बल्ल तात्न थाले स्थानीय सरकार, नेपालगञ्जवरपर बने अक्सिजनसहितका २ सय २५ बेड आइसोलेसन केन्द्र

बल्ल तात्न थाले स्थानीय सरकार, नेपालगञ्जवरपर बने अक्सिजनसहितका २ सय २५ बेड आइसोलेसन केन्द्र

A+ A A-

बाँकेमा कोभिड महामारीले भयावह रूप लिएपछि अस्पताल भरिभराउ छ । बेड पाउन बिरामीले पालो कुर्नुपर्ने स्थिति छ । बिरामीको चाप बढ्न थालेपछि स्थानीय सरकारले अक्सिजनसहितका आइसोलेसन केन्द्र स्थापना गर्न थालेका छन् ।

नेपालगञ्ज उपमहानगरपालिका, कोहलपुर नगरपालिका, खजुरा र जानकी गाउँपालिकाले २ सय २५ बेडका अक्सिजनसहितका आइसोलेसन केन्द्र सञ्चालनमा ल्याएका छन् ।

नेपालगञ्ज उपमहानगरपालिकाले शुक्रबारदेखि ५० बेडको आइसोलेसन सेन्टर सञ्चालनमा ल्याएको हो । ‘कोभिडका बिरामीलाई अक्सिजनसहित आइसोलेसनमा राख्न थालिएको छ,’ मेयर धवलशमशेर राणाले भने, ‘अस्पतालमा बेड नपाइरहेका बेला यस्ता आइसोलेसन सेन्टरले बिरामीलाई राहत मिल्ने अपेक्षा गरेका छौँ ।’

कोहलपुर नगरपालिकाले पिपरीस्थित कृषि तालिम केन्द्रमा ५० बेडको आइसोलेसन सेन्टर सञ्चालनमा ल्याएको छ । त्यहाँ पनि आवश्यकताअनुसार अक्सिजन उपलब्ध गराउने व्यवस्था गरिएको छ । त्यस्तै, वडा नम्बर २ स्थित प्रेमनगरको आयुर्वेदिक प्राकृतिक चिकित्सालयमा २५ बेडको आइसोलेसन सञ्चालनमा ल्याइएको छ । त्यहाँ डा. सन्तोष बीसीसहितका स्वास्थ्यकर्मीको टोलीले बिरामीको रेखदेख गर्नेछ ।

त्यस्तै, जानकी गाउँपालिकाले वडा नम्बर ६ प्रिपहवास्थित खुला कारागारको भवनमा आइसोलेसन केन्द्र सञ्चालनमा ल्याएको छ । केन्द्रमा स्वास्थ्यकर्मीसहित सेवा दिइने पालिकाले जनाएको छ ।

खजुरा गाउँपालिकाले पनि ५० बेडका आइसोलेसन सेन्टर सञ्चालनमा ल्याएको छ । खजुरास्थित जनक शिक्षा सामग्री केन्द्रमा ४० र राधापुरमा १० बेडको अक्सिजनसहितका आइसोलेसन केन्द्र खोलिएको अध्यक्ष किस्मतकुमार कक्षपतिले बताए ।

दिनहुँ ४ सयभन्दा धेरै कोभिड संक्रमित थपिइरहेका छन् । १ सय ३५ बेड क्षमताको भेरी अस्पतालमा २ सय ११ बिरामीको उपचार भइरहेको छ । कोहलपुरस्थित नेपालगञ्ज मेडिकल कलेजको शिक्षण अस्पतालले १ सय बेडको कोभिड वार्ड सञ्चालन गरिरहेको छ । त्यहाँ थप २ सय बेड राखेर सेवा दिइने अस्पतालले जनाएको छ ।

यसरी खुलेका आइसोलेसन वार्डमा गम्भीर अवस्थाका बिरामी भर्ना गर्न मिल्ने अवस्था भने छैन । ती आइसोलेसन वार्डमा आवश्यक चिकित्सक र स्वास्थ्यकर्मीको राम्रो व्यवस्था नभएकाले भर परेर जाँदा झन् समस्या थपिने जोखिम पनि उत्तिकै छ । ‘सामान्य लक्षणका बिरामी त्यहाँ जाँदा राम्रै हुन्छ । तर, अस्पतालमा बेड नपाउने स्थितिले गम्भीर अवस्थाका बिरामी जाँदा भने खतरनाक पनि हुन सक्छ,’ भेरी अस्पतालका एक चिकित्सकले भने ।

प्रकाशित मिति: शुक्रबार, वैशाख १७, २०७८ १७:५३