‘बेपत्ता’ सांसदको कोरोना परीक्षण शंकास्पद : एकैदिन संकलित नमुनाको दुईथरी रिपोर्ट

‘बेपत्ता’ सांसदको कोरोना परीक्षण शंकास्पद : एकैदिन संकलित नमुनाको दुईथरी रिपोर्ट

A+ A A-

गण्डकी प्रदेशको राजनीतिक समीकरण बुधबार एकाएक बदलियो । संसदमा मुख्यमन्त्री पृथ्वीसुब्बा गुरुङविरुद्ध पेस भएको अविश्वास प्रस्तावमा मतदान गर्ने कार्यसूची थियो । तर, अविश्वासको पक्षमा रहेका भनिएका एक जना सांसद नै बैठकमा आएनन् । राष्ट्रिय जनमोर्चाका सांसद खिमविक्रम शाही नआएपछि अविश्वास प्रस्ताव नै फेल हुन्थ्यो ।

जनमोर्चा सांसद पियारी थापाले आफ्नो पार्टीको सांसद हराएको र नभेटिँदासम्म संसदको कारबाही अगाडि नबढाउन माग गरेपछि संसद् अनिश्चितकालका लागि स्थगित गरिएको छ । सभामुखले कसैसँग सल्लाह नगरी संसद् स्थगित गरेपछि सत्ताधारी दल आक्रोशित बनेको छ ।

बेपत्ता भनिएका सांसद शाही पोखराको नागढुंगास्थित चरक मेमोरियल हस्पिटलको आइसीयूमा छन् । उनले आफ्नो टाउको दुखेको भनेपछि त्यहाँ लगिएको थियो । त्यहाँ पुग्ना साथ उनलाई कोभिड वार्डको आइसीयूमा राखिएको छ ।

सांसद शाहीसँग कसैलाई भेट्न दिइएको छैन । भेट्न अस्पताल पुगेका मुख्यमन्त्री पृथ्वीसुब्बा गुरुङ, जनमोर्चा संसदीय दलका नेता कृष्ण थापा, जनमोर्चाका प्रदेश अध्यक्ष शंकर बरालले अवस्था गम्भीर रहेको भन्दै फर्काइदिए । ‘उहाँको अवस्था गम्भीर छ । मृत्युसम्म हुनसक्छ भन्नुभयो । त्यसपछि भेट्ने कुरा भएन, फर्किएँ,’ अध्यक्ष बरालले शिलापत्रसँग भने । अस्पतालमा नेपाल प्रहरी र सशस्त्र प्रहरीको बाक्लो उपस्थिति छ ।

कोरोना रिपोर्टमा शंका

संक्रमित भएपछि अस्पताल भर्ना भएका भनिएका सांसद शाहीलाई कोरोना भए/नभएको विषयमै शंका उत्पन्न भएको छ । एकै समयमा दिइएको दुईवटा स्वाबको नमुनाको रिपोर्ट फरकफरक छ । त्यति मात्रै होइन एउटा रिपोर्ट नेगेटिभ र अर्को रिपोर्ट ‘मृत्युसम्म हुनसक्ने’ खालको अवस्था पुर्‍याएको भनिएपछि यसमा शंका देखिएको छ । एकैदिन नमुना दिएको र एकैदिन आएको रिपोर्ट नै फरक छ ।

मंगलबारको संसदमा उनी कुनै समस्यामा देखिएका थिएनन् । एमालेको अवरोध र मागपछि प्रदेश सभाका सांसद, कर्मचारीसहित १५३ जनाको स्वाब संकलन गरियो । त्यहाँ संकलित शाहीको स्वाबको रिपोर्ट नेगेटिभ आयो । प्रदेशसभामा पौने ५ बजेदेखि ६ बजेसम्म स्वाब संकलन भएको थियो ।

तर, त्यहाँ स्वाब संकलन हुनुभन्दा १ घन्टा पहिला ४ बजे उनको स्वाब पोखराको न्यूरोडस्थित लाइफकेयर डाइग्नोस्टिक पुर्‍याइयो । त्यहाँ उनको स्वाब फेवासिटी हस्पिटलबाट ल्याएको थियो । लाइफकेयरमा दिइएको स्वाबको रिपोर्ट भने बुधबार बिहान पोजिटिभ आएको छ । अरुले नै स्वाब लगेको, स्वाब दिएको समयमा संसदमै रहेकाले त्यो स्वाब उनकै थियो वा अरुको भन्नेमा पनि शंका देखिएको छ ।

सांसदको त्यो बेचैनी...

