जब भैरवनाथले भावुक बनेका प्रचण्ड बोले

A+ A A-

पूर्वप्रधानमन्त्री एवं सत्तारुढ नेपाल कम्युनिस्ट पार्टीका अध्यक्ष पुष्पकमल दाहाल ‘प्रचण्ड’ आइतबार बिहान काठमाडौंको कुमारी हलमा देखिए । बिहान साढे ९ बजे नै उनी त्यहाँ पुगेका थिए ।

कुमारी हलमा दर्शकबाहेक चलचित्रकर्मी र रंग पत्रकार बिहानै पुग्ने गरेका छन् । तर, आइतबार प्रचण्ड, मन्त्री, नेता, कार्यकर्ता र सहयोगीले कुमारी हल परिसर भरिभराउ थियाे ।

प्रचण्ड हात हल्लाउँदै हलभित्र छिरे । उनी त्यहाँ भैरवनाथ गणबारे निर्माण गरिएको वृत्तचित्र हेर्न पुगेका थिए ।

द्वन्द्वकालमा भएका घटना र त्यसको असरलगायतलाई समेटेर बनाइएको वृत्तचित्र प्रचण्डले निकै ध्यानपूर्वक हरे । प्रचण्डका छेउमा थिए, नेकपा नेताहरु कृष्ण केसी (जो तत्कालीन भैरवनाथ गणमा योद्धाबाट सम्मानित भएका थिए), हिमाल शर्मा, मन्त्री बिना मगर, समाजवादी पार्टीकी नेतृ हिसिला यमी र वरिष्ठ कलाकार मदन कृष्ण श्रेष्ठ ।

वृत्तचित्रका दृश्यहरु देखाउँदै प्रचण्डले कृष्ण केसीसँग विगतका पल स्मरण गरे । बितेका दिनका कुरा गर्दै वृत्तचित्र हेरे । कृष्ण केसी तिनै व्यक्ति हुन्, जसले भैरवनाथ गणमा बन्दी रहेर चरम यातना भोगेका थिए ।

वृत्तचित्रमा तत्कालीन भैरवनाथ गणभित्र दिइने यातनाबारे देखाइएको छ । निकै मिहिन ढंगले घटना र त्यसको प्रस्तुति वृत्तचित्रमा समेटिएको छ ।

वृत्तचित्र सकिएपछि सबैले ताली बजाए, प्रचण्डले पनि । त्यसपछि सबैले प्रचण्डतिर हेरे । किनकि, अब उनको प्रतिक्रिया सुन्न आतुर थिए, वृत्तचित्र निर्माण टोली, पत्रकार र कलाकार ।

अलि भावुक मुद्रामा प्रचण्ड बोले, ‘चलचित्र बडो यथार्थपरक भएर निर्माण भएको रहेछ, वास्तवमा आजको परिवर्तन र उपलब्धिका पछाडि हजारौं वीर योद्धाको त्याग र समर्पण छ ।’

ऐतिहासिक वृत्तचित्र निर्माण गरेको भन्दै प्रचण्डले कृष्ण केसी र उनी पत्नी दुर्गा र निर्माण टोलीको प्रशंसा गरे । ‘वृत्तचित्रमा अभिनय गरेका कलाकारको भूमिका पनि निकै मार्मिक र कलात्मक छ,’ उनले भने, ‘उहाँहरुलाई भविष्यमा स्थापित कलाकार भएको देख्न पाऊँ ।’

उनले भैरवनाथ वृत्तचित्रले परिवर्तित राजनीतिको विगत बोलेको बताए । ‘हामी अहिले जुन परिस्थितिबाट अगाडि बढिरहेका छौं । त्यसको पछाडि रहेको पृष्ठभूमि कति मार्मिक थियो भन्ने कुरा बुझ्न, शिक्षा लिन र अगाडि बढ्न भैरवनाथले थप प्रेरणा दिन्छ,’ प्रचण्डले थपे ।

भैरवनाथ वृत्तचित्र जिउँदो शहीदका रुपमा सम्मानित कृष्ण केसीको सत्य घटनामा अधारित रहेको बताइएको छ । वृत्तचित्रमा केसी सशस्त्र विद्राेहका समयमा तत्कालीन ‘मानव वधशाला’का रुपमा परिचित भैरवनाथ गणबाट पक्राउ परेदेखि शान्ति प्रक्रियामा आइसकेसम्मका घटना परिघटना देखाइएको छ ।

केसीले भैरवनाथ गणभित्र बन्दी रहँदा भोगेको यातना र उनका रिहाइका लागि उनकी श्रीमती दुर्गाले गर्नुपरेको संघर्षको कथालाई वृत्तचित्रमा निकै मार्मिक ढंगले प्रस्तुत गरिएको छ ।

कृष्ण केसीले पाएको यातना मात्रै नभएर वृत्तचित्रमा तत्कालीन शाही सेनाले श्रीमान्लाई गिरफ्तार गरेपछि दुर्गाले चरम रुपमा भोगेका शारीरिक, मानसिक र पारिवारिक पीडा तथा प्रशासनिक झमेलालाई वृत्तचित्रमा प्रस्तुत गरिएको छ ।

प्रकाशित मिति: सोमबार, जेठ ६, २०७६ ०७:१४