राजीनामाको राजनीति : अविश्वासको प्रस्ताव छल्ने, बहुमत देखाएर मुख्यमन्त्रीमा दोहोरिने

राजीनामाको राजनीति : अविश्वासको प्रस्ताव छल्ने, बहुमत देखाएर मुख्यमन्त्रीमा दोहोरिने

A+ A A-

लुम्बिनी प्रदेशका प्रदेश प्रमुख धर्मनाथ यादवले मुख्यमन्त्री शंकर पोखरेलले दिएको राजीनामा स्वीकृत गरेका छन् । प्रदेश प्रमुखको कार्यालयले आज विज्ञप्ति प्रकाशित गरी राजीनामा स्वीकृत भएको जानकारी दिएको छ ।

'लुम्बिनी प्रदेशका माननीय मुख्यमन्त्री शंकर पोखरेलले नेपालको संविधानको धारा १६९(१)(क) अनुसार मुख्यमन्त्री पदबाट दिनुभएको राजीनामा आज मिति २०७८ साल वैशाख १९ गतेका दिन माननीय प्रदेश प्रमुखज्यूले स्वीकृत गर्नुभएको छ,' प्रदेश प्रमुखको कार्यालयले जारी गरेको विज्ञप्तिमा भनिएको छ ।

पोखरेलले राजीनामा दिएसँगै अब पुन: एमालेकै नेतृत्वमा सरकार बन्ने सम्भावना देखिएको छ । पोखरेलले आजै बसेको एमाले संसदीय दलको बैठकमा यस्तै ब्रिफिङ गरेका थिए ।

यता आज दिउँसो १ बजे बस्ने प्रदेशसभामा पोखरेलविरुद्ध कांग्रेस, माओवादी केन्द्रलगायतका दलले ल्याएको अविश्वासको प्रस्तावमा छलफल हुने तय भएको थियो ।

आफूविरुद्धको अविश्वासको प्रस्तावमा छलफल सुरु हुनु केही घण्टा पहिले राजीनामा दिएर प्रदेशसभामा बहुमत प्राप्त दलको हैसियतमा पुन: सरकार गठन गर्ने रणनीतिसहित पोखरेलले राजीनामा दिए ।

माओवादी तथा जसपाका गरी ६ सांसद पार्टीको कारबाहीमा परी पदमुक्त भएपछि प्रदेशसभा अहिले ८१ सदस्यीय छ । प्रदेशसभामा एमालेका ४१ सांसद छन् । त्यस आधारमा हेर्दा अब एमाले एकल बहुमतमा पुगेको देखिन्छ । सोही आधारमा पुन: सरकार गठन गर्ने रणनीतिअनुसार पोखरेलले राजीनामा दिएका हुन् ।

अविश्वास प्रस्तावमा छलफल भएको खण्डमा पोखरेललाई केही अप्ठ्यारो पर्ने सम्भावना रहन्थ्यो । कर्णाली प्रदेशको जस्तै केही एमालेका सांसदले फ्लोर क्रस गरेमा पोखरेलको सरकार ढल्ने सम्भावना देखिन्थ्यो ।