राष्ट्रपति र प्रधानमन्त्री हुने अफर आएको थियो, ठाडै इन्कार गरेँ : अमिक शेरचन

राष्ट्रपति र प्रधानमन्त्री हुने अफर आएको थियो, ठाडै इन्कार गरेँ : अमिक शेरचन

A+ A A-

गण्डकी प्रदेश प्रमुखबाट माओवादी नेता अमिक शेरचन सोमबार पदमुक्त भए । मंगलबार बिहान आयोजित पत्रकार सम्मेलनमा उनले आफू पदमुक्त भए पनि खुसी रहेको प्रतिक्रिया दिए । उनले अधिकारविहीन खुला जेलबाट मुक्त गरिदिएको भन्दै राष्ट्रपति विद्यादेवी भण्डारीलाई धन्यवाद नै दिए ।

‘पहिला ओलीजी र पुनः प्रचण्डजीमार्फत ओलीजीको प्रस्ताव मैले अस्वीकार गरेको पद थियो,’ उनले पत्रकार सम्मेलनमा भने, ‘पछि पार्टीको निर्णय सुनाएपछि अनुशासित कार्यकर्ताको नाताले बाध्य भै स्वीकारेको पद हो यो । अधिकारविहीन खुला जेलबाट मुक्त गरिदिनुभएकोमा पनि धन्यवाद ।’

शेरचनले पत्रकार सम्मेलनमा दिएको वक्तव्य

प्रदेश प्रमुखको पद ग्रहण गरेको आज १८ महिना २ दिन पुगेछ । यस बीचमा मलाई साथी सम्झेर माया गर्ने सबैप्रति आभार प्रकट गर्दछु । कार्यालयका कर्मचारी सुरक्षामा कार्यरत सबै जवान र सचिवालयका सबै साथीहरूबाट सहयोग र सम्मान पायौँ । यहाँहरूप्रति आभार व्यक्त गर्दछौँ ।

ओलीलाई शेरचनको व्यङ्ग्य- दङदङी गन्हाइसक्दा पनि भ्रष्टाचार शून्यमा झार्छु भन्ने ढोँगी म होइन

पदमुक्त भएकोमा अत्यन्तै खुसी छु । मुरीमुरी धन्यवाद छ राष्ट्रपतिज्यूलाई । पहिला ओलीजी र पुनः प्रचण्डजीमार्फत ओलीजीको प्रस्ताव मैले अस्वीकार गरेको पद थियो । पछि पार्टीको निर्णय सुनाएपछि अनुशासित कार्यकर्ताको नाताले बाध्य भई स्वीकारेको पद हो यो । अधिकारविहीन खुला जेलबाट मुक्त गरिदिनुभएकोमा पनि धन्यवाद ।

म पदका लागि राजनीति गरेको व्यक्ति होइन । पूर्वराष्ट्रपति डा. रामवरण यादवको कार्यकाल समाप्तिपछि राष्ट्रपतिका लागि मलाई प्रस्ताव आयो । मैले अस्वीकार गरेँ । त्यस्तै, ज्ञानेन्द्रकालमा प्रधानमन्त्रीको प्रस्ताव आउँदा पनि ठाडै इन्कार गरेको व्यक्ति हुँ । नेपाल कम्युनिस्ट पार्टीका संस्थापक कमरेड पुष्पलाल, क. यज्ञदेव आले, क. निर्मल लामा र क.मोहन विक्रम सिंहजस्ता शीर्षस्थ नेताहरुको निकटमा रहेर सक्रिय राजनीतिक संर्घषमा आफ्नो जीवन समर्पित गरेँ । पदका लागि कुनै प्रकारको बार्गेनिङ गरिनँ ।

सन्त नेता क. मनमोहन अधिकारीको निधनपछि एमाले पार्टीको अध्यक्ष पदमा आउन प्रस्ताव गर्दा पनि मैले स्वीकार गरिन । पद र सत्ताको लागि असंवैधानिक पद्धति र अपाच्य दृश्यहरू थोपार्ने पद जोगाउने व्यक्ति म होइन । न त पदकै लागि वैचारिक आस्था विदेशको कोठीमा बिक्री गर्ने व्यक्ति हुँ ।

म मार्क्सवाद, लेनिनवाद र माओ विचारधारामा अटल विश्वास राख्ने एक निष्ठावान् पहरेदार नागरिक हुँ । श्रमजीवी सर्वहाराजीवीको इमानदार साथी हुँ र वर्गसंघर्षमा जीवन समर्पित गर्ने योद्धा कार्यकर्ता पनि हुँ ।

