पोजिटिभ आएको स्वाब सांसद शाहीकै हो ? प्रयोगशालाकर्मी भन्छन् - केही गडबड छ

A+ A A-

गण्डकी प्रदेशसभा सदस्य खिमविक्रम शाही ‘कोरोना पोजिटिभ’ भएपछि पोखराको चरक मेमोरियल अस्पतालमा उपचाररत छन् । अचम्म के छ भने उनी कोरोना संक्रमित हुन्/होइनन् भन्ने नै शंकास्पद देखिएको छ ।

सरकार जोगाउने रस्साकस्सी चलिरहँदा सांसद एकाएक आईसीयूमा भेटिनु, कोरोना परीक्षण रिपोर्ट दुईथरी आउनु नै शंकास्पद छ । दुई रिपोर्टमा प्रश्न उठेपछि चरक अस्पतालले सांसद शाहीको तेस्रोपटक परीक्षण गर्दा पोजिटिभ आएको बताएको छ । तर, तेस्रोपटक प्रदेश जनस्वास्थ्य प्रयोगशालामा पठाइएको स्वाब नै नक्कली भएको आशंका उब्जिएको छ ।

२४ घन्टाको अवधिमा एउटै व्यक्तिको नाममा प्रयोगशालामा पठाइएको स्वाबको तीन वटै रिपोर्ट फरक छ । पहिलो नेगेटिभ, दोस्रो र तेस्रो पोजिटिभ । सांसद शाही आफैँले दिएको स्वाबको रिपोर्ट नेगेटिभ आएको छ भने अरुमार्फत पुगेको स्वाबको रिपोर्ट पोजिटिभ आएको छ । अरुले लगेको स्वाब उनैको हो/होइन कि होइन भन्नेमै शंका उब्जिएको छ । पहिलोपटक प्रदेश क्षयरोग केन्द्रस्थित सरकारी ल्याब, दोस्रो निजी ल्याब लाइफकेयर डाइग्नोस्टिक र तेस्रो क्षयरोगकै ल्याबमा परीक्षण भएको हो ।

‘दुईपटक हाम्रो ल्याबमा स्वाब टेस्ट भयो । तर, २४ घन्टा नबित्दै नेगेटिभ र पोजिटिभ आयो,’ क्षयरोगस्थित ल्याबमा कार्यरत प्रयोगशालाकर्मी भन्छन्, ‘पहिलो स्वाब हामीहरूबाटै लिँदा नेगेटिभ र अर्को दुईपटक बाहिरबाट आउँदा पोजिटिभ हुनु नै शंका छ । सिटी भ्यालु २४ घन्टामै फरक कसरी आउन सक्छ ?’

पहिलोपटक सांसद शाहीको स्वाब प्रदेशसभा सचिवालयमा मंगलबार बेलुकी ५ देखि ६ बजेबीचमा लिइएको थियो । त्यसको रिपोर्ट बुधबार बिहान नेगेटिभ आयो । तर, संसदमा मुख्यमन्त्रीविरुद्ध अविश्वास प्रस्तावमाथि मतदान हुने दिनमै सांसद शाही बेपत्ता भए । पछि चरक मेमोरियल अस्पतालमा भेटिएका उनको रिपोर्ट पोजिटिभ आएको भनियो ।

सांसद शाहीको पोजिटिभ रिपोर्ट निकाल्ने प्रयोगशाला लाइफकेयर डाइग्नोस्टिक हो । यसका सञ्चालक डा. अमर नागिला सत्तानजिकका व्यक्ति हुन् । तेस्रो स्वाब चरक अस्पतालले प्रदेश जनस्वास्थ्य प्रयोगशाला पुर्‍याएको थियो । ‘ल्याबमा आएर नेगेटिभलाई पोजिटिभ बनाएर गडबड भएको होइन । स्वाब पठाउँदा अस्पतालले बठ्याइँ गरेको हुनसक्छ । त्यो स्वाब अरुकै हो कि,’ सांसद शाहीको पहिलो र तेस्रो स्वाब परीक्षणमा खटिएका प्रयोगशालाकर्मीले भने ।

