पदक बाँड्दै प्रदेश ३ सरकार

A+ A A-

राष्ट्रिय विभूषण तथा पदकहरुबारे विभिन्न टीकाटिप्पणी आइरहेको बेला प्रदेश ३ सरकारले ११ विधामा २२ वटा पदक बाँड्ने तयारी गरेको छ ।

प्रदेश सरकारले विभिन्न पदक तथा विभूषण वितरण गर्ने योजना बनाएको हो । प्रदेश सभाबाट विधेयक पास भएसँगै सम्मान तथा विभूषण बाँड्ने बाटो खुल्नेछ ।

प्रदेश सभामा दर्ता गराएको ‘विभूषण सिफारिस तथा सम्मान र पदक सम्बन्धमा व्यवस्था गर्न बनेको विधेयक’ मा पदक बाँड्ने उल्लेख गरिएको छ । विधान पास भएसँगै ११ विधामा २२ वटा पदक तथा सम्मान प्रदान गर्ने बाटोे खुल्नेछ ।

प्रदेश सभामा पेस गरेको विधेयकमा प्रदेश शान्ति तथा सुरक्षाअन्तर्गतका विभिन्न ११ विधामा पदक रहेको आन्तरिक मामिला तथा कानूनमन्त्री शालिकराम जमकटेलले बताए ।

उनका अनुसार प्रदेश रक्षक, शान्तिमाला र शान्तिदीप, प्रदेश शिक्षा, स्वास्थ्य तथा खेलकुद, शिक्षातर्फ प्रदेश दीप, स्वास्थ्यतर्फ मृत्युञ्जय र खेलकुदतर्फ प्रदेश सान, प्रदेश कृषि तथा सहकारीअन्तर्गत कृषितर्फ कृषि र सहकारीतर्फ सहकारी प्रवर्धन, प्रदेश उद्योग, पर्यटन विकास तथा वातावरण संरक्षणअन्तर्गत उद्योगतर्फ उद्यमशीलता, पर्यटनतर्फ प्रदेश द्रष्टा र वातावरणतर्फ वातावरण संरक्षण पदक प्रदान गर्ने उल्लेख छ ।

त्यस्तै, प्रदेश पूर्वाधार विकासअन्तर्गत विकास सेवी, प्रदेश सूचना तथा सञ्चारअन्तर्गत प्रदेश दूत, प्रदेश विज्ञान तथा प्रविधिअन्तर्गत विज्ञानतर्फ अन्वेषण, प्रविधितर्फ नव प्रवर्तन, प्रदेश भाषा, कला तथा संस्कृति र साहित्यअन्तर्गत भाषातर्फ सुभाषिक, कलातर्फ कलाकीर्ति, संस्कृतितर्फ संस्कृत दीप र साहित्यतर्फ प्रदेश स्रस्टा पदक दिइने आन्तरिक मामिला तथा कानूनमन्त्री जमकटेलले बताए ।

विधेयकमा प्रदेश सार्वजनिक प्रशासन तथा सुशासनअन्तर्गत जनसेवा, विपद् व्यवस्थापनअन्तर्गत विपद् सेवी र समाजसेवा लोककल्याणअन्तर्गत प्रदेश परोपकार पदक दिइने उल्लेख छ ।

प्रदेश सरकारले प्रदान गर्ने पदक तथा सम्मान सिफारिस गर्न आन्तरिक मामिला तथा कानूनमन्त्री अध्यक्ष, प्रदेश सरकारका प्रमुख सचिव सदस्य, प्रदेशमा उल्लेखनीय योगदान पुर्याएका व्यक्तिमध्येबाट समावेशी सिद्धान्तको आधारमा मन्त्रिपरिषद्ले तोकेको एक महिलासहित तीन जना सदस्य र आन्तरिक मामिला तथा कानून मन्त्रालयका सचिव सदस्य सचिव रहेको ६ सदस्य समिति रहने व्यवस्था गरिएको छ ।