ग्लोबल आईएमईलाई पछि पार्दै नबिल बन्यो सबैभन्दा बढी नाफा कमाउने बैंक

A+ A A-

पछिल्लो त्रैमासमा मात्रै १ अर्ब ६७ करोडभन्दा बढी नाफा आर्जन गरेपछि नबिल बैंक वाणिज्य बैंकहरूमध्ये सबैभन्दा बढी नाफा कमाउने बैंक बन्न पुगेको छ । अघिल्ला दुईवटा त्रैमासमा सबैभन्दा बढी नाफा कमाउन ग्लोबल आईएमई बैंक सफल देखिएकोमा तेस्रो त्रैमासमा आइपुग्दा नबिल बैंकले पछि पारेको हो ।

पछिल्लो नौ महिनाको अवधिमा नबिल बैंकको खुद मुनाफा ३ अर्ब ६८ करोड रुपैयाँ छ । यसै अवधिमा ग्लोबल आईएमई बैंकले ३ अर्ब ५७ करोड रूपैयाँ नाफा कमाएको छ ।

साउनदेखि पुससम्मको अवधिमा नबिल बैंकको नाफा २ अर्ब १ करोड रूपैयाँ थियो भने ग्लोबल आईएमई बैंकको २ अर्ब ३५ करोड रुपैयाँ थियो । तर, पछिल्लो तीन महिनामा नबिल बैंकले आक्रामक रूपमा बजार विस्तार गरेको देखिएको छ । नबिल बैंकले गत वर्षको तुलनामा १६.५६ प्रतिशले नाफा बढाएको छ । पुससम्म उसको नाफा १.२७ प्रतिशले कमी आएको थियो ।

हालसम्म नबिल बैंकले १ खर्ब ६८ अर्ब रुपैयाँ निक्षेप जम्मा गरेको छ भने पछिल्लो नौ महिनामा ५३ करोड रुपैयाँ निक्षेप घटेको छ । त्यस्तै, बैंकले १ खर्ब ६० अर्ब रुपैयाँ कर्जा विस्ता गरेकोमा पछिल्लो नौ महिनामा २० अर्ब ९८ करोड रुपैयाँले बढेको छ ।

नौ महिनामा यो बैंकले ब्याज आम्दानी ५ अर्ब ९ करोड रुपैयाँ गरेको छ भने ब्याजबाहेकको आम्दानी २ अर्ब ८९ करोड रुपैयाँ छ ।

नाफा प्रतिशत वृद्धिका आधारमा नबिल बैंकभन्दा ग्लोबल आईएमई नै अगाडि देखिएको छ । नौ महिनामा यो बैंकले ३२ प्रतिशले नाफा बढाएको छ ।

पछिल्लो तीन महिनामा ग्लोबलआईएमई बैंकले १ अर्ब २६ करोड नाफा बढाएको छ । नबिलको तुलनामा यो ४१ अर्ब रुपैयाँले कमी हो ।

ग्लोबल आईएमईले हालसम्म २ खर्ब ३३ अर्ब रुपैयाँ कर्जा विस्तार गरेको छ । जसमा पछिल्लो नौ महिनामा ३३ अर्ब रुपैयाँ कर्जा बढाएको छ । त्यस्तै, हालसम्म २ खर्ब ५८ अर्ब रुपैयाँ निक्षेप जम्मा गरेकोमा पछिल्लो नौ महिनामा ३१ अर्ब ८९ करोड रुपैयाँ संकलन गरेको छ । नौ महिनामा यो बैंकको ब्याज आम्दानी मात्रै ६ अर्ब ८७ करोड रुपैयाँ छ ।

प्रकाशित मिति: बिहीबार, वैशाख १६, २०७८ १२:१९