रिकन्डिसनका मोटरसाइकलमा लुट

A+ A A-

प्रदेश ७ को राजधानी धनगढीमा रिकन्डिसन मोटरसाइकल हाउसले चर्को ब्याज लगाएर मोटरसाइकल बिक्री–वितरण गरेको पाइएको छ । धनगढीवासीले सजिलो र छिटोछरितोका लागि खरिद गर्ने रिकन्डिसन मोटरसाइकलमा चर्को ब्याजदर छ ।

रिकन्डिसन हाउसले खरिद गरेको मूल्यभन्दा २० प्रतिशत बढी ब्याज असुल्दा ग्राहकले सास्ती भोग्नुपरेको हो । रिकन्डिसन हाउसले बैंकबाट ऋण लिँदा १३ देखि १५ प्रतिशत वार्षिक ब्याज बुझाउँछन् । तर, रिकन्डिसन हाउसले ग्राहकसँग मासिक २० देखि २५ प्रतिशतका दरले ब्याज असुलेको पाइएको छ ।

ग्राहक रामलखन चौधरीले भने, ‘२ महिनाअगाडि १ लाख ६० हजारमा रिकन्डिसनबाट पुरानो गाडी खरिद गरेको थिएँ । १ लाख १५ हजार दिइसकेको छु । मैले ४५ हजार दिन बाँकी छ । घरायसी समस्याले गर्दा भाका दिएको २ महिना नाघिसकेको छ । मेरो गाडी रिकन्डिसन हाउसले तानिदियो ।’

रिकन्डिसन हाउसले आफ्नै मनोपोली तरिकाले नीति बनाउँदा मोटरसाइकल खरिदकर्ता समस्यामा पर्ने गरेको चौधरीले गुनासो गरे ।

रिकन्डिसन हाउसले भाखा नाघेको २ दिनमै मोटरसाइकल खरिदकर्तालाई फोनमार्फत धम्काउने र गालीगलौज गर्ने गरेको घटना सार्वजनिक भएका छन् ।

उग्रतारा मोटरसाइकल रिकन्डिसन हाउस सञ्चालक प्रकाश केसीले मोटरसाइकल बेच्दा ५० प्रतिशत जम्मा गरेर दिने गरेको बताए ।
उनले भने, ‘बाँकी एक महिना ब्याज लिदैनौं । दुई महिनामा पैसा नदिए धरौटी रकमसहित गाडी पनि जफत हुन्छ । हामीले पनि बैंकबाट १५ प्रतिशत ब्याजमा रकम निकालेका हुन्छौं, महिना–महिनामा बैंकलाई पैसा तिर्नुपर्ने हुन्छ । त्यसकारण, पैसा नआएमा गाडी जफत गरेर अर्कोलाई बेच्नुपर्छ ।’

धनगढीमा अधिकांश बैंक तथा वित्तीय संस्थाले रिकन्डिसन मोटरसाइकल हाउसलाई १३ देखि १५ प्रतिशत ब्याजदरमा वार्षिक ऋण दिने गरेको महालक्ष्मी विकास बैंक धनगढीका प्रबन्धक चेतराज पाण्डेले बताए ।

प्रकाशित मिति: सोमबार, जेठ ६, २०७६ २२:५६