कोरोनासँग लड्‌न स्टार्टअपका यस्ता छन् नयाँ योजना

A+ A A-

गत वर्ष रित्ता सडकहरूमा तातो खाना, खाजा अनि औषधि ब्यागभरि हालेर दौडिरहेका भेटिन्थे । ११ चैत २०७६ मा लकडाउन हुनुअघि कार्यालय पोशाकमा ठूला ब्याग बोकेर बाइकमा हुइँकिने यस्ता व्यक्ति विरलै देखिन्थे । तर, अहिले लकडाउनका बेला सडकभरि यस्ता व्यक्तिहरू बाक्लै देखिन थाले ।

उनीहरू अनलाइन डेलिभरी कम्पनीमा काम गर्ने श्रमिक हुन् । यस वर्ष पनि गत वर्षको जस्तो सडकहरू सुनसान बनेका छन् । मानिस घरभित्रै थुनिएका छन् । अनि तिनै डेलिभरी कामदार सकडमा निस्किएका छन् । जो दिनभर कसैलाई खाना कसैलाई रेस्टुरेन्टका खाजा त कसैलाई औषधि पुर्‍याउन व्यस्त हुनेछन् ।

गतवर्ष 'दुई छाक खानाका लागि पनि अनलाइनबाट अर्डर गर्नुपर्छ र ?' भन्नेहरू अहिले घरमा चाहिने सबै सामान अनलाइनबाटै मगाउन थालेका छन् ।

नेपालीको जीवनशैलीमा आमूल परिवर्तन ल्याउन लकडाउन अवसर बन्यो । आज ठीक एक वर्षपछि इकमर्स क्षेत्रलाई पुन: निषेधाज्ञाले दोस्रो अवसर दिएको छ ।

यही अवसरमा फाइदा उठाउँदै उपत्यकामा रहेका १ सयभन्दा बढी इकमर्सहरूले धमाधम नयाँ योजनाहरू सार्वजनिक गरिरहेका छन् । जसमा कोही घरमै खानेकुरा बनाएर बेच्न सक्ने व्यवस्था गर्दै छन् त कोही उपत्यकाबाहिर पनि आफ्नो सेवा विस्तार गर्दै छन् । अझ केही इकमर्सले त निषेधाज्ञाका कारण रोजगारी गुम्नेहरूलाई जागिरको समेत व्यवस्था गर्दै छन् ।

कहरमा इकमर्सको नयाँ योजना

गत वर्ष बामे सर्दै गरेका इकमर्स व्यवसाय अहिले पूर्ण हुने कसरतमा छन् । कोरोना संक्रमण बढ्दै जाँदा कति दिन र कहिलेसम्म निषेधाज्ञा जारी रहन्छ भन्ने ठेगान छैन । काठमाडौंमा पढ्न एक्लै बस्नेहरूको संख्या पनि बढी छ ।

यस्तो अवस्थामा दैनिक रूपमा खाना पुर्‍याउनदेखि खाजा, औषधिलगायत लत्ताकपडासम्मको माग गत वर्षभन्दा बढ्ने देखिन्छ । अझ परिवारै संक्रमित भएको अवस्थामा बाहिरबाट खाद्यान्न किन्न पनि इकमर्सकै भर पर्नुपर्ने अवस्था सिर्जना हुँदै छ ।

यिनै कुरालाई ध्यानमा राख्दै अहिले इकमर्स व्यवसायहरू धमाधम आफ्नो सेवा विस्तार गर्न तल्लीन छन् । कोही कर्मचारी खोज्न त कोही कसरी घरमै रोजगारी दिने र बाहिर व्यवसाय गर्ने भन्नेमा तल्लीन छन् ।

यस्तैमा खानेकुरा डेलिभरी गर्दै आएको फुडमाण्डू डटकमले बढ्दो संक्रमणलाई मध्यनजर गर्दै पोखरामा पनि आफ्नो सेवा विस्तार गर्दै छ । अझ घरमा नै मीठो खाना पकाउन सक्ने गृहिणीलाई पनि रोजगारी दिने तयारी छ । फुडमाण्डूका ब्राण्डिङ मार्केटिङ एण्ड बिजनेस डेभलपमेन्ट चिफ श्यामरत्न माली अहिलेसम्म फुडमाण्डूले विभिन्न होटल तथा रेस्टुरेन्टबाट खाना किनेर ग्राहकको घरसम्म पुर्‍याउने काम गरे पनि अब घरबाटै घरसम्म खाना पुर्‍याउन सक्ने व्यवस्था गर्न लागेको बताए ।

