संयुक्त राष्ट्र सङ्घीय स्वयंसेवी नियोगसँगको सहकार्यमा एड्भान्स्ड कलेजले गर्‍यो अन्तरसञ्जाल सम्मेलन

संयुक्त राष्ट्र सङ्घीय स्वयंसेवी नियोगसँगको सहकार्यमा एड्भान्स्ड कलेजले गर्‍यो अन्तरसञ्जाल सम्मेलन

A+ A A-

एड्भान्स्ड कलेज अफ इन्जिनियरिङ एन्ड म्यानेजमेन्टले अन्तरसञ्जाल सम्मेलन सम्पन्न गरेको छ । कलेजले संयुक्त राष्ट्रसङ्घीय स्वयंसेवी नियोगसँगको सहकार्यमा ‘स्वयंसेवाको माध्यमबाट जीवनवृत्ति’ विषयक उक्त सम्मेलन आयोजना गरेको हो ।

सम्मेलनमा संयुक्त राष्ट्रसङ्घीय स्वयंसेवी नियोग थाइल्यान्डका क्षेत्रीय प्रबन्धक विज्ञ डिमित्री फ्राइस्चिन तथा पिस क्रप्स नेपालका राष्ट्रिय निर्देशक म्याट टुल्लीले कार्यक्रम सञ्चालनमा उल्लेख्य भूमिका निर्वाह गरेका थिए ।

कार्यक्रममा विज्ञ डिमित्री फ्राइस्चिनले लामो जीवनयात्रा निर्धारण गर्न स्वयंसेवाले कसरी सहयोग गर्छ भन्ने विषयमा प्रकाश पारे । उनले संयुक्त राष्ट्रसङ्घीय स्वयंसेवी नियोगको अङ्ग कसरी बन्न सकिन्छ भन्ने विषयमा ध्यानाकर्षण गराउँदै महामारीको बेला स्वयंसेवकहरूलाई संस्थाले कसरी प्रोत्साहन गरिरहेको छ भन्ने विषयमा पनि प्रकाश पारे ।

त्यसैगरी, पिस क्रप्स नेपालका कार्यवाहक राष्ट्रिय निर्देशक म्याट टुल्लीले स्वयंसेवाको महत्त्वबारे प्रकाश पार्दै पछिल्ला केही दशकमा पिस क्रप्स नामक संस्थाद्वारा अमेरिकी नागरिकहरूलाई समेत सिकाइको अवसर प्रदान गर्ने गरी नेपाललाई कसरी योगदान गरिरहेको छ भन्ने विषयमा चर्चा गरे । उनले नेपालका स्थानीय समुदायले पनि वर्तमान कोरोना महामारीको सङ्कटको समयमा योगदान गरिरहेको बताए ।

एड्भान्स्ड कलेजका अध्यक्ष रमेशकुमार सिलवालले स्वयंसेवाका क्षेत्रमा युवावर्गलाई प्रोत्साहन गर्दै फ्राइस्चिन र टुल्लीले व्यक्त गरेको चासो, समर्पण तथा प्रदान गरेको समयप्रति कृतज्ञता व्यक्त गरे । उनले यस किसिमका अवसरले उद्यमशीलता तथा सीपमूलक शिक्षालाई प्रवर्द्धन गर्ने पनि बताए ।

कलेजका कार्यकारी निर्देशक कपिलेदेव रेग्मीले यो अन्तरसञ्जाल सम्मेलनको प्रमुख उद्देश्य युवावर्गलाई स्वयंसेवाप्रति प्रोत्साहन गर्नु मात्र नभई यस किसिमका सार्थक क्रियाकलापमार्फत उनीहरूको जीवनवृत्तिलाई प्रवर्द्धन गर्नु रहेको बताए ।

कार्यकारी निर्देशक रेग्मीले स्वयंसेवाप्रति अभिरुचि भएका इच्छुक स्वयंसेवीहरूलाई उक्त अन्तरसञ्जाल सम्मेलनको प्रमुख खण्डको अभिलेखीकृत सामग्रीपछि उपलब्ध गराइने प्रतिज्ञासमेत गरे ।

कार्यकारी निर्देशक रेग्मीले भने, 'प्रयोगशालामा सञ्चालन हुने अनुसन्धानमा आधारित नवीन प्रकृतिका प्रत्यक्ष परियोजनाहरूका माध्यमबाट एड्भान्स्ड कलेजले बहुआयामिक विद्यार्थी केन्द्रित क्रियाकलापलाई विस्तृतीकरण गर्दै आइरहेको छ । त्यस किसिमका समुदायमा आधारित प्रयोगशालाहरू देशका विभिन्न भागमा सञ्चालन गर्ने संस्थाको योजना छ ।'

उक्त अन्तरसञ्जाल सम्मेलनको सञ्चालन एड्भान्स्ड कलेजको रिसर्च एन्ड इनोभेसन एकाइकी सदस्य तथा नेपालकी प्रसिद्ध युवा वैज्ञानिक डा. प्रतिभा पाण्डेले गरेकी थिइन् ।

युवावर्ग र स्वयंसेवाप्रति आफ्नो दृष्टिकोण राख्दै उनले नेतृत्व, आत्मविश्वास र सामूहिक कार्यको सीप विकासद्वारा यसले कसरी युवावर्गको जीवनवृत्तिमा लाभ प्रदान गर्छ भन्ने विषयमा प्रस्ट पारिन् ।

प्रकाशित मिति: सोमबार, वैशाख २०, २०७८ १५:४९