सुर्खेतमा निषेधाज्ञा उल्लंघन गर्नेबाट दुई दिनमा उठ्यो १८ हजार ६ सय राजश्व

A+ A A-

विश्वव्यापी महामारीका रूपमा फैलिइरहेको कोरोना भाइरस (कोभिड–१९) नियन्त्रण तथा रोकथामका लागि निषेधाज्ञाको आदेश जारी भएको दुई दिनमा जिल्ला प्रशासन कार्यालय सुर्खेतले १८ हजार ६ सय रावश्व संकलन गरेको छ । जिल्ला प्रशासन कार्यालय सुर्खेतले १५ र १६ गतेको निषेधाज्ञा उल्लंघन गर्नेलाई कारबाही गरेर उक्त राजश्व असुल गरेको हो ।

१५ वैशाखमा निषेधाज्ञा उल्लंघन गर्ने ६० जना व्यक्तिहरूलाई जरिवाना गरी ६ हजार राजश्व संकलन गरिएको र १६ वैशाखमा निषेधाज्ञा उल्लंघन गर्ने १२४ जना व्यक्तिहरूलाई जरिवाना गरी १२ हजार ४ सय राजश्व संकलन भएको जिल्ला प्रशासन कार्यालय सुर्खेतले जनाएको छ ।

पहिलो दिन निषेधाज्ञाको उल्लंघन महिला २२२ र पुरुष ७९३ गरी जम्मा १ हजार १५ जनालाई सम्झाइबुझाइ छाडिएको, २२ वटा सवारी साधन नियन्त्रणमा लिइएको, मास्क नलगाई अत्यावश्यक काममा हिँड्डुल गर्ने व्यक्तिहरूलाई ६४५ वटा मास्क वितरण गरिएको र साथै उक्त दिन ९ वटा विभिन्न स्थानमा सचेतनामूलक कार्यक्रम संचालन गरिएको जिल्ला प्रशासन कार्यालय सुर्खेतका सहायक प्रमुख जिल्ला अधिकारी रोमबहादुर महतले जानकारी दिए ।

त्यस्तै, दोस्रो दिन वीरेन्द्रनगर बजार क्षेत्रका विभिन्न स्थानमा रहेका जम्मा आठवटा स्वास्थ्य सामग्री विक्रीवितरण गर्ने पसलमा अनुगमन गर्दा मास्क, सेनिटाइजरलगायतका स्वास्थ्य सुरक्षाका सामग्री पर्याप्त मात्रा रहेको र अनुचित मूल्यमा विक्रीवितरण नभएको पाइएको सहायक प्रमुख जिल्ला अधिकारी महतले बताए ।

अनुगमनका क्रममा निषेधाज्ञा उल्लंघन तथा अवेज्ञा गरी अनावश्यक हिँडडुल तथा भेला भएको कसुरमा वीरेन्द्रनगर नगरपालिका वडा नं. ७ र ८ का विभिन्न स्थानबाट नियन्त्रणमा लिइएका आठ जनालाई जनही तीन सय जरिवाना गरी छाडिएको उनले बताए ।

उनले भने, ‘निषेधाज्ञाको उल्लंघन एवं अवेज्ञा गर्ने महिला १२४ र पुरुष ३०६ गरी जम्मा ४३० जनालाई सम्झाइबुझाइ छाडिएको, अत्यावश्यक काममा हिँड्डुल गर्ने व्यक्तिहरूलाई ९० वटा मास्क वितरण गरिएको, अटेर गर्नेबाट १२ हजार ६ सय राजश्व संकलन गरिएको र ३१ वटा सवारी साधन नियन्त्रणमा लिइएको छ ।’

प्रकाशित मिति: शुक्रबार, वैशाख १७, २०७८ १५:४९