योसँगै फुडमाण्डूले भोलिका दिनमा कर्मचारी अभाव हुन सक्ने भन्दै कर्मचारी व्यवस्थापनसँगै सेवासमेत बढाउने तयारी गर्दै छ ।यस्तै, अनलाइन प्लेटफर्म ग्यापुले पनि बढ्दो संक्रमणलाई लक्षित गर्दै फुड आइटम बढाउनुका साथै डेलिभरी सहज गर्ने व्यवस्था गर्दै छ । जसका लागि ४० भन्दा धेरै कर्मचारी नियुक्ति गरिसकेको छ भने डेलिभरी सपोर्टका लागि बाहिरी डेलिभरी ब्वाईसँगको सहकार्यलाई पनि अगाडि बढाउँदै छ ।

निषेधाज्ञासँगै खानेकुरा, तरकारीलगायत ग्रोसरीका सामानको माग अत्यधिक बढ्ने हुँदा ग्यापुले ११ वटा रेस्टुरेन्टसँग सहकार्य गरेको छ । यो समय फ्रोजन फुडको माग अत्यधिक हुने ग्यापुका मार्केटिङ म्यानेजर अभिमन्यु शर्मा बताउँछन् । उनी भन्छन्, ‘गत वर्षभन्दा यस वर्ष माग अत्यधिक हुनेछ । त्यसअनुसारको रिसोर्सहरू व्यवस्थापन गर्न हम्मे परिरहेको छ । तर पनि हामी प्रयास गर्दै छौँ । यो समय व्यवसायी मात्र नभएर सेवामुखी बन्नुपर्ने देखिन्छ ।’

यस्तै, भोजडिलले त गत वर्षबाटै आफ्ना ग्राहकलाई सादा खाना घरघरमै पस्कँदै आएको छ । यस वर्ष पनि कर्मचारी थप गर्दै खानासँगै अन्य फुड आइटम र ग्रोसरीका सामान उपत्यकाभित्र पुर्‍याउने योजनामा छ ।

यता सस्तो डिलले बढ्दो संक्रमणलाई दृष्टिगत गर्दै अहिले अत्यावश्यक सामान डेलिभरीलाई जोड दिएको छ । जसका लागि सस्तो डिलले ग्रोसरीका सामान सस्तोदरमा बिक्री गर्नुका साथै १ हजारभन्दा बढी मूल्यका सामान किन्दा डेलिभरी नि:शुल्क गरेको छ ।

यीबाहेक डोको डटकम, मेरो किराना डटकम, पसल डटकमजस्ता इकमर्सले निषेधाज्ञालाई सेवा विस्तारमा आक्रामक ढंगले लागिपरिरहेका छन् ।

गतवर्ष सरकारले बुझेन, यस वर्ष बुझोस्

फुडमाण्डूका ब्राण्ड मार्केटिङ एण्ड बिजनेस डेभलपमेन्ट श्याम माली गत वर्ष लकडाउनको समयमा अत्यावश्यक सामान डेलिभरी गर्न सरकारले अवरोध पुर्‍याएको बताउँछन् । उनी भन्छन्, ‘हामी संक्रमणमुक्त र सुरक्षितसँग डेलिभरी गर्छौं । गत वर्ष इकमर्सको फाइदा सरकारले बुझेन, यस वर्ष बुझोस् ।’

ग्यापु मार्केटका म्यानेजर अभिमन्यु शर्मा पनि सरकारले निषेधाज्ञामा डेलिभरी कम्पनीहरूलाई हिँड्न सहज बनाइदिने हो भने सामान किन्न बाहिर निस्कनैपर्ने उपभोक्ताको बाध्यता हटेर जाने बताउँछन् ।

यता वाणिज्य आपूर्ति तथा उपभोक्ता संरक्षण विभाका महानिर्देशक प्रकाश पौडेल भने अहिले इकमर्सलाई खाद्यान्न र ग्रोसरीका सामग्री मात्रै डेलिभरी गर्ने छुट दिइएको बताउँछन् । उनले तीबाहेकका सामान डेलिभरी गरेको पाइएमा कारबाही गर्ने भए पनि अत्यावश्यक सामान डेलिभरीमा कुनै समस्या नआउने जानकारी दिए ।

प्रकाशित मिति: बिहीबार, वैशाख १६, २०७८ १२:५७