चरक अस्पताल र लाइफकेयर दुवै सत्ताधारीनिकटकै व्यक्तिको हो । सांसद हराउनु, सत्ता निकटकै हस्पिटलमा भेटिनु, सत्ता निकट व्यक्तिकै ल्याबमै परीक्षण हुनु सोचनीय विषय छ । ‘हाम्रै ल्याबमा टेस्ट गराउँदा २४ घन्टामै नेगेटिभ र पोजिटिभ आएको भनिएको छ । लाइफकेयरमा पोजिटिभ आउँदाको सिटी भ्यालु र हाम्रोमा जाँच्दाको सिटी भ्यालु नै त्यस्तो फरक हुनु नै शंकाको विषय हो,’ एक प्रयोगशालाकर्मीले भने ।

मंगलबार राति प्रदेश क्षयरोग केन्द्रमा रहेको कोरोना प्रयोगशालामा सांसद शाहीको स्वाब परीक्षण गरिएको थियो । प्रदेशसभाबाट संकलित स्वाबको रिपोर्ट बुधबार बिहान नेगेटिभ आए पनि पछिल्ला दुई रिपोर्ट पोजिटिभ भनिए पनि त्यसमा सिटी भ्यालु फरक-फरक छ ।

एउटा व्यक्तिमा कोरोना संक्रमणको जोखिम कति छ भन्ने ‘सिटी भ्यालु’ ले देखाउँछ । सिटी भ्यालु ३७ भन्दामाथि आएमा नेगेटिभ हुन्छ । त्योभन्दा जति कम हुन्छ त्यति नै जोखिमपूर्ण मानिन्छ ।

वीर अस्पतालमा कार्यरत एक प्रयोगशाला विज्ञले आफूले तीनवटै रिपोर्ट हेरेको र स्वाब एउटै व्यक्तिको हुनै नसक्ने बताउँछन् । ‘मैले त्यो तीनवटै रिपोर्ट हेरेँ । २४ घन्टामै भाइरल लोड १६ बाट कसरी ३१ हुन सक्ला र ? यसमा गडबड छ,’ उनले थपे, ‘मेडिकल भाषामा भाइरल लोड १६ हुनु एकदम खतरनाक हुन्छ ।’

ती विज्ञ प्रयोगशालाकर्मीका अनुसार सामान्यतया भाइरल लोड १६ बाट ३१ पुग्न कम्तीमा १४ दिन लाग्छ । यही कारण तीनवटै स्वाब फरकफरक हुने क्षयरोगका प्रयोगशालाकर्मीको भनाइमा ती विज्ञ पनि सहमत छन् ।

चरक अस्पतालका निर्देशक कपिल पोखरेलको पहुँच बालुवाटारसम्म छ । सांसद बेपत्ता काण्डपछि उपप्रधानमन्त्री ईश्वर पोखरेल र प्रधानमन्त्री केपी शर्मा ओली प्रेस सल्लाहकार सूर्य थापासँगको फोटो सार्वजनिक भएको छ ।

त्यति मात्रै होइन बेलाबखत विवादमा आइरहने सांसद महेश बस्नेतसँग पनि उनको चिनजान रहेछ । पोखरेलले सांसद बस्नेतलाई आफ्नो अस्पतालमा स्वागत गरेको बिहीबार बिहान सार्वजनिक तस्वीरमा देखिन्छ । त्यो तस्वीर हालसालैको होइन । किनकि गण्डकी प्रदेशसभा सदस्य राजीव पहारी पनि आडैमा छन् । तर, यो तस्वीर कोरोनाकालकै हो ।

निर्देशक पोखरेल र सांसद बस्नेतसँग मास्क देखिन्छ र चरक अस्पताल गत वर्षबाट मात्रै हालको भवनमा सञ्चालनमा आएको हो । अहिले प्रदेशमा एमालेकै सरकार जोखिममा रहँदा ‘हराएका’ सांसदलाई कसैसँग भेट्न नदिनु शंकास्पद मानिएको छ ।

