कर्णालीको फ्लोरक्रसबारे प्रकाश ज्वालाको प्रष्टीकरण- हामीले पार्टी निर्णयलाई कार्यान्वयन गरेका हौं

कर्णालीको फ्लोरक्रसबारे प्रकाश ज्वालाको प्रष्टीकरण- हामीले पार्टी निर्णयलाई कार्यान्वयन गरेका हौं

A+ A A-

कर्णाली प्रदेशका मुख्यमन्त्री महेन्द्रबहादुर शाहीलाई फ्लोरक्रस गरेर विश्वासको मत दिएपछि एमालेको कारबाहीमा परेका नेता प्रकाश ज्वालाले पार्टी नीति अनुसार नै फ्लोरक्रस गरेको स्पष्टीकरण दिएका छन् ।

एक अपिल जारी गर्दै ज्वालाले फ्लोरक्रस नभएर पार्टीको निर्णयलाई कार्यान्वयन गरेको बताएका हुन् । पार्टीको नीति विपरीत काम गरेको आरोपमा एमालेको कारबाहीमा परेका ज्वालाले पार्टीको निर्णय अनुसार नै मुख्यमन्त्री महेन्द्रबहादुर शाहीलाई विश्वासको मत दिएको बताए ।

‘कर्णाली प्रदेश सरकारका विषयमा एमाले केन्द्रीय र प्रदेश कमिटीले कुनै आधिकारिक निर्णय गरेको छैन,’ उनले भने, ‘वर्तमान सरकारको निरन्तरताकै लागि मतदान गरेको हो ।’

यो प्राविधिक र व्यक्तिगत विषय नभई राजनीतिक निर्णय भएको दाबी गरेका छन् । ‘केन्द्रदेखि स्थानीय तहसम्म समस्या बढाउँदै गुटगत रुपमा पार्टी कब्जा गर्ने रणनीति देखिएपछि त्यसलाई चिर्न यस्तो कदम चाल्नु परेको हो,’ उनले भने, ‘अन्याय सहन र आत्मसमर्पण गर्न कम्युनिष्ट पार्टी रोजेको होइन ।’

हिजो पार्टी रक्षात्मक अवस्थामा हुँदा जसले कर्णालीमा पार्टी संगठन निर्माण गर्न, बलियो बनाउन ज्यान हत्केलामा राखेर हिँड्यो उसलाई अहिले सरकारमा जाने नाममा तिनै कमजोर पार्नेहरुले कारबाहीको नाटक मञ्चन गरिरहेको उनले बताए ।

‘मुख्यमन्त्री शाहिलाई तीन वर्ष पहिले केन्द्रीय पार्टीले समर्थन गरेको थियो । अझै केन्द्र र प्रदेश कमिटीले आधिकारिक रुपमा समर्थन फिर्ता भनेको छैन भने कसरी फ्लोरक्रस मान्न सकिन्छ ?,’ उनले भने, ‘यो त समर्थनको निरन्तरता मात्र हो ।’

३ वैशाखमा कर्णाली प्रदेशसभामा मुख्यमन्त्री शाहीलाई फ्लोर क्रस गरेर विश्वासको मत दिएकाकाले एमालेको साधारण सदस्य समेत नरहने गरी कारबाही गरेको १७ दिनपछि नेता ज्वालाले प्रष्टीकरण दिएका हुन् ।

हेर्नुस् ज्वालाको अपिल :