छ ।

प्रकाशित मिति: मंगलबार, वैशाख २१, २०७८ १८:०४