प्रयोगशाला भन्छ– रिपोर्टमा हाम्रो चलखेल छैन

प्रदेश जनस्वास्थ्य प्रयोगशालाले भने स्वाबको रिपोर्टमा आफूहरूले कुनै चलखेल नगरेको बताएको छ । प्रयोगशालाकी निमित्त निर्देशक सपना सुवेदीले प्रयोगशालामा आएको स्वाबकै रिपोर्ट आफूहरूले दिएको बताइन् । स्याम्पल ३ बजे प्रयोगशालामा आएको र राति साढे ८ बजे रिपोर्ट पोजिटिभ आएको उनको भनाइ छ ।

‘हामीलाई जुन स्याम्पल आयो त्यसैको रिपोर्ट दिएका हौँ । हामीले मान्छे को हो भनेर चिन्दैनौँ । स्याम्पल चिन्छौँ । अरु के भयो थाहा भएन,’ उनले शिलापत्रसँग भनिन् ।

नेगेटिभ स्याम्पल प्रयोगशालाको फ्रिजमा १ महिनासम्म राखिन्छ । पोजिटिभ स्याम्पल ३ महिना राखिन्छ । सिटी भ्यालु पनि सधैँ एउटै हुने सम्भावना कम हुने निर्देशक सुवेदी बताउँछिन् । ‘ठ्याक्कै सिटी भ्यालु एउटै नहुन सक्छ । स्याम्पल लिँदा जति भाइरस आउँछ त्यहीअनुसार लोड देखिन्छ । एउटै नहुने सम्भावना पनि छन्,’ उनले भनिन् ।

स्वाबको रिपोर्ट एक मिनेटमै आएको र चलखेल भएको विषय पनि सामाजिक सञ्जालमा उठेको छ । क्षयरोगस्थित सरकारी ल्याबमा गरिएको परीक्षणमा रिपोर्टअनुसार सांसद शाहीको स्वाब प्रयोगशालामा आएको समय राति ८ बजेर ५१ मिनेटमा र दिइएको समय ८ बजेर ५२ मिनेटमा छ ।

स्वाब आएको एक मिनेटमै रिपोर्ट कसरी दिइयो भन्ने प्रश्न उठेपछि प्रयोगशालाले विज्ञप्ति नै निकालेको छ । सांसद शाहीको नाममा बुधबार दिउँसो चरक अस्पतालबाट प्रयोगशालामा आएको र राति एकैपटक इन्ट्री गरिएको निमित्त निर्देशक सुवेदीले निकालेको विज्ञप्तिमा उल्लेख छ ।

अस्पताल भन्छ– त्यस्तो काम हामीबाट हुँदैन

चरक अस्पतालले भने आफूहरूले अरुको स्वाब नपठाएको दाबी गरेको छ । अस्पतालका डा. बद्री पौडेलले सांसद शाहीको रिपोर्ट पोजिटिभ देखाउने नियत आफ्नो अस्पतालले नगर्ने बताए ।

‘हामीले कोरोना भएका बिरामीको उपचार गर्ने हो । अरुको स्वाब संकलन गरेर त्यसरी पठाउने काम हामीबाट हुँदैन । हाम्रो शुद्ध काम भनेको उपचार गर्ने हो,’ डा. पौडेलले भने । सिटी भ्यालुको विषयमा भने डा. पौडेलले बोल्न मानेनन् ।

सांसद शाही भन्छन् – पार्टीको निर्णयअनुसार चल्छु

अविश्वास प्रस्तावमाथि मतदान हुने दिन संसद्‍मा अनुपस्थित राष्ट्रिय जनमोर्चाका सांसद खिमविक्रम शाहीले आफू पार्टीको निर्णयअनुसार चल्ने बताएका छन् ।

बिहीबार विज्ञप्ति जारी गरी उनले अन्य कारणबाट नभई अस्वस्थ भएर अस्पताल भर्ना भएको बताएका छन् । ‘पार्टीको निर्णय र संसदीय दलको निर्णयमा मेरो पनि सहभागिता रहेका कारण ती निर्णयप्रति मेरो सहमति रहेकाले त्यस विषयमा मेरो प्रतिबद्धता कायमै छ,’ विज्ञप्तिमा भनिएको छ ।

