कञ्चनपुरमा जैविक मार्ग बन्दै

A+ A A-

भीमदत्त नगरपालिकाले रौटालादेखि बह्रदेवसम्म जैविक पर्यटकीय मार्ग निर्माण कार्य अगाडि बढाएको छ । चार लेन सडकलाई पक्की बनाउने लक्ष्य राखेर रौटालादेखि ब्रह्मदेवसम्म जैविक पर्यटकीय मार्ग निर्माण कार्य अघि बढाइएको हो ।

कैलालीको गोदावरी र भीमदत्त नगरपालिकामा निर्माण हुने चक्रपथमा जोड्ने गरी जैविक पर्यटकीय मार्ग निर्माण सुरु गरिएको हो । भीमदत्त नगरपालिकाले सबै वडालाई छुने गरी नगर क्षेत्रमा चक्रपथ बनाउने योजनासमेत अघि बढाएको छ ।

सुदूरपश्चिम सरकारले आर्थिक वर्ष २०७५/०७६ को वार्षिक कार्यक्रममा कञ्चनपुरको ब्रम्हदेवदेखि चिसापानीसम्म जैविक पर्यटकीय मार्ग निर्माणका लागि ५० लाख रुपैयाँ रकम विनियोजनसमेत गरेको छ ।

स्थानीय सरकार तथा भीमदत्त नगरपालिकाले समेत ५० लाख रुपैयाँ सो मार्ग निर्माणका लागि छुट्याएका छन् । जैविक पर्यटकीय मार्गले ब्रह्मदेवको सिद्धबाबा मन्दिर, तिलाचौरको भम्केनी धाम, तिलकपुरको साकेतधाम र बाराकुण्डाको रौटेला मन्दिरलाई आपसमा जोड्नेछ ।

ब्रह्मदेवसम्म झन्डै १५ किलोमिटर लम्बाइको जैविक पर्यटकीय मार्गको चौडाइ कम्तीमा १८ देखि २२ मिटर हुनेछ । यसले ब्रह्मदेवको कालिकास्थित प्रस्तावित महाली लोकमार्गलाई जोड्ने भीमदत्त नगरपालिका प्रमुख सुरेन्द्र विष्टले बताए ।

जैविक पर्यटकीय मार्गले महाकाली कोरिडोरसँगै भित्री मधेसका बालबालिकालाई उच्च शिक्षाका लागि सहज हुने नगरपालिकाको विश्वास छ ।

भीमदत्त नगरपालिकाले जैविक पर्यटकीय मार्गमा पर्ने बाराकुन्डा क्षेत्रको धार्मिक पर्यटकीय र झोलुंगेनजिक महाकाली नदी किनारामा पार्किङ स्थल तथा पिकनिक स्थलको गुरुयोजनासमेत बनाएको छ ।

भीमदत्त नगरपालिकाले पर्यटकीय र धार्मिक विकासका लागि गुरु योजना निर्माण गरेको छ । बाराकुन्डाका भीमदत्त नगरपालिका–१ मा पर्छ । बाराकुन्डाका ताल, धार्मिक स्थल र पर्यटकीय क्षेत्रको विकासका लागि चालू आवमा झन्डै एक करोड लागतमा कार्यक्रम सञ्चालन गर्न लागिएको छ । जैविक मार्गले नगरभित्रका १, ३, ५, ८, ९ र १० नम्बर वडालाई छोएको छ ।

प्रकाशित मिति: सोमबार, जेठ ६, २०७६ २२:१२