प्रदेश २ मा कोरोनासँग जुध्‍न ४१७ दरबन्दी थप, आठवटै जिल्लामा फोकल मन्त्री तोकियो

प्रदेश २ मा कोरोनासँग जुध्‍न ४१७ दरबन्दी थप, आठवटै जिल्लामा फोकल मन्त्री तोकियो

A+ A A-

प्रदेश- २ ले कोरोना महामारीसँग जुध्न प्रदेशभरका विभिन्न अस्पताल तथा प्रयोगशालाका लागि ४१७ अस्थायी दरबन्दी थप गरेको छ ।

आज बसेको मन्त्रिपरिषद् बैठकले प्रादेशिक जनस्वास्थ्य प्रयोगशालाका लागि ३३, प्रादेशिक अस्पतालका लागि १७४, सिरहा, जलेश्वर, मलंगवा, गौर र कलैया अस्पतालका लागी ३२/३२ लहान अस्पतालका लागि २३, र भारदह तथा पोखरिया अस्पतालका लागि १५/१५ दरबन्दी थप गर्ने निर्णयगरेको छ ।

कोरोना विशेषको लागि एनेस्थेसियोलोजिष्टदेखि लिएर स्वीपरसम्मको दरबन्दी थप गरिएको छ । थप गरिएका दरबन्दीहरूमा अस्पतालले आवश्यकताको आधारमा तुरुन्त नियुक्त गर्न सकिने व्यवस्था गरिएको छ ।

त्यसैगरि, मन्त्रिपरिषद्ले जनकपुरको मणिपालमा निर्माण गर्न लागेको विशेष कोभिड अस्पतालको लागि थप २२७ दरबन्दी स्वीकृत गरेको छ । प्रदेश सरकारले मणिपालमा २० बेड आईसीयुसहित १०० बेडको विशेष कोभिड अस्पताल निर्माण गर्न लागेको हो ।

त्यसैगरि मन्त्रिपरिषदको बैठकले कोरोना महामारी नियन्त्रण तथा रोकथामका लागि प्रदेश सरकारका मन्त्रीहरूलाई जिल्ला – जिल्लाको जिम्मेवारी दिँदै फोकल मन्त्रीसमेत निर्धारण गरेको छ ।

सप्तरी जिल्लाका लागि भूमिव्यवस्था कृषि तथा सहकारीमन्त्री शैलेन्द्र साह, सिरहा जिल्लाका लागि आर्थिक मामिला तथा योजना विजयकुमार यादव, धनुषा र महोत्तरीका लागि आन्तरिक मामिला तथा कानुनमन्त्री ज्ञानेन्द्रकुमार यादव, सर्लाही र रौतहटका लागि उद्योग पर्यटन तथा वनमन्त्री रामनरेश राय र बारा तथा पर्साका लागि भौतिक पूर्वाधार विकासमन्त्री जितेन्द्र सोनललाई फोकल मन्त्रीको जिम्मेवारी दिने बैठक निर्णय गरेको छ ।

जिम्मेवारी तोकिएका मन्त्रीहरू सम्बन्धित जिल्ला र प्रदेश सरकारका बीच कोरोना महामारी नियन्त्रणका लागि पुलका रूपमा काम गर्ने मुख्यमन्त्री तथा मन्त्रिपरिषद्को कार्यालयले जनाएको छ । मन्त्रिपरिषद्को बैठकले यसअघि पीसीसीएमसीको बैठकले गरेको निर्णयहरूलाई अनुमोदनसमेत गरेको छ ।

प्रकाशित मिति: सोमबार, वैशाख २०, २०७८ २०:४१