मन्त्री मनाङे भन्छन् - सरकार १० दिनमा जान सक्छ, सांसद छँदै छु

तस्वीर - सुदर्शन रञ्जित

A+ A A-

गण्डकी प्रदेशका नवनियुक्त युवा तथा खेलकुद मन्त्री राजीव गुरुङ (दीपक मनाङ) ले पृथ्वीसुब्बा गुरुङ नेतृत्वको सरकार १० दिनमै जाने अभिव्यक्ति दिएका छन् । संसदमा मुख्यमन्त्री पृथ्वीसुब्बा गुरुङविरुद्धको अविश्वास प्रस्तावमाथि छलफल चलिरहेकाबेला पृथ्वीसुब्बाकै क्याबिनेटमा मन्त्री बनेका मनाङेले बिहीबार साँझ मन्त्रीको पदभार ग्रहण गर्दै यस्तो अभिव्यक्ति दिएका हुन् ।

‘मलाई थाहा छ सरकार १० दिनमा जान सक्छ । सवाल १० दिनको होइन । सांसद त म हो नि । मन्त्री पद जाला रे,’ उनले थपे, ‘कुनचाहिँ मन्त्री बन्न चुनाव जितेको हो ? सांसद बनाएर पठाएको हो । सांसद छँदै छु ।’

अविश्वास प्रस्तावमा कसलाई समर्थन गर्नुहुन्छ भन्ने प्रश्नमा उनले केही बोलेनन् । दुई हप्ताभित्र प्रदेशको खेलकुद क्षेत्रमा परिवर्तन ल्याउने मन्त्री गुरुङको दाबी छ । आफू खेल क्षेत्रका व्यक्तिको सल्लाह लिएर अगाडि बढ्ने उनले बताए ।

‘अहिले धेरै मान्छे मलाई भेट्न आइरहेका छन् । सबै भाइहरु स्पोर्टस्मेन हो,’ मन्त्री मनाङेले थपे, ‘उनीहरूले आइडिया दिनुपर्ने हुन्छ । म त फुटबलर हो, टेबल टेनिस राम्रो हो । अरुमा सल्लाह लिएर जाने हो ।’

वर्षौं पुरानो कम्युनिस्ट नेताका कुरा गर्ने पार्टीमा आफू आबद्ध नहुने मन्त्री मनाङेको भनाइ छ । ‘म आफूलाई भयंकर कम्युनिस्ट भन्न चाहन्न । म एमाले, माओवादी भएर जान सक्दिनँ । उहाँहरूले नेपालको इतिहासलाई वास्ता नगर्दो रहेछ,’ उनले थपे, ‘मार्क्स, लेनन भनेछ । नेपालमा पनि राम्रो टप–टप नेता छ नि । त्यसकारण मलाई यो विदेशी मात्रै हेर्ने पार्टी मन पर्दैन ।’

मनाङ ‘ख’बाट स्वतन्त्र निर्वाचित गुरुङलाई सामाजिक विकास मन्त्रालय फुटाएर बिहीबार युवा तथा खेलकुद मन्त्री बनाइएको हो । उनले बिहीबार नै प्रदेश प्रमुख अमिक शेरचनसमक्ष सपथ लिएका छन् ।

प्रकाशित मिति: बिहीबार, वैशाख १६, २०७८ २१:५५