राष्ट्रिय अखण्डता र राष्ट्रिय स्वाभिमानमाथि बारम्बार हस्तक्षेप र अतिकरण गर्ने भारतीय विस्तारवाद र साम्राज्यवादविरुद्धको संघर्षहरू पञ्चायतकालदेखि गणतन्त्रकालसम्म राष्ट्रघाती र असमान सन्धि सम्झौताविरुद्धको संघर्षहरूमा मैले कुनै प्रकारका षडयन्त्र र गद्दारी गरेको छैन ।

अमिक शेरचन भन्छन्- अस्वीकार गरेको पद थियो, जेलमुक्त गरिदिनुभएकोमा धन्यवाद

न त अर्बौं कमिशन र भ्रष्टाचारमा डुबेको छु । बरु म मन्त्री हुँदा घूस खुवाउन खोज्ने डीजीलाई पदबाट बर्खास्त गरेको ज्युँदो उदाहरण छ मसँग । भ्रष्टाचार र कमिसनहरूको खेलमा डुङडुङी बनाउने आरोप लाग्दा पनि भ्रष्टाचार शून्यमा झार्छु भन्ने ढोँगी व्यक्ति पनि होइन । म बरु वैदेशिक हस्तक्षेप सन्धि सम्झौता र भ्रष्टाचारविरुद्धका संघर्षरूमा चार वर्षजति जेल यातना र हजारौँपटक गिरफ्तार र हिरासतमा थुनिएको व्यक्ति हुँ ।

संघर्षको दौरानमा तत्कालीन सरकारको तानाशाही दमनबाट मेरो खुट्टा हात करङ र ढाड फुटेको छ भने गर्धन दुई टुक्रा हुँदा र पटक पटक कैयौँ दिनसम्म बेहोस हुँदा पनि वैचारिक आस्थामा विचलन नभएको व्यक्ति हुँ । स्मरण रहोस्, कमरेड मदन भण्डारीको सुनियोजित हत्याका विरुद्ध संयुक्त आन्दोलन गर्दा प्रहरी दमनबाट मेरो गर्धन दुई टुक्रा भयो भने १७ दिनपछि होसमा आएको थिएँ ।

आज देश कोभिडबाट आतंकित र आक्रान्त बनेको छ । दैनिक मृत्युदर बढिरहेको छ । यस्तो अवस्थामा सम्पूर्ण राजनीतिक दलहरूको साझा सहमति र सहकार्यमा देशव्यापी सचेतना अभियान चलाई जनताको जिउ धनको रक्षा गर्नुपर्ने अहम् बेलामा पार्टी पार्टी बीचको फुट, पद र सत्तालिप्साको खेलमा देशलाई चुर्लुम्म डुबाइएको छ ।

एकपटक सबैले निधार खुम्च्याएर सोचौँ, दैनिक सयौँको खुन बगिरहेको अवस्थाबाट घोर निरंकुश प्रतिगमनका विरुद्धका संघर्षमा तात्कालीन आन्दोलनकारी पार्टीहरूको बीचको सहकार्य र समझदारीबाटै सामन्तवादी सत्ताको अन्त्य र गणतन्त्र स्थापना गर्न सफल हुन सकेको हो ।

यस पदमा आएपछि मैले संवैधानिक मर्यादालाई पूर्णपालना गरेको थिए । कुनै पनि पार्टी विशेषको प्रभाव र छायामा काम गरिन । सरकारले जे प्रस्ताव ल्यायो त्यसलाई संवैधानिक नियमअनुसार निर्णय गर्ने गरेर माननीय सांसदहरूबाट जे जे प्रस्ताव आए त्यसलाई पनि संवैधानिक नियम बमोजिम नै निर्णयतार्थ सम्पादन गरेको थिएँ । यसबाट कसैको लागि अप्रिय भएको भए त्यो संविधान हेरेर चित्त बुझाउन अनुरोध गर्दछु ।

अन्त्यमा, लोकतन्त्र, संघीयता धरापमा नपरोस् यसका लागि पक्षधरहरूबीचको सहकार्य र एकतामा अघि बढौँ, मेरो हार्दिक अपिल छ ।

प्रकाशित मिति: मंगलबार, वैशाख २१, २०७८ ११:४२