चितवनमा यस्तो देखियो निषेधाज्ञाको प्रभाव [तस्वीरहरू]

A+ A A-

निषेधाज्ञाको पहिलो दिन आज चितवनको बजारदेखि सडकसम्म प्रभाव देखिएको छ । जिल्ला प्रशासन कार्यालय चितवनले गएराति १२ बजेदेखि ३१ वैशाखसम्म निषेधाज्ञा जारी गरेपछि यहाँका बजारदेखि सडकमा चहलपहल न्यून बनेको हो ।

निषेधाज्ञाको समयमा चोकचोकमा सशस्त्र र प्रहरीका टोली खटिएका छन् । पहिलो दिन भएकाले अनावश्यक रूपमा सवारीमा र पैदल हिँड्नेलाई प्रहरीले सम्झाइबुझाई गरेको बताएको छ । निषेधाज्ञा भए पनि कतिपय मजदुर भने हिँडेरै घर जान लागेको दृश्य पनि भरतपुरको नारायणगढमा देखिन्थ्यो ।

सिरहाका अजय सदा नारायणगढमा एक कम्पनीमा मजदुरी काम गर्थे । निशेधाज्ञको अधिल्लो दिनसम्म ठेकेदारले पैसा दिन्छ कि भनी कुरे तर पैसा नपाएपछि खान बस्नै समस्या हुने देखेर उनीलगायत ७/८ जना साथी घर हिँडेका हुन् । ‘गाडी छैन् । खई कसरी जाने । ट्रक पाए नि जान हुन्थ्यो । नभए हिँड्दै जाने त होला,’ अजयले भने ।

यस्तै, नारायणगढमा भेटिए दाङको घोराही घर भएका रमेश शर्मा हतारमा थिए । ‘हिँड्दै जाउ कहीँ गाडी भेटिए जान हुन्थ्यो’ उनले भने ‘श्रीमती सुत्केरी ब्यथा लागे अस्पताल छिन् । हिजै हिँड्छु भनेको ठेकेदारले पैसा बिहान मात्रै दियो ‘ उनले भने ।

जिल्ला प्रहरी कार्यालय चितवनका अनुसार जानकारी पाएसम्म छिमेकी जिल्लाबाट गन्तव्यमा निस्केका सर्वसाधरणलाई गाडीहरूमा राखेर पठाइएको छ ।

आज अनावश्यक रूपमा हिँड्डुल र सवारीसाधन चलाउने ३०० भन्दा बढी सवारीसाधन र १ हजार ३०० सय जनालाई सम्झाइबुझाई गरी छोडिएको चितवन प्रहरीका नायब उपरीक्षक सरोज गिरीले बताए । पहिलो दिन भएकाले सम्झाईबुझाई गरिएको र भोलिदेखि निषेधाज्ञा उल्लंघन गर्नेलाई नियमअनुसारको कारबाही गरिने उनले बताए ।

निषेधाज्ञाको समयमा अत्यावश्यक वस्तु बिक्री गर्ने पसलहरू बिहान ६ बजेदेखि ९ बजेसम्म मात्रै खुल्न दिइएको छ ।