स्वास्थ्यमा सुधार भएपछि आफूबारे उठेका प्रश्नबारे स्पष्ट पार्ने सांसद शाहीको भनाइ छ । ‘म अहिले उपचाररत छु । मेरो स्वास्थ्य क्रमिक रूपमा सुधार भएको महसुस गरेको छु । म थप स्वस्थ भएपछि मेरोबारेमा उठेका कैयौँ प्रश्नबारेमा स्पष्ट पार्नेछु,’ विज्ञप्तिमा उल्लेख छ । संसद् जाने तयारी गरिरहँदा अचानक बिरामी भएको र भाइले अस्पताल ल्याएको उनले बताएका छन् ।

संसद् बैठक अनिश्चित

जनमोर्चाका सांसद शाही बेपत्ता भएपछि संसद अनिश्चितकाललाई स्थगित गरिएको छ । मुख्यमन्त्री पृथ्वीसुब्बा गुरुङविरुद्ध प्रदेशसभामा पेस भएको अविश्वास प्रस्तावमाथि बुधबार मतदान हुने कार्यसूची थियो । तर, सांसद शाही एकाएक बेपत्ता भए । पछि उनी चरक मेमोरियल अस्पतालको आईसीयुमा भेटिए । सांसद शाही अनुपस्थित हुँदा अविश्वास प्रस्ताव फेल हुने देखेपछि सभामुखले बुधबारको संसद् बैठक नै स्थगित गरे ।

बैठक रोक्न जनमोर्चा सांसद पियारी थापाले प्रदेश सभा सचिवालयमा निवेदन दिएकी थिइन् । आफ्नो पार्टीको सांसद बेपत्ता भएको र खोजी गरिदिन भन्दै उनले संसद् बैठक रोकेर खोजी गर्न माग गरेकी थिइन् ।

सभामुख नेत्रनाथ अधिकारी माओवादीबाट निर्वाचित हुन् । गण्डकी प्रदेशमा कांग्रेस, माओवादी र जसपाले अविश्वास प्रस्ताव ल्याएको छ । त्यसमा जनमोर्चाको समर्थन छ । अहिले पनि सांसद शाही सोही अस्पतालमा उपचाररत छन् । सांसद शाहीको अवस्था हेरेरमात्रै अविश्वासमाथि मतदान हुन दिने प्रस्ताव ल्याउने दलको योजना छ । सत्ता पक्ष भने सांसद शाही नआउँदै अविश्वास टुंगो लगाउन चाहन्छ ।

एक सांसद तलमाथि भए जोगिन्छ सरकार

अविश्वास ल्याएका र समर्थन जनाएका चार दलमध्ये एक सांसद अर्को पक्षमा गएमात्रै अविश्वास प्रस्ताव फेल हुन्छ । त्यसैले सांसद शाही अनुपस्थित हुँदा अविश्वास प्रस्ताव फेल हुन्थ्यो । त्यही कारण संसद अनिश्चितकाललाई स्थगित गरियो ।

६० सदस्यीय गण्डकी प्रदेश सभामा एमालेका २७ सांसद छन् । कांग्रेसका १५, माओवादीका १२, जनमोर्चाका ३ र जसपाका २ सांसद छन् । एक सांसद स्वतन्त्र हुन् ।

स्वतन्त्र सांसद राजीव गुरुङ (दीपक मनाङे) मुख्यमन्त्री पृथ्वीसुब्बा गुरुङकै पक्षमा छन् । यसरी मुख्यमन्त्री गुरुङको पक्षमा २८ सांसद छन् । अविश्वास प्रस्ताव ल्याएका कांग्रेस, माओवादी र जसपाका २८ सांसदको मत सरकार ढाल्ने पक्षमा छ । अविश्वासमा हस्ताक्षर नगरे पनि जनमोर्चाको पार्टीगत समर्थन अविश्वासकै पक्षमा छ । माओवादीबाट निर्वाचित भए पनि सभामुखले पदीय मर्यादाले गर्दा मतदान गर्न पाउँदैनन् ।

यसरी हालको अवस्थामा कांग्रेसका १५, माओवादीका ११, जनमोर्चाका ३ र जसपाका २ सांसद अविश्वासकै पक्षमा रहेकाले ३१ मत पुग्छ । यी दलका एक जना सांसदले फ्लोर क्रम गरे ३० पुग्छ र अविश्वास प्रस्ताव फेल हुन्छ ।

प्रकाशित मिति: बिहीबार, वैशाख १६, २०७८ २१:२२