प्रदेशसभा चलिरहँदा कांग्रेस, माओवादी, जसपाका सांसद एकएक गरेर संसद् भवन बाहिर निस्किए । आजै मतदान हुने तर एक जना सांसद बेपत्ता भएपछि अविश्वास प्रस्ताव ल्याएका दलका सांसद असाध्दै बेचैन देखिन्थे । त्यसपछि सांसद शाहीलाई फोन गरे । तर, उनको मोबाइल नै अफ थियो ।

कांग्रेस सांसद मेखलाल श्रेष्ठको गाडीमा जनमोर्चा सांसद पियारी थापा र जसपाकी धनमाया लामा सांसद शाहीको पोखरा ५ जिरो किलोमिटरस्थित डेरा पुगे । उनी त्यहाँ नभेटिएपछि तीनै जना पुनः संसद् भवन फर्किए ।

सभामुखले संसद् ३० मिनेटलाई स्थगित गरे । त्यहीबेला जनमोर्चा सांसद पियारी थापाले आफ्नो पार्टीका सांसद हराएको भन्दै सभामुख नेत्रनाथ अधिकारीसमक्ष निवेदन दिइन् । उनकै निवेदनको आधारमा विशेष अधिवेशनको अर्को बैठक अनिश्चितकाललाई स्थगित भएको छ ।

आफ्ना सांसद नै नआउँदा अविश्वास फेल हुनेबारे जानकार जनमोर्चा संसदीय दलका नेता कृष्ण थापा भने चिन्तामा देखिएनन् । सभामुखले संसद् ३० मिनेटलाई स्थगित गरेपछि उनी क्यान्टिन पुगे । उनी पृथ्वीसुब्बा गुरुङ नेतृत्वको सरकार ढल्न नहुने पक्षमा छन् । अविश्वास प्रस्तावकै पक्षमा जाने पार्टीको केन्द्रीय नेतृत्वको नीतिसँग उनी असन्तुष्ट रहँदै आएका छन् ।

संसद् परिसरमा पत्रकारसँग कुरा गर्दा उनले सांसद शाहीको अवस्थबारे आफूलाई कुनै जानकारी नरहेको प्रतिक्रिया दिए । संसद् सुरु हुनुभन्दा अगाडि फोनमा कुरा भएको नेता थापाको भनाइ थियो । ‘उहाँसँग संसद् सुरु हुनुभन्दा अगाडि फोनमा कुरा भएको थियो । मतदान हुँदासम्म आउँछु भन्नुभएको थियो,’ बैठक स्थगित भएपछि थापाले भनेका थिए, ‘त्यसपछि सम्पर्क भएको छैन । कहाँ जानुभयो थाहा भएन ।’ साँझ ६ बजे नेता थापा सांसद शाहीलाई भेट्न अस्पताल पुगेका थिए । भेट्न नपाएपछि उनी फर्किए ।

रिसायो एमाले

सांसद शाही अनुपस्थित भएपछि अविश्वास प्रस्ताव फेल हुनेमा एमाले ढुक्क थियो । तर, सभामुखले कसैसँग सल्लाह नगरी संसद स्थगित गरेपछि एमाले रुष्ट बनेको छ । एमालेका प्रमुख सचेतक मायानाथ अधिकारी सभामुखले संसदीय मर्यादा विपरीत काम गरेको बताउँछन् ।

‘प्रक्रियामा गइसकेपछि त्यसलाई टुंग्याउनुपर्थ्यो । एउटा राजनीतिक आग्रहले होहल्ला गरेर नियमित सदनलाई रोक्ने जुन साथीहरूले प्रयास गर्नुभयो त्यो गलत छ । संसदीय मर्यादाभित्र हुँदैन,’ उनले भने ।

एमालेको सहमतिबिना नियतवश सभामुखले सदन स्थगित गरेको प्रमुख सचेतक अधिकारीको आरोप छ । ‘एउटा माननीय अनुपस्थित हुनेबित्तिकै संसदको कारबाही रोकिँदैन नि । मेरो दलको कोही साथी आउनु भएन भने सदन रोक्न निवेदन हालौँ त ? यस्तो त सधैँ भइरहन्छ,’ उनले भने । सभामुख नेत्रनाथ अधिकारी माओवादीबाट निर्वाचित हुन् ।

प्रकाशित मिति: बुधबार, वैशाख १५, २०७८